stjerneteikn

Moderne vestleg astrologi har grunnlaget sitt i prinsippa frå den egyptiske astronomen Klaudios Ptolemaios i år 140 evt., og er dermed baserte på det antikke, geosentriske verdsbiletet (det ptolemeiske verdsbiletet).

Himmellekamane som er av astrologisk betydning, er Sola, Månen, planetane (minus Jorda) og dei rundt 150 synlege stjernene i Dyrekrinsen. Stjernene har blitt inndelte i tolv stjerneteikn som har fått namn etter Dyrekrinsens orientalsk-greske stjernebilete. På norsk heiter dei Vêren (Væren), Tyren, Tvillingane (Tvillingene), Krepsen, Løva (Løven), Jomfrua (Jomfruen), Vekta (Vekten), Skorpionen, Skyttaren (Skytten), Steinbukken, Vassmannen (Vannmannen) og Fiskane (Fiskene).

Sola, Månen og planetane (med unntak av Pluto) beveger seg alltid innanfor Dyrekrinsen, og deira posisjonar i Dyrekrinsen, og i forhold til kvarandre, blir sagt å avgjere naturen på alle gitte tidspunkt.

Dyrekrinsen er ei sone på himmelkula med 18° breidde. Det er 9° på kvar side av ekliptikken, også kalla dyrekrinslinja. Sola, Månen og dei store planetane beveger seg alltid innanfor dette beltet, som er markert av tolv stjernebilete, der sju av desse har dyrenamn, av dette kjem namnet Dyrekrinsen.

I astrologi er stjernebileta i Dyrekrinsen knytte til dei tolv stjerneteikna.

I eldre tider vart ekliptikken inndelt i tolv like store delar på 30° kvar, kalla himmelteikn eller Dyrekrinsens teikn. Ein himmellekams lengd vart markert med talet på grader innanfor eit bestemt teikn. Teikna har same namn og er gitt i same orden som dei tolv stjernebileta som ligg langs ekliptikken.

Dyrekrinsen er av babylonsk opphav, men overlevert oss gjennom grekarane. I byrjinga hadde ein berre nokre få himmelteikn, men etter kvart auka talet, og han fekk truleg den endelege tolvdelinga si på 500-talet før vår tidsrekning (fvt.).

I oldtida fall himmelteikn og stjernebilete saman. På grunn av presesjon (ei langsam endring i retninga til Jordas rotasjonsakse), er stjerneteikna no forskovne slik at til dømes Vêrens teikn ligg i stjernebiletet Fiskane.

Opplistinga under viser kva karaktertrekk, kjønn, temperament, element og herskarplanet kvart av dei tolv stjerneteikna ifølgje astrologiske førestillingar skal representere.

• astrologi
• Dyrekrinsen
• stjernebilete