Stian Grimseth er ein norsk tidlegare vektløftar som deltok i Olympiske leikar to gongar. Han vart utestengd frå leikane i 2000 etter å ha testa positivt for doping. Grimseth tok EM-gull i rykk og har ti kongepokalar i vektløfting. Han konkurrerte for Tambarskjelvar IL i Naustdal i Sogn og Fjordane.
Sidan 2019 har Grimseth vore president i Norges Vektløftarforbund. Han var trenar for OL-vinnar Solfrid Koanda i 2024, og han er leiar for VM i vektløfting i Førde i 2025.
Grimseth var den dominerande vektløftaren i Noreg frå han vann sitt første norske meisterskap i 1993 fram til han la opp på toppnivå etter OL i 2004.
Grimseth slo gjennom med EM-gull i Stavanger i 1996. Han var då Noregs første internasjonale meister i vektløfting sidan Leif Jenssen tok sitt første VM-gull i 1971. Stian Grimseth vart tatt ut til OL tre gongar, men fikk teljande resultat berre éin gong. I 1996 vart han nummer ti samanlagt. I perioden 1995 til 2004 tok han ti kongepokalar på rad.
Grimseth står med dei norske rekordane i tyngste vektklasse for menn, med 195 kilo i rykk og 235 kilo i støt. Begge rekordane er sette i 1999.
Grimseth vart utestengd frå dei olympiske leikane i 2000 etter at han avla positiv dopingprøve med spor av det anabole steroidet nandrolon. Han forklarte dopingprøva med at kosttilskotet Ribose, som han hadde brukt, måtte vere forureina. I 2001 vart Grimseth utestengd i fem månadar av domsutvalet i Noregs Idrettsforbund. Straffa frå Det internasjonale vektløftarforbundet vart på 15 månadar. Han gjekk seinare til søksmål mot produsenten av kosttilskotet, Universal Nutrition. I 2006 inngjkk partane eit forlik, utan at beløpet er offentleg kjent.
Grimseth deltok i OL i 2004, men vart ståande utan resultat etter at han vart skadd under konkurransen.
Grimseth deltok i 2009 i NRK-serien Mesternes Mester, der den tidlegare vektløftaren tok andreplassen bak syklisten Dag Otto Lauritzen.
I april 2016 var han leiar for EM i vektløfting, då arrangementet vart avvikla i Førde og Naustdal. Grimseth er og leiar for den kommande verdsmeisterskapen i vektløfting i Førde i 2025.
Grimseth var trenar for den norske vektløftaren Solfrid Koanda, då ho vart olympisk meister i Paris i 2024.
Under VM i Bahrain i 2024 vart han tildelt det internasjonale vektløftarforbundet sin IWF Gold Collar Lifetime Award av president Mohammed Jalood og generalsekretær Antonio Ursu. Grimseth fekk prisen for hans lange og viktige bidrag til vektløftingsidretten, både som aktiv utøvar og gjennom arbeidet med å fremje idretten i Noreg og internasjonalt.
Stian Grimseth er nominert til prisen for årets trenar under Idrettsgallaen 2025.
Frå mars 2019 har Stian Grimseth vore president i Noregs Vektløftarforbund. I april 2025 vart han og valt til visepresident i styret i det europeiske vektløftarforbundet.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må vere logga inn for å kommentere.