ಪುರಂದರದಾಸೆರ್

ಪುರಂದರ ದಾಸರು
ಪುರಂದರ ದಾಸರು
Personal
ಪುಟ್ಟು	ಶ್ರೀನಿವಾಸ ನಾಯಕ; 1470; Kshemapura, near ತೀರ್ಥಹಳ್ಳಿ, ಶಿವಮೊಗ್ಗ, ಕರ್ನಾಟಕ
ತೀರಿನ	2 January 1565 (Saturday); Hampi, Karnataka, India
ಧರ್ಮ	ಹಿಂದೂ
Occupation	Carnatic Vocalist, scholar, Saint, poet, composer
Philosophy	Dvaita, Vaishnavism
Senior posting}
ಗುರು	Vyasatirtha

ಶ್ರೀ ಪುರಂದರ ದಾಸೆರ್ (೧೪౭౦–೧೫೬೪) ಕರ್ನಾಟಕ ಸಂಗೀತ ಪದ್ಧತಿದ ಪಿತಾಮಹೆರ್ ಪಂಡ್ದ್ ಪುದರ್ ಮಲ್ತ್‌ದೆರ್. ದಾಸ ಪದ್ಧತಿದ ಅನೇಕ ಪ್ರಮುಕೆರ್. ಮುಖ್ಯವಾದ್ ಪುರಂದರದಾಸ, ಶ್ರೀಪಾದರಾಯ, ಕನಕದಾಸ, ಜಗನ್ನಾಥ ದಾಸ, ವಿಜಯ ದಾಸ ಬೊಕ್ಕ ಕಮಲೇಶ ವಿಠ್ಠಲ ಮೊಕುಲು ಸಂಗೀತದ ಮೂಲಕ ಭಕ್ತಿಮಾರ್ಗೊನು ಭೋಧಿಸಾಯೆರ್. ಪುರಂದರದಾಸೆರೆನ್ ಮಾತಾ ಕೀರ್ತನೆಲು ಪುರಂದರ ವಿಠ್ಠಲನ್ (ವಿಷ್ಣು) ನಮಿಸಾದ್ ಮುಗಿಯುಂಡು. ಸಾರಸಾರ ಕೀರ್ತನೆಲೆನ್ ರಚನೆ ಮಲ್ತಿನ ಪುರಂದರದಾಸೆರೆನ ಸುಮಾರ್ ೧೦೦೦ ಕೀರ್ತನೆಲು ಇತ್ತೆಲಾ ಬಳಕೆಡ್ ಉಂಡು.

ಜೀವನ

ವಿಶ್ವವಿದ್ಯಾನಿಲಯ ವಿಶ್ವಕೋಶ/ ಪುರಂದರದಾಸರು

ಪುಟ್ಟು

ಮೆರೆನ ದುಂಬುದ ಪುದರ್ ಶ್ರೀನಿವಾಸ ನಾಯಕ, ಅಮ್ಮೆರ್ ವರದಪ್ಪನಾಯಕೆರ್, ಅಪ್ಪೆ ಲಕ್ಷ್ಮಿದೇವಿ. ಪುರಂದರದಾಸೆರೆನ ಅಮ್ಮೆರ್ ವರದಪ್ಪ ನಾಯಕೆರ್ ಲೇವಾದೇವಿ ವೃತ್ತಿ ಮಲ್ತೊಂದು ಇತ್ತೆರ್. ಮಸ್ತ್ ವರ್ಸೊ ಕಾಲ ಜೋಕುಲು ಆವಂದೆ ಇತ್ತ್‌ನೆರ್ದ್‌ ತಿರುಪತಿ ಶ್ರೀನಿವಾಸಗ್ ಪ್ರಾರ್ಥನೆ ಸಲ್ಲಿಸಯೆರ್ ಅಯಿರ್ದ್ ಬೊಕ್ಕ ಅರೆಗ್ ಬಾಲೆ ಆಂಡ್ ಪನ್ಪುನವು ನಂಬಿಕೆ. ಮೇರ್ ನಾಯಕ ಜನಾಂಗದಾರ್ ಆಯಿನೆರ್ದಾವರ ಆರ್ ಮಗಕ್ಕ್ ಶ್ರೀನಿವಾಸ ನಾಯಕ ಪನ್ಪುನ ಪುದರ್‌ನ್ ದೀಯೆರ್.

