Үле диңгез
Үле диңгез (яһүд. ים המלח Ям хa-мэлах — «Тоз диңгезе»; гарәп. البَحْر المَيّت ’Әл-Бахр әл-Мәййит — «Үлек диңгез»; шулай ук Асфальт диңгез, Содом диңгезе) – Гарәбстан ярымутравында урнашкан, башка сулыклар белән тоташмаган тозлы күл. Әлеге урын диңгез тигезлегеннән 427 метр аста.[3][4] Коры климат Үле диңгезнең елдан-ел саегуына китерә, тагын да минеральләштерә. Уртача бер елга суы 1 метрга кими. Үле диңгез ярлары –диңгез кимәлленнән дөньяда иң түбән урын булып тора. Исраил, Фәлистыйн автономиясе һәм Үрдүн биләмәләрен бүлеп тора. Планетада кеше сәламәтлеге өчен иң файдалы, иң тозлы сулык дип исәпләнә.
Атамасы
[үзгәртү | вики-текстны үзгәртү]Йөзләрчә ел дәвамында аны “Сасыган диңгез” һәм “Шайтаннар диңгезе” дип тә йөрткәннәр. Бернинди үсемлек тә үсмәгән, җан иясе дә яши алмый (кайбер бактерияләрдән кала) торган күлне римлеләр Үле күл дип атаган.
Суның сыйфатламасы
[үзгәртү | вики-текстны үзгәртү]Акмый торган бу тозлы күлнең озынлыгы – 76, иңе 17 чакрым, тирәнлеге 356 метрга җитә. Аның суындагы тозларның концентрациясе диңгез суындагыдан берничә тапкыр артык. Күлдә Менделеев таблицасындагы күпчелек матдәләр бар, суның уртача тозлылыгы 260-270 промиллега, кайбер елларда әлеге күрсәткеч 310га җитә.
Тозлар (алар нигездә — кальций, натрий һәм магний хлориды) Үле диңгезгә Иордан елгасыннан һәм чишмәләрдән агып төшә. Якынча исәпләүләргә караганда, бары тик Иордан елгасы гына диңгезгә кеше ышанмастай күләмдә — елына 850000 тонна тоз агыза. Диңгез шулай бик түбәндә урнашканга су аннан беркая да агып китә алмый һәм ул бары тик парга гына әйләнә. Көн озынында атмосферага җиде миллион тонна пар күтәрелә. Бу инде диңгезнең ни өчен зураймавын аңлатуга да җавап. Су парга әйләнә, ә тоз һәм минераллары утырып кала. Үле диңгез — дөньяда иң тозлы сулык. Тоз концентрациясе 30 процентка җитә, ягъни океан суындагыдан берничә тапкырга күбрәк. Әйтергә кирәк, бу диңгездә бактерияләрдән башка бер генә җан иясе дә юк. Үле диңгез — җансыз, әмма аңа якын урында тулы тормыш кайный. Тропик үсемлекләр дөньясы, куәтле су шарлавыклары белән гаҗәеп матур урыннар бар.
Дәвалау сыйфатлары
[үзгәртү | вики-текстны үзгәртү]Борынгылар диңгез суын эчәргә тырышкан. Файдалы дип исәпләгәннәр. Хәзер ул тыела. Үле диңгез суы тәнне дәвалый, чистарта, диләр. Бу диңгез янәшәсендә савыктыру комплекслары эшли. Ә аның бик түбәндә урнашуы атмосферада әче тудыргыч күләменең артуына китергән. Минеральләштерелгән ләм һәм күкертле су чыганаклары төрле авырулардан дәвалый. Үле диңгез буенда төрле дәвалану үзәкләре эшли.
«Асфальт күл»
[үзгәртү | вики-текстны үзгәртү]Югарыда Үле диңгезне “әсфәлт күле” дип йөрткәннәрен телгә алган идек. Диңгездәге иң гаҗәп күренеш шул — вакыт-вакыт су астыннан битум (әсфәлт) кисәкләре калкып чыга. Кайберәүләр бу хәлне җир тетрәү вакытында диңгез төбендәге битум ватылып чыга, дип аңлата. Ләкин икенче фараз ныграк ышандыра төсле: әсфәлт кисәге диңгез төбендәге яргаланган урыннардан тоз катламы белән бергә чыга һәм тоз эреп бетү белән әсфәлт кисәкләре өскә калка. Борын заманнардан ук кешеләр битумны куллана белгән. Төзелештә генә түгел, кешеләрне мумияләштергәндә дә файдаланылган.
Кызыклы фактлар
[үзгәртү | вики-текстны үзгәртү]Үле диңгездә батырга мөмкин түгел.
Искәрмәләр
[үзгәртү | вики-текстны үзгәртү]- ↑ https://data.gov.il/dataset/https-www-data-gov-il-dataset-683/resource/823479b4-4771-43d8-9189-6a2a1dcaaf10
- ↑ https://eleven.co.il/land-of-israel/geography/12728/
- ↑ Dead Sea Level Data Summary 2012
- ↑ Water Authority of Israel, archived from the original on 2013-05-23, retrieved 2013-06-09
Чыганаклар
[үзгәртү | вики-текстны үзгәртү]- О. Төхфәтуллин. Тозлы суныњ да сере бар // Кызыл таң.
- Чит җирләрдә йөреп гыйбрәт ал (Чит җирләрдә йөреп гыйбрәт ал) / Тәлгат НӘҖМИЕВ / – № 54 (11533), 30 октябрь, 2010 2016 елның 9 март көнендә архивланган.