Odd Emil Ingebrigtsen er næringsdrivande, politikar og tidlegare fiskeri- og sjømatminister i regjeringa Solberg i 2020–2021.
Odd Emil Ingebrigtsen
Faktaboks
- Fødd
- 8. oktober 1964, Bodø, Nordland
Bakgrunn
Odd Emil Ingebrigtsen er fødd i Bodø i Nordland. Han var elev ved Bodø videregående skole i 1980–1984, inkludert eit år som utvekslingselev i New Jersey i USA i 1981–1982. Han har delvis fullført fiskeriøkonomstudiet ved Høgskolen i Bodø (no Nord universitet) i 1984–1986.
Ingebrigtsen har vore eigar av Edging Holding (tidlegare familiebedrifta Odds Bokhandel AS) sidan 1991. Firmaet investerer i ulike bedrifter i Nordland. Han var dagleg leiar i Odds Bokhandel i 1988–2004 og administrerande direktør i Boligbyggelaget Nobl i 2008–2013. Deretter var han direktør i BRUS (Bodøregionens Utviklingsselskap) i 2013–2018 og administrerande direktør i Indre Salten Energi i perioden 2018–2020.
Politisk karriere
Ingebrigtsen har vore aktiv i Unge Høgre sidan tenåra, og han var sentralstyremedlem i 1985–1986, deretter generalsekretær i Unge Høgre i 1987–1988. Han var kommunestyrerepresentant for Høgre i Bodø i 1992–2011, og har vore både gruppeleiar og medlem av formannskapet. Han var òg leiar i lokalpartiet i 1985–1987 og 1991.
Ingebrigtsen var vararepresentant for Høgre frå Nordland i perioden 1989–1993. I januar 2020 blei Ingebrigtsen statssekretær for statsråd Tina Bru i Olje- og energidepartementet. Då partifellen Geir Inge Sivertsen trekte seg, på grunn av rot med etterlønn, tok Ingebrigtsen over som fiskeri- og sjømatminister i mars 2020. Han måtte gå av saman med resten av regjeringa etter stortingsvalet i 2021.
Som politikar har han vore oppteken av verdiskaping og næringsutvikling. Han har arbeidd for fleire arbeidsplassar og berekraftig vekst i fiskeri- og sjømatnæringa.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.