Vårt Land

Avisa blei etablert ved slutten av andre verdskrigen av mellom andre Ronald Fangen og Einar Kvale. Mange hadde tenkt og drøymt om å reise ei kristeleg dagsavis i Oslo, og okkupasjonen hadde drive folk inn i kyrkjebenkar og bedehus.

Avisa var eit forsøk på å skape ei kristeleg dagsavis, og lenge var det strid om kva det skulle innebere. Lekmannsrørsle og kyrkjefolk med sprikande syn hadde funne nærmare saman under krigen, men etter frigjeringa melde dei ulike interessene seg. Kinoannonsane blei den store skiljande symbolsaka. Før og under krigen hadde somme funne kristendomen meir liberal enn før. Mellom andre forfattaren Ronald Fangen ønska ein opnare kultur kring trua i Vårt Land, medan professor Ole Hallesby var meir konservativ.

Avisa var snart på randa av samanbrot i strid og økonomi. Vårt Land var lenge berre fire sider, men redaksjonen prøvde likevel å følgje med i verda. Kristendom i konservativ utforming heldt dei redaksjonelle linjene i forsvar, under leiing av redaktøren Bjarne Høye. Redaksjonen sitt bilete om det «normale» skulle verjast mot liberal teologi og kommunisme.

Opplagstalet til Vårt Land sank fram mot byrjinga av 1970-åra. Men frå 1960-åra utvida avisa perspektivet, med ein ny generasjon med nye tonar, moderne journalistikk, ny teknologi, fargar, open debatt og innsyn i konfliktar. På leiarplass fekk etiske og teologiske spørsmål eit større rom, slik at balansen heldt innanfor lesarflokken. I 1981 kom òg kinoannonsane inn i Vårt Land.

Thor Bjarne Bore sin redaktørperiode frå 1974 til 1983 blei prega av meir moderne journalistikk og aukande opplagstal. Vårt Land fekk særleg ord på seg for å vere ein «redaktørskule» i Bore si redaktørtid, etter kvart som fleire av dei dugande medarbeidarane tok over leiinga av andre og større aviser. Den nye generasjonen gjorde Vårt Land til den største kristelege avisa i Noreg i tida etter krigen.

Vårt Land fekk i 1983 tildelt norsk presse si høgaste utmerking, Narvesenprisen, av Norsk Presseforbund. Ved tildelinga blei redaksjonen rost for god utvikling av journalistikk og produkt, trass knappe ressursar.

Med utgangspunkt i Vårt Land er det bygd opp ei mediegruppe som mellom anna omfattar Dagsavisen, Morgenbladet og den svenske avisa Dagen. Konsernet fekk i 2009 namnet Mentor Medier, som tidligare var namnet på eit av datterselskapa.