Pjol
Al pjol al ze an spasio che al vansa fora da la faciada de un edificio, che se pol doperarlo, e che de solito al ga na ringhiera.
![](http://upload.wikimedia.org/wikipedia/commons/thumb/6/63/Balcone_di_Giulietta_a_Verona.jpg/220px-Balcone_di_Giulietta_a_Verona.jpg)
![](http://upload.wikimedia.org/wikipedia/commons/thumb/7/74/Balcony_in_Rome.jpg/200px-Balcony_in_Rome.jpg)
Sagoma, dimension e tecniche costrutive le canbia in maniera inpressionante secont al uso che ghen gnen fat, al perido de costrusion e i schei che al ga spendest al paron.
Inte le case citadine vece e 'te le vile i pjoi de solito i ze de pjera. La so funsion la era ligada a na vista panoramica, a un elemento par far pì bela la faciada de la casa, o, qialche olta, al bisogn de er an palco dal qual farghe descorsi a la popolasion. Se trata de pjoi estremamente pisoi, de solito fati a sbals.
Le case dei porecan, invese, no le ga mai abu an gran bisogn de er pjoi infin a la introdusion del sorch. Le prime qualità de sto cereal american difati le fea fadiga a gner fate, cossì al ze nassest al bisogn de er spasi grandi aonde meter le panoce a secarse. de fianco de ste qua se ga dontà anca fasoi e qualche altro cereal. I pjoi i era anca inportanti come spasio par meter i vestì a sugarse. I representea anca al elemento de comunicasion tra le canbere de le case rurai. Par tuti sti motivi, i pjoi i ła da esser grandi. Al materjal da costrusion principal al era al legn. I trau i podea esser incastradi a sbals 'te el mur, co elementi de inrigidiment che ruea 'te el quert (zona feltrina) o pojadi 'te el mur da na banda e te na pjana incastrada a pilastri da quelaltra (solusion adotada 'te el beluness e 'te la alta Trevisana). Al legn doperà de solito al era roro, castegner, laress. Tra i pjoi de solito ghe n'era scale normai o a pecoi. La ranpa de scale che tochea tera comunque la era senpre de pjera. La ringhiera la era senpre fata del isteso legn del pjol, co elementi verticai a base esagonal. fea ecesion solche serti paeset de montagna aonde che al legn al costea poch, sichè la zent la podea permeterse anca de far ringhiere de tole decorade. Inte le case moderne la funsion dei pjoi la se ga redusest forte. De solito i gnen fati de cimento a sbals e de dimension pisole parchè le norme edilisie le tende a scorajarli e parchè i representa an elemento pericoloss par la trasmision del calor.
Altri progeti
[canbia | canbia el còdaxe]Wikimedia Commons el detien imàjini o altri file so Balcon
Controło de autorità | LCCN (EN) sh85011151 · GND (DE) 4130867-0 · BNF (FR) cb12273807k (data) · BNE (ES) XX540478 (data) |
---|