ಪುಟ್ಟ್‌‍ನ ಜಾಗೆ

ಆರಗ, ತೀರ್ಥಹಳ್ಳಿ ತಾ|| ಶಿವಮೊಗ್ಗ ಜಿ||

ಉಂದೆಕ್ಕ್ ದುಂಬು ಮಹಾರಾಷ್ಟ್ರದ ಪುರಂದರಗಢ ಪುರಂದರದಾಸೆರೆನ ಪುಟ್ಟ್‌ನ ಜಾಗೆ ಪಂದ್‌ ನಂಬುದು ಇತ್ತೆರ್. ಆಂಡ ಕರ್ನಾಟಕ ಸರ್ಕಾರ ಹಿರಿಯ ಸಂಗೀತಗಾರೆ ಆರ್.ಕೆ. ಪದ್ಮನಾಭ, ಕರ್ನಾಟಕ ಸರ್ಕಾರದ ಮಾಜಿ ಮಂತ್ರಿ ಲೀಲಾದೇವಿ ಆರ್. ಪ್ರಸಾದ್, ಹಿರಿಯ ವಿದ್ವಾಂಸೆರಾಯಿನ ಎ.ವಿ. ನಾವಡ, ವೀರಣ್ಣ ರಾಜೂರ ಬೊಕ್ಕ ಅರಳುಮಲ್ಲಿಗೆ ಪಾರ್ಥಸಾರಥಿ ಅಕುಲೆನ್ ಸೇರಾದ್ ಒಂಜಿ ತಂಡ ರಚಿಸಾದ್ ಪುರಂದರದಾಸೆರೆ ಜನ್ಮಸ್ಥಳತ್ತ ಬಗೆಟ್ಟ್ ವರದಿ ಕೊರ್ಪುನಂಚ ಕೇನೊಂದು ಇತ್ತ್ಂಡ್. ಈ ತಂಡೊಗು ಶಿವಾನಂದ ವಿರಕ್ತಮಠ ಮೇರ್ ಸಂಚಾಲಕೆರಾದ್ ಇತ್ತೆರ್.

ಈ ತಜ್ಞೆರೆನ ವರದಿದ ಪ್ರಕಾರ ಪುರಂದರಗಢ ಪನ್ಪುನವು ಪುರಂದರ ಪನ್ಪುನ ಪುದರ್‌ಡ್ ಊರುದ ಪುದರ್‌ಡ್ ಮಾತ್ರ ಇತ್ತ್‌‍ದ್ ಪುರಂದರ ದಾಸೆರೆನ ಕುರಿತಾಯಿನ ಓವ್ವೇ ಐತಿಹಾಸಿಕ-ಸಾಂಸ್ಕೃತಿಕ ದಾಖಲೆಲು ತೋಜಿದ್ ಬರ್ಪುಜಿ. ತೀರ್ಥಹಳ್ಳಿ ತಾಲೂಕುದ ಆರಗ ಊರು ಪುರಂದರ ದಾಸೆರೆನ ಕುರಿತಾದ್ ಹಲವು ಐತಿಹಾಸಿಕ ಸಾಕ್ಷ್ಯೊಲೆನ್ ಹೊಂದ್‌ದ್ ಆರಗನೇ ಪುರಂದರ ದಾಸೆರೆನ ಜನ್ಮಸ್ಥಳ ಪಂಡ್‌ದ್ ಕರ್ನಾಟಕ ಸರ್ಕಾರೊಗು ೨೦೧೮ಟ್ ವರದಿ ಸಲ್ಲಿಸದ್ಂಡ್.

