Stord

Langs grensa mot Fitjar i nordvest går eit belte sørvest–nordaust med harde eruptivbergartar i den kaledonske foldesona (sjå den kaledonske orogenese), hovudsakleg gabbro i sør, grønstein og amfibolitt sentralt og granitt i nord. Her finn ein eit kupert fjellområde, og i granittområdet i nord ligg det høgste fjellet i kommunen, Mehammarsåta (749 meter over havet).

Fjellområdet i nordvest har eit etter måten skarpt skilje mot det småkuperte låglandet i den søraustlege delen av kommunen; dette skiljet fylgjer omtrent ei line fra Sagvåg i sørvest til Agdestein i nordaust. I søraust finst ulike omdanna kambrosiluriske sediment, særleg fyllitt, men også sandstein og konglomerat, likeeins marmor og jaspis, og på Litlabø i sørvest grønstein. Kysten i aust er etter måten jamn, men i sør og vest er det mange bukter og vågar med gode hamner.

På Huglo finn ein mykje av den same type berggrunn som på hovudøya Stord, granitt sentralt på øya og elles spreidde førekomstar av kambrosiluriske sediment langs kysten. Småøyane i sør (Føyno, Nautøya med fleire) består av omdanna kambrosiluriske sediment.

Fyllitten forvitrar lett til god dyrkingsjord, og landskapet søraust i kommunen ligg lunt til for havvindar. Dette gir grunnlag for at krevjande planter som barlind og kristtorn trivst her.

Grønsteinen på Litlabø inneheld mykje svovelkis (sjå pyritt), og fram til 1968 var det drift på denne. På Vikanes ved Sagvåg har det vore marmorbrot, og på Huglo har utvinning av kalkstein vore ei viktig attåtnæring frå 1500-talet.

Det meste av busetnaden er konsentrert til kyststripa i søraust og sør, og her ligg mellom anna dei to tettstadene i kommunen, Leirvik og Sagvåg.

Folketalet i Stord voks særleg sterkt frå midt på 1950-talet og fram til slutten av 1970-åra, i kjølvatnet av den sterke utbygginga av Stord Verft etter at Aker frå 1956 kom inn som medeigar. Sidan har veksten i folketalet vore noko svakare, men har heile tida vore klart positiv. I 2023 var folketalet i kommunen 4,8 gonger høgre enn ved slutten av andre verdskrig. I tiårsperioden 2014–2024 auka folketalet i Stord med gjennomsnittleg 0,5 prosent årleg, mot 0,3 prosent i heile Sunnhordland og 0,6 prosent i Vestland fylke.

Ifylgje definisjonen til Statistisk sentralbyrå er det to tettstader i Stord. Tettstadene er til saman 13,0 km², og omfattar 9 % av arealet i kommunen.

Industri og gruvedrift var hovudnæringa i Stord alt frå tida rundt 1920, og frå 1946 og fram til 1970-åra arbeidde meir enn halvparten av alle busette yrkesaktive i industri/handverk og gruvedrift. Drifta i gruvene på Litlabø nord for Storavatnet tok slutt i 1968. I dag er andelen av arbeidsplassane i kommunen i industri redusert til 25 prosent (2023), 33 prosent dersom ein inkluderer byggje- og anleggsverksemd og kraft- og vassforsyning/renovasjon. Verkstadindustrien er den heilt dominerande industribransjen og omfattar hovudsakleg bygging av skip og oljeplattformar og maskinindustri (2023). Aker Solutions Stord AS, Wärtsilä AS, og Leirvik AS er dei største verksemdene, og desse saman med fleire mindre verksemder i bransjen arbeider for det meste med offshoreinstallasjonar og landanlegg for oljeutvinning.

Aker Stord bygde fram til 1975 supertankarar på inntil 370 000 tonn dødvekt, men då krakket i tankbåtmarknaden kom, gjekk selskapet over til å byggje dekk til dei store produksjonsplattformene i Nordsjøen.

Stord har relativt beskjeden vasskraftproduksjon. Dei fire vasskraftverka i kommunen produserer til saman 11,7 gigawattimer i året (gjennomsnitt 1993-2020). Det største kraftverket er Børtveit (i drift fra 1921), som står for om lag åtti prosent av vasskraftproduksjonen. Andre viktige kraftverk er Lundsæter (1934) og Mehammer II (2005). Sunnhordland Kraftlag er hovudeigar av nesten all vasskraftproduksjonen i kommunen

I 2023 var berre litt over ein prosent av dei busette yrkestakarane i Stord knytt til primærnæringane medan snaut 10 prosent hadde arbeid i varehandel og vel fire prosent i hotell- og restaurantdrift.

Stord har om lag balanse mellom talet på arbeidsplassar og busette yrkestakarar, men kommunen har likevel stor både inn- og utpendling. Av dei busette yrkesaktive i Stord har 31 prosent arbeid utanfor kommunen, seks prosent i dei andre sunnhordlandskommunane, tre prosent i Haugesund-området, fem prosent i Bergen-området og fem prosent i Stavanger-området (2023).

Same året var 24 prosent av dei sysselsette med arbeid i Stord busett i andre kommunar; av innpendlarane kom dette året 17 prosent frå dei andre kommunane i Sunnhordland, to prosent frå Haugesund-området og éin prosent frå Bergen.

