Nubia
![](http://upload.wikimedia.org/wikipedia/commons/thumb/e/ea/Nubia_today.png/220px-Nubia_today.png)
La Nubia la xe na region a caval de el sud de l’Egito e del nord Sudan. Ne i tempi antichi la Nubia la xe sta on regno indipendente e anca parte de l’Egito. Ne i tempi de la nostra era, la Nubia la xera divisa in tre regni cristiani fin a l’arivo de l’Islam. El nome de la Nubia el vien da l’egisiano antico nub, che vol dir oro.
Storia
[canbia | canbia el còdaxe]Da i ricatamenti archeologici se sa che inte la region ciamà Nubia le ghera varie popolasion anca prima del Neolitico. Megaliti a Nabta Playa i xe esempi de i pi veci strumenti de misurasion astronomica, pi veci de Stonehenge de almanco 1000 ani. La prima cultura che se conose da i ricatamenti la xe ciamada Grupo-A. Contemporanea de la cultura Naqada de l’antico Egito, la se pol datar del 3800 a.c. Da i ogeti del 3300 a.C. se pol pensar che la Nubia la xera n’entità politega unica che la gavea on contato continuo co l’Egito. El Grupo-A ga perso el control de la region verso el 2800, co se vede l’arivo del Grupo-B. Na olta se pensaa che el Grupo-B el fuse formà da zente che la gavea invaso la Nubia. Ancò i studiosi i dixe che el Grupo-B el xera formà da i disendenti del Grupo-A, ma che i xera pi poareti a causa de le invasion egisiane.
El Grupo-B el xe stà bon de far cresar el marcà co i egisiani. En tel XXIV secolo, oro, avorio, incenso, e animali de l’Africa tropicale i xera portà in Egito pasando par la Nubia. El comercio el ga dato stabilità e richeza a i nubiani, che i se xera divisi in picoli Stati autonomi. I archeologi i parla de sti nubiani come el Grupo-C.
![](http://upload.wikimedia.org/wikipedia/commons/thumb/b/b2/NubianPharoahs.jpg/220px-NubianPharoahs.jpg)
Durante el Regno de Meso (2040-1640 a.C.), i egisiani ga costruio vari forti longo el Nilo par controlar la trata comerciale. I egisiani se contentava de controlar el pasagio de le merci, e gavea on bon raporto co la popolasion locale. I nubiani del Grupo-C i sa organizà e fondà el Regno de Kerma, da el nome de la cavedal. Inte el 1750 a.C. i re de Kerma xera boni de costruir na cavedal co grose struture de matoni crui. I fabri e i fabricadori de vasi xera pi bravi de i egisiani. El regno de Kerma se sa oposto al poder egisiano con suceso. Xe solo co el faraon Thutmose I che l’Egito xe stà bon de piegare el regno de Kerma e de anetere tuta la Nubia (1520 a.C.).
Quando l’influensa egisiana xe diminuida, la cultura ga continuà a influensar la vita de la Nubia. Se conta piassé piramidi in Nubia che in Egito. En tel VIII secolo, Piye - re de Kush (antico nome de le Nubia) - ga invaso l’Egito. Par on secolo, i faraoni xera neri nubiani, finché i asiri ga invaso l’Egito e parà indrio le forse nubiane.
Meroe
[canbia | canbia el còdaxe]![](http://upload.wikimedia.org/wikipedia/commons/thumb/e/e6/NubianMeroePyramids30sep2005%282%29.jpg/220px-NubianMeroePyramids30sep2005%282%29.jpg)
A 200 km a nord de Khartoum se cata le roine de Meroe. Meroe (800 a.C. – 350 d.C.) xera la cavedal del novo regno de la Nubia. Le dinastie meroane ga svilupà la so scritura, prima a partir da i geroglifici egisiani, e dopo usando 23 letere de loro invension. I soldai de Meroe xe stà boni de tegnar lontan Alesandro el Grande e i romani. Ma ga dovesto ripiegare soto l’ataco de Ezana, re de l’Etiopia. El dominio etiopico xe ndà scomparendo co l’arivo de i noab, on popolo che vegnea da el Darfur o forse da el Kordofan de ancò. Da qua el nome Nobatia che i romani usava par stà region.
Cristianità
[canbia | canbia el còdaxe]Dopo la partensa de i etiopici, la Nubia la sa organisà in tre regni: Nobatia, con cavedal a Pachoras; Makuria, con cavedal a Dongora; e Alodia, con cavedal a Soba. En sti ani, el cristianesimo xe rivà da l’Egito. Se tratava de na forma monofisita (che credea in ona sola natura de Cristo). L’evangelizasion de la region xe ndà vanti par tre secoli.
En tel VII secolo, co le trupe islamiche ga ocupà l’Egito, el re de Makuria xe stà bon de fermare l’avanzata islamica a sud. Par sie secoli, i musulmani no ga podesto penetrar la region. L’influensa islamica xe penetrà on poco a la olta co i marcanti. En tel 1350, la catedral de Dongola la xe stà trasformà in na moschea, segno che la religion islamica xera diventà la vera forsa del regno de Makuria. On secolo dopo, el regno de Makuria xe diventà parte de l’Egito. A sud de Makuria, Senanr ga resistio par altri dozento ani, prima de cascar soto l’influensa egisiana.
Co l’indipendensa de l’Egito e del Sudan, la Nubia la xe stà divisa tra i do paexi. Ancò se cata Nubiani al Cairo come a Khartoum. I studi su le vecie cavedali nubiane xe stà portà avanti dal studioso veronexe padre Giuseppe Vantini.
Wikimedia Commons el detien imàjini o altri file so Nubia
Controło de autorità | VIAF (EN) 127854022 · LCCN (EN) n81103291 · GND (DE) 4042734-1 · WorldCat Identities (EN) n81-103291 |
---|