ವೈರಾಗ್ಯ

ಶ್ರೀನಿವಾಸ ನಾಯಕೆ ಪ್ರಾಯೊಗು ಬತ್ತಿ ಬೊಕ್ಕ ಅಮ್ಮೆರ್ ಮಲ್ತೊಂದು ಇತ್ತ್‌ನ ವೃತ್ತಿನೇ ದುಂಬುವರಿಸಾಯೆ. ಆಂಡ ಅತ್ಯಂತ ಜಿಪುಣೆ ಪಂದ್ ಪುದರ್ ಪಡೆಯಿನ ಶ್ರೀನಿವಾಸೆ, ಅಮ್ಮೆ ಅಸ್ವಸ್ಥೆರಾಯಿನಪಗಲಾ ದುಡ್ಡು ಖರ್ಚಿ ಮಲ್ಪೆರೆ ಬಲ್ಲಿ ಪಂಡ್‌ದ್ ತಡೆಯೆಗೆ. ಶ್ರೀನಿವಾಸನ ಬುಡೆದಿ ಸರಸ್ವತಿ, ದಾನಶೀಲೆಯಾದ್, ಪತಿನ ಕೋಪ ಅಲೆನ ಮಿತ್ತ್ ಬೂರೊಂದು ಇತ್ತ್ಂಡ್ ಪಂದ್ ತೂಯಿನಕುಲು ಪನೊಂದು ಇತ್ತೆರ್. ಅಕುಲೆನ ಸಂಸಾರ ಮೂಲತಃ ಪಂಡರಾಪುರ/ಪಂಡರಾಪುರೊಟ್ಟು ಇತ್ತ್ಂಡಲಾ ಶ್ರೀನಿವಾಸೆ ಬೊಕ್ಕದ ವರ್ಸೊಲೆಡ್ ಹಂಪೆಡ್ ಇತ್ತ್‌ನಂಚ ತೋಜಿದ್ ಬರ್ಪುಂಡು.

