Signe er eit kvinnenamn som kjem av norrønt Sig-ný. I dette toledda namnet tyder forleddet ‘siger’ og etterleddet ‘ny’.
Signe (kvinnenamn)
Personar med namnet Signe
Kulturell bruk
- Signe er ei heltinne i Saxos tragiske kjærleikshistorie om Hagbard og Signe. Dette stoffet ligg også til grunn for tragedien «Hagbard og Signe» (1815) av Adam Oehlenschläger. Også den norske folkevisa «Bendik og Årolilja» tek opp dette emnet.
- Signe i «Det store spelet» (1934) og i «Kvinnor ropar heim» (1935) av Tarjei Vesaas.
Kjende personar med namnet Signe
Eit utval personar med namnet Signe, og som er omtalt i Store norske leksikon:
- Signe Scheel (1860–1942)
- Signe Lund (1868–1950)
- Signe Heide Steen (1881–1959)
- Signe Lindeman (1895–1974)
- Signe Hofgaard (1901–1998)
- Ella Signe Hval (1904–1994)
- Signe Marie Stray Ryssdal (1924–2019)
- Signe Howell (1942)
- Liv Signe Navarsete (1958)
- Signe Brudeset (1967)
Namnestatistikk
I 2022 var det 5 791 kvinner i Noreg som hadde Signe som det einaste førenamnet eller som det fyrste av fleire. I 2022 var det 121 jenter som fekk namnet Signe, og det var blant dei 50 mest populære jentenamna dette året.
Utvikling i bruk av namnet
Signe er eit namn som høyrer til den nordiske namnerenessansen. Det har bakgrunn i dansk nasjonalromantisk dikting – jamfør Oehlenschlägers dikt «Hagbarth og Signe» (1815). Som andre renessansenamn fekk Signe eit oppsving i siste halvdel av 1800-talet. Det var på topp i perioden 1900–1904. Signe og det danske Alvilde skil seg lydleg ut frå andre renessansenamn ved at det endar på -e. Andre renessansenamn held på endingsvokalen -a frå norrønt, til dømes Inga, Gyda og Åsta. Hovudtyngda av dei tostava namna på -e hadde toppfasen sin innanfor perioden 1955–1999, og dette er mykje seinare enn toppfasen for Signe (1900–1904).
Geografisk variasjon på 1800-talet
![Geografisk variasjon i bruk av namnet Signe på 1800-talet.](https://media.snl.no/media/278992/standard_signe-navn-kart.png)
Signe var mest brukt i Kristiania og Telemark.
Signe var mest brukt i Kristiania og Telemark.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.