Frå samferdsleknutepunktet Leirvik går snøggbåt til sunnhordlandsområdet, Austevoll og Bergen, og det går buss til Haugesund, Stavanger og Bergen. Det er ferjesamband frå Skjersholmane utanfor Leirvik med Ranavik på Halsnøya i Kvinnherad, og samband i helgene med Halsnøya og Borgundøya i Kvinnherad og med Utbjoa i Vindafjord. Frå Jektevik går bilferje til Huglo og til Hodnanes i Tysnes (fylkesveg 49).

På vestsida av Stord går fylkesveg 545 frå Leirvik via Sagvåg til Fitjar, og på austsida går E39 (Aalborg–Kristiansand–Bergen–Trondheim). Ferjesambandet Sandvikvåg–Halhjem på E39 fører over til Bergenshalvøya.

Trekantsambandet opna i 2001 og gjev fastlandssamband på E39 sørover, og dessutan brusamband til Bømlo (fylkesveg 542). Det går føre seg planarbeid for fjordkrysningane av Bjørnafjorden og Langenuen på E39 også nordover mot Bergenshalvøya.

Heilt vest i kommunen ligg Stord lufthamn, Sørstokken, ein kortbaneflyplass med faste avgangar til Oslo.

Stord er eit skulesenter med mellom anna Høgskulen på Vestlandet, avdeling Stord, med ei rekkje utdanningsretningar, mellom anna lærar- og sjukepleiarutdanning. Her er også vidaregåande skule med allmennfag og yrkesfag, likeins folkehøgskule.

Stord sjukehus under det lokale helseføretaket Helse Fonna er eit lokal- og akuttsjukehus med spesialisthelsetilbod innan medisin, kirurgi, røntgen/lab og føde/gynekologi for kommunane i Sunnhordland. I tilknyting til sjukehuset ligg Stord distriktspsykiatriske senter (DPS) som har spesialisthelsetilbod innan psykisk helsevern til vaksne og barn/ungdom.

Avisa Sunnhordland kjem ut i Leirvik tre dagar i veka. Leirvik har elles lokalkontor for NRK. På fjellet Kattnakken (724 meter over havet) er Stord fjernsynssendar.

Stord høyrer til Sør-Vest politidistrikt, Haugaland og Sunnhordland tingrett og Gulating lagmannsrett.

Kommunen er med i regionrådet Samarbeidsrådet for Sunnhordland saman med Austevoll, Bømlo, Etne, Fitjar, Kvinnherad, Sveio og Tysnes.

Stord kommune svarar til dei to sokna Nysæter og Stord i Sunnhordland prosti (Bjørgvin bispedømme) i Den norske kyrkja.

Mot slutten av 1800-tallet høyrde Stord til Søndhordland fogderi i Søndre Bergenhus amt.

I Hystadmarkjo kan ein sjå tolv gravrøyser, nokre av dei har gjeve rike funn frå bronsealderen. Her er også friluftsområde med naturreservat. I Sunnhordlandstunet i Leirvik har Sunnhordland Museum samlingane sine, med ti bygningar frå ulike stader i Sunnhordland, mellom anna Ådlandsstova, ei årestove frå mellomalderen. Her er også ei rik samling gipsmodellar laga av bilethoggaren Torleiv Agdestein (1883–1959) frå Stord. Stord maritime museum på Leirvik har mellom anna ei rik samling motorar.

På Litlabø er det mange interessante spor etter bergverksdrift i perioden 1865–1968. Her finst eit gruvemuseum og eit aktivt venelag for ‘Gruo’.

Sagvåg har ein lang båtbyggjartradisjon. Den høyrer til soga, men reparasjon av båtar held fram.

Stord kyrkje er i pussa tegl og vart bygd i 1857, restaurert i 1957. Utanfor kyrkja blei det i 1950 reist eit minnesmerke i bronse over dei falne under andre verdskrigen, laga av Torleiv Agdestein. Nysæter kyrkje vart reist i 1992. På Leirvik er det kulturhus med bibliotek, kino og symjebasseng.

Stord kommunestyre vedtok i 1997 at Leirvik tettstad skulle ha bystatus.

Kommunevåpenet (godkjent i 1987) har ein kristtorn i gull mot raud bakgrunn; planten er vanleg på øya og er eit kjennemerke for kommunen.

Namnet er opphavleg namn på øya, norrønt Storð med uviss tyding. Det kan ha samanheng med ster- som betyr ‘rage opp‘, og siktar då til dei høgare delane av øya. Namnet kan òg tolkast som ’ungskog, krattskog’, av norrønt storð, ‘ungrenning, ungvokster’, og siktar i så fall til dei søraustlegaste delane av øya.

• Vestland
• Norges geografi

• Stord kommune sine nettsider
• Statistisk sentralbyrå: Kommunefakta Stord

• Bygdebok for Huglo, 1998–2007, to bind
• Høyland, Ola: Stord bygdebok, 1966–1973, tre bind
• Økland, Bård Gram med fleire : Stord frå steinalder til oljealder : Den eldste tida fram til 1720, 2005–2006, tre bind