ಐತಿಹ್ಯ

ವಿಠ್ಠಲ (ವಿಷ್ಣು) ಬಡ ಬ್ರಾಣನ ವೇಸೊಡು ಒರ ಶ್ರೀನಿವಾಸನ ಅಂಗಡಿಗ್ ಬತ್ತ್‌ದ್ ಮಗನ ಉಪನಯನೊಗು ದುಡ್ಡು ಬೋಡು ಪಂಡ್‌ದ್ ಬೇಡೊನುವೆಗೆ. ಜಿಪುಣೆ ಶ್ರೀನಿವಾಸೆ ಪ್ರತಿ ದಿನಲಾ ಮನದಾನಿ/ಎಲ್ಲೆ ಬಲ ಪಂಡ್‌ದ್ ಪನೊಂದು ಇತ್ತೆ, ಇಂಚನೆ ಪಂಡ್‌ದ್ ಆಜಿ ತಿಂಗೊಲು ಕಾಲ ದುಂಬು ಪಾಡಿಯೆಗೆ. ಕಡೆಕ್‌ ಬ್ರಾಣನ ಕಾಟ ತಡೆಯೆರೆ ಆವಂದೆ ಒಂಜಿ ಸವಕಲ್ ನಾಣ್ಯೊನು ಕೊರಿಯೆಗೆ. ವಿಠ್ಠಲೆ ಇತ್ತೆ ಶ್ರೀನಿವಾಸನ ಇಲ್ಲಗ್ ಪೋದ್ ಆಜಿ ತಿಂಗೊಲು ಕಾಲ ಒರಿ ವರ್ತಕೆ ಎನನ್ ಸತಾಯಿಸದ್ ಕಡೆಕ್ ಈ ಸವಕಲ್ ನಾಣ್ಯೊನು ಕೊರ್‌ನ ಕತೆನ್ ಪಂಡೆಗೆ. ಮನದಾನಿ ಅವ್ವೇ ಬ್ರಾಣೆ ಇಲ್ಲಗ್ ಬತ್ತ್‌ದ್ ಸರಸ್ವತಿಡ ಎನ್ನ ಮಗನ ಉಪನಯನ ಉಂಡು ಎಂಕ್ ದಾದಂಡಲಾ ಸಹಾಯ ಮಲ್ಪೊಡು ಪಂದ್ ಕೇನೊನುವೆ. ಸರಸ್ವತಿ ಬೇಜಾರ್‌ಡ್‍ ಎನಡ ಕೊರಿಯೆರೆ ದಾಲಾ ಇಜ್ಜಿ. ಎನ್ನ ದುಡ್ಡು ಆಭರಣೊಲು ಮಾತಲಾ ಎನ್ನ ಕಂಡನಿಡ ಉಂಡು. ಅರೆನ ಅನುಮತಿ ಇಜ್ಯಂದೆ ದಾಲಾ ಕೊರಪುನ ಪರಿಸ್ಥಿತಿಡ್ ಯಾನ್‍ ಇಜ್ಜಿ ಪಂಡ್‌‍ದ್ ಬಾರೀ ಬೇಜಾರ್ ಮಲ್ತೊಂಡಲ್. ಆಪಗ ಆ ಬ್ರಾಣೆ ನಿನ್ನ ಅಪ್ಪೆ ಇಲ್ಲರ್ದ್ ನಿಕ್ಕ್ ಕೊರ್‌‍ನ ಮೂಂಕುತ್ತಿದ ಮಿತ್ತ್ ನಿನ್ನ ಅಧಿಕಾರ ಉಂಡು. ಅಯಿನೇ ಎಂಕ್‌ ಕೊರ್ ಪಂದ್ ಪನ್ನಗ, ಆಲ್‌ ಆಯಗ್‌ ಅಲೆನ ಮೂಂಕುತ್ತಿನ್ ದೆತ್ತ್‌ದ್ ಕೊರ್ಪಲ್. ಬ್ರಾಣೆ ಅಪಗನೇ ಆ ಮೂಂಕುತ್ತಿನ್‍ ಪತೊಂದು ಶ್ರೀನಿವಾಸನ ಅಂಗಡಿಗ್ ಕೊನೊದು ಅಯಿನ್‌ ಅಡವು ದೀಯೆರೆ ಪ್ರಯತ್ನ ಮಲ್ಪುವೆ. ಶ್ರೀನಿವಾಸ ಆ ಮೂಂಕುತ್ತಿನ್ ಗುರ್ತ ಪತ್ತುವೆ, ದುಡ್ಡುಗು ಎಲ್ಲೆ ಬಲ ಪಂಡ್‌ದ್ ಬ್ರಾಣಗ್ ಪನ್ಪೆ. ಆ ಮೂಂಕುತ್ತಿನ್‌ ಒಂಜಿ ಡಬ್ಬಿದ ಉಲಯಿ ದೀದ್ ಅಪಗನೇ ಇಲ್ಲಡೇ ಬರ್ಪೆ. ಇಲ್ಲಗ್ ಬತ್ತ್‌ನಾಯೆ ಬುಡೆದಿನ್ ಲೆತ್ತ್‌ದ್ ನಿನ್ನ ಮೂಂಕುತ್ತಿನ್ ಎಂಕ್ ತೋಜಾಲಾ ಪಂದ್ ಪನ್ಪೆ. ಪೋಡಿದ್‌ ಪೋಯಿನ ಬುಡೆದಿ ಮೀನಗ ದೆತ್ತ್‌ ದೀದ್‌ ಇತ್ತೆ ಕನಪ್ಪೆ ಪಂದ್‌ ಉಲಯಿ ಪೋದ್, ಮೀಪುನ ಕೋಣೆಡ್ ವಿಷ ಪರಿಯೆರೆ ಪ್ರಯತ್ನ ಮಲ್ಪುನಗ ಅಲೆನ ವಿಷತ್ತ ಬಟ್ಟಲ್‌ದ ಉಲಯಿ ಮಿತ್ತ್‌‍ರ್ದ್ ಮೂಂಕುತ್ತಿ ಬೂರ್ಂಡ್‌‍ಗೆ. ಅಯಿನ್ ಕನತ್ತ್‌ದ್‌‍ ಶ್ರೀನಿವಾಸಗ್ ಕೊರ್ಪಲ್. ಅಂಗಡಿಗ್ ಪಿರ ಬತ್ತ್‌ದ್ ಶ್ರೀನಿವಾಸೆ ಡಬ್ಬಿದ ಉಲಯಿ ದೆತ್‌ದ್ ದೀತ್‌ನ ಮೂಂಕುತ್ತಿ ಅಲ್ಪ ಇಜ್ಯಂಡ್‌ಗೆ. ಆಪಗ ಶ್ರೀನಿವಾಸಗ್ ಬತ್ತ್‌ನ ಬ್ರಾಣೆ ಬೇತೆ ಏರ್‌ಲಾ ಅತ್ತ್, ಎನನ್ ಪರೀಕ್ಷೆ ಮಲ್ಪರೆ ಸ್ವತಃ ನಾರಾಯಣನೇ ಬ್ರಾಣನ ವೇಷೊಡು ಬತ್ತ್‌ಧ್‌ನೆ ಪನ್ಪುನ ವಿಷಯೊ ತೆರಿಪುಂಡು, ಆಯಿರ್ದ್ ಆಯಗ್ ಆಯನ ಬಗೆಟ್ಟೆ ನಾಚಿಕೆ ಆಪುಂಡು. ಶ್ರೀನಿವಾಸೆ, ತನ್ನ ಶ್ರೀಮಂತಿಕೆಲೆನ್ ಪೂರ ಬುಡ್‌ದ್ ಹರಿದಾಸೆ ಆಪುನ ನಿರ್ಧಾರೊನು ದೆತೊನುವೆ. ದೇವೆರ್ ಸಾದಿ ತೋಜಾಯಿನೆತ ಬಗೆಟ್ಟ್ ಕೃತಜ್ಞತೆಗಾದ್ ತನ್ನ ಬುಡೆದಿನ ಜ್ಞಾಪಕಾರ್ಥವಾದ್ ಒಂಜಿ ಕೀರ್ತನೆನ್ ಪುರಂದರದಾಸೆ ಆದ್‍ ಬದಲಾಯಿನ ಶ್ರೀನಿವಾಸೆರ್ ರಚಿಸದೆರ್. ಬೊಕ್ಕ ಶ್ರೀನಿವಾಸ ನಾಯಕೆ ಪುರಂದರದಾಸ ಪನ್ಪುನ ಪುದರ್‌ನ್ ಪಡೆಪೆರ್.

