etnolekt

Etnolekt er ei etnisk gruppe sin felles måte å snakke eit språk på. I Noreg er for eksempel ein etnolekt ein måte å snakke norsk på som blir brukt av ei etnisk gruppe som har (eller har hatt) eit anna felles språk enn norsk.

Ein etnolekt kan ha andrespråktrekk på den måten at den er «farga» av gruppa sitt felles språk, for eksempel når det gjeld uttale av lydar, intonasjon eller val av ord. Men måten ein lærer seg eit andrespråk på er individuell, og resultatet varierer mykje frå person til person. Noko blir rekna som ein etnolekt når

• språktrekka ikkje er individuelle, men like for den etniske gruppa
• språktrekka blir førde vidare til neste generasjon
• bruken av denne varieteten signaliserer gruppetilhøyrsle

I Noreg finst det etnolektar i visse samiske og kvenske miljø, altså nord i landet der det har vore språkkontakt i uminnelege tider. Her kan det for eksempel vere slik at ein brukar ein etnolekt for å signalisere at ein høyrer til samisk/kvensk kultur, sjølv om ein ikkje kan snakke samisk/kvensk. Dette er eit resultat av fornorskinga.

Etnolektar kan også oppstå i innvandrargrupper som har felles språkbakgrunn. Dette er ikkje kjend frå Noreg, men ein kan finne eksempel på det i andre land.

Eit liknande språkleg fenomen er multietnolekt. Dette er ein språkleg varietet som har innslag frå mange ulike språk, og som ikkje er knytt til ei spesiell etnisk gruppe, men til ei gruppe språkbrukarar med ulike språklege og etniske bakgrunnar. Det finst eksempel på multietnolektisk stil i Noreg, særleg blant ungdommar som er barn av innvandrarar, og for eksempel bur på austkanten av Oslo.