ಅರೆನ ಬುಡೆದಿನ ನೆಂಪುಗಾತ್ರ ರಚಿಸಯಿನ ಕೀರ್ತನೆ

ಆದದ್ದೆಲ್ಲ ಒಳಿತೆ ಆಯಿತು
ರಚನೆ: ಶ್ರೀ ಪುರಂದರದಾಸರು
ರಾಗ : ಪಂತುರಾವಳಿ ; ತಾಳ : ಆದಿತಾಳ

ಆದದ್ದೆಲ್ಲ ಒಳಿತೆ ಆಯಿತು ನಮ್ಮ
ಶ್ರೀಧರ ಸೇವೆ ಮಾಡಲು ಸಾಧನ ಸಂಪತ್ತಾಯಿತು;

ದಂಡಿಗೆ ಬೆತ್ತ ಹಿಡಿಯೊದಕ್ಕೆ
ಮಂಡೆ ಮಾಚಿ ನಾಚುತಲಿದ್ದೆ
ಹೆಂಡತಿ ಸಂತತಿ ಸಾವಿರವಾಗಲಿ
ದಂಡಿಗೆ ಬೆತ್ತ ಹಿಡಿಸಿದಳಯ್ಯ

ಗೋಪಾಳ ಬುಟ್ಟಿ ಹಿಡಿಯೊದಕ್ಕೆ
ಭೂಪತಿಯಂತೆ ಗರ್ವಿಸುತಿದ್ದೆ
ಆ ಪತ್ನೀ ಕುಲ ಸಾವಿರವಾಗಲಿ
ಗೋಪಾಳ ಬುಟ್ಟಿ ಹಿಡಿಸಿದಳಯ್ಯ

ತುಳಸಿ ಮಾಲೆ ಹಾಕುವುದಕ್ಕೆ
ಅರಸನಂತೆ ನಾಚುತಲಿದ್ದೆ
ಸರಸಿಜಾಕ್ಷ ಪುರಂದರ ವಿಠ್ಠಲ
ತುಳಸಿ ಮಾಲೆ ಹಾಕಿಸಿದನಯ್ಯ

ಕವಿ ಬೊಕ್ಕ ಸಂಗೀತಗಾರೆ

ಪುರಂದರದಾಸೆರೆನ ಪದೊಕುಲುಲೆನ ಪ್ರಾಸ ಬೊಕ್ಕ ಅರ್ಥೊಡು ಶ್ರೀಮಂತವಾದ್ ಉಂಡು. "ಕುದುರೆ ಅಂದಣ ಆನೆ ಬಯಸೋದು ನರಚಿತ್ತ
ಪಾದಚಾರಿ ಆಗೋದು ಹರಿ ಚಿತ್ತವಯ್ಯ"

ಪುರಂದರದಾಸೆರೆನ ಪದೊಕುಲು ದುಂಬುಗು ಕರ್ನಾಟಕ ಸಂಗೀತ ಪದ್ಧತಿದ ಬುನಾದಿ ಆಂಡ್. ಶಾಸ್ತ್ರೀಯ ಸಂಗೀತೊನು ಶ್ರೀ ಸಾಮಾನ್ಯಗ್ ಪರಿಚಯ ಮಲ್ತ್‌ದ್‍ಕೊಡಲು ಯತ್ನಿಸಿದ ಪುರಂದರದಾಸೆರ್ ಮಾಯಾಮಾಳವಗೌಳ ರಾಗೊರ್ದು ಪತ್‌ದ್ ಪೊಸಬೆರೆಗ್ ಶಾಸ್ತ್ರೀಯ ಸಂಗೀತೊನು ಕಲ್ಪಾದ್ ಕೊರಪುನ ಸಾದಿದ ಬಗೆಕ್ ಯೋಚಿಸಿಯೆರ್. ಇತ್ತೆಲಾ ದಕ್ಷಿಣ ಭಾರತೊದ ಶಾಸ್ತ್ರೀಯ ಸಂಗೀತದ ಪಾಠೊಲು ಪುರಂದರದಾಸೆರೆನ ಸರಳೆ, ಜಂಟಿ ವರಸೆಲೆನೊಟ್ಟುಗು ಸುರು ಆಪುಂಡು. ಪುರಂದರದಾಸೆರೆನ 'ಪಿಳ್ಳಾರಿ ಗೀತೆಲು' (ಉದಾ: ಲಂಬೋದರ ಲಕುಮಿಕರ...., ಕೆರೆಯ ನೀರನು ಕೆರೆಗೆ ಚೆಲ್ಲಿ.....ಇಂಚಿತ್ತಿನವು) ಸಂಗೀತದ ಸ್ವರ- ಸಾಹಿತ್ಯ- ತಾಳೊಲೆನ ಸಂಯೋಜನೆನ್ ಅಭ್ಯಾಸ ಮಲ್ಪೆರೆ ಸುರುತ ಮೊಟ್ಟು. ಕರ್ನಾಟಕ ಶಾಸ್ತ್ರೀಯ ಸಂಗೀತದ ತ್ರಿಮೂರ್ತಿಲೆಡಗ ಒರಿ ಆಯಿನಂಚಿನ ಶ್ರೀ ತ್ಯಾಗರಾಜೆರ್ ಅರೆನ "ಪ್ರಹ್ಲಾದ ಭಕ್ತಿ ವಿಜಯಮ್" ಪನ್ಪುನ ಲೇಖನೊಡು ಶ್ರೀ ಪುರಂದರ ದಾಸೆರೆನ್ ಅರೆನ ಸಂಗೀತ ಗುರುಕುಲು ಪಂದ್ ಪಂಡೊಂದೆರ್. ಹರಿನಾಮಸ್ಮರಣೆದ ರೂಪೊಡು ರಚಿಸಯಿನ ಅರೆನ ಕೃತಿಕುಲು ದೇವೆರೆನಾಮಲು ಆದ್ ಪ್ರಸಿದ್ಧವಾದ್ ಉಂಡು. ಅರೆನ ಹರಿಭಕ್ತಿ ಬೊಕ್ಕ ಸಂಗೀತೊಡು ಉಪ್ಪುನ ಪಾಂಡಿತ್ಯ ಕನ್ನಡ ಸಾಹಿತ್ಯೊಡೇ ವಿಶಿಷ್ಟವಾಯಿನ ಸ್ಥಾನೊನು ಪಡೆದ್ ದಾಸ ಸಾಹಿತ್ಯೊನು ಶ್ರೀಮಂತವಾದ್ ಮಲ್ತ್‌ದ್ಂಡ್. ಕರ್ನಾಟಕ ಶಾಸ್ತ್ರೀಯ ಸಂಗೀತದ ಪಿತಾಮಹೆರಾಯಿನ ಪುರಂದರದಾಸೆರೆನ ಸಾಧನೆನ್ ತೂಯಿನ ಸರ್ವೆರ್‌ಲಾ 'ದಾಸೆರ್ ಪಂಡ ಪುರಂದರದಾಸರಯ್ಯಾ..!' ಪಂಡ್‍ದ್ ಪುಗರ್‌ದೆರ್. ಮೆರೆನ ಮಾತ ಕೀರ್ತನೆಲೂ ಕನ್ನಡ ಭಾಷೆಡ್ ಇತ್ತ್‌ದ್, ಭಕ್ತಿ ಮಾರ್ಗೊನು ಜನಸಾಮಾನ್ಯೆರೆಗ್ ಪರಿಚಯ ಮಲ್ತ್‌ದ್ ಕೊರ್ಪುನ ಉದ್ದೇಶೊನು ಹೊಂದ್‌ದ್ ಉಂಡು. ಕರ್ನಾಟಕ ಸಂಗೀತಗಾರೆರೆಡ್ ಪುರಂದರದಾಸೆರೆನ ಕೀರ್ತನೆಲೆನ ಪರಿಚಯ ಇಜ್ಯಂದಿನಕುಲು ಇಜ್ಜಿ ಪಂದೇ ಪನೊಲಿ. ಶ್ರೀ ಪುರಂದರದಾಸೆರ್ ೫ ಲಕ್ಷ ಪದೊಕುಲೆನ್ ರಚನೆ ಮಲ್ಪೊಡು ಪನ್ಪುನ ಉದ್ದೇಶೊನು ದೀವೊಂದು ಇತ್ತೆರ್; ಆರ್ ೪,೭೫,೦೦೦ ಪದೊಕುಲೆನ್ ರಚನೆ ಮಲ್ತ್‌ದ್ ಅವತಾರ ಮುಗಿಸದೆರ್; ಅರೆನ ಮಗೆ ಮಧ್ವಪತಿದಾಸೆರ್ ಒರಿನ ೨೫,೦೦೦ ಪದೊಕುಲೆನ್‌ ರಚನೆ ಮಲ್ತ್‌ದೆ ಪಂದ್ ಪನ್ಪೆರ್.