Amedia er eit norsk mediekonsern som frå 2022 er det største norske mediekonsernet, rekna på grunnlag av talet på aviser og totalopplaget. Schibsted ASA er likevel større, målt i omsetning. Sparebankstiftelsen DNB kjøpte i 2016 selskapet av LO, Telenor og Fritt Ord, og overlet eigarskapen til den nyoppretta frittståande Amediastiftelsen. Tidlegare heitte konsernet A-pressa. Amedia hadde i 2024 totalt 1100 redaksjonelt tilsette.
Amedia
Faktaboks
- Også kjend som
-
A-pressen (1990–2012)
Norsk Arbeiderpresse (1948–1990)
- Organisasjonstype
- Aksjeselskap
- Eigd av
- Amediastiftelsen (frå 2016)
- Dagleg leiar
- Anders Opdahl
- Styreleiar
- Andre Støylen
Tilhøyrande aviser
Amedia eig i Noreg 100 aviser (2024) og har i tillegg 20 partneraviser. Romerikes Blad er den største av Amedia-avisene.
I desember 2024 kjøpte Amedia det danske mediekonsernet Berlingske Media av det belgiske medieselskapet DPG Media. Berlingske Media gir ut dagsavisa Berlingske, B.T., Weekendavisen og den digitale finansavisa Euroinvestor.
I tillegg til dette har Amedia interesser innan elektroniske medium, og eig mellom anna 100 prosent av Nettavisen og NA24 etter å ha delt eigarskapen 50–50 prosent med danske Egmont sidan 2009. Ei ny digital lokalavis for Kristiansand, KRS, blei etablert av Amedia sommaren 2023, og RA Stavanger vart etablert hausten 2024. I juni 2021 kjøpte Amedia 66,9 prosent av aksjane i Tun Media, som mellom anna eig Nationen og Bondebladet. Amedia eig dessutan fem trykkeri og er medeigar i tre til i Noreg. Selskapet eigde i tillegg inntil april 2022 seks trykkeri i Russland.
På grunn av den russiske invasjonen i Ukraina i februar 2022 valde Amedia å trekkje seg ut av trykkeriverksemda i Russland. Det skjedde ved at all kontroll og alle aksjonærrettar blei overdregne til fredsprisvinnar Dmitrij A. Muratov.
Amedia inngjekk hausten 2018 avtale med Nordsjø Media AS om å overta alle aksjane i mediekonsernet. Ni lokalaviser i Rogaland og Vest-Agder blei dermed ein del av Amedia. Saman med Bonnier kjøpte Amedia ved årsskiftet 2018–2019 det svenske aviskonsernet MittMedia, som gir ut 28 abonnementsaviser. Amedias eigardel er 20 prosent. Gjennom eigarskapen i Bonnier inngjekk Amedia i 2021 ein samarbeidsavtale med Göta Media, som saman med Bonnier News Local totalt omfattar 65 lokale og regionale aviser i Sverige.
I februar 2020 inngjekk Amedia ein tiårig teknisk og strategisk samarbeidsavtale med TA-konsern, som mellom anna gir ut Trønder-avisa og fleire lokalaviser i Trøndelag.
Drygt 70 prosent av abonnentane av Amedias aviser er heildigitale, det vil seia at dei les avisa si både på nett og papir.
Inntektene
Driftsinntektene i 2023 var på 4,1 milliardar kroner (4,0 milliardar kroner i 2022). Brutto driftsresultat (EBITDA) var i 2023 på 287 millionar kroner (370 millionar kroner i 2022). Resultat før skatt var 43 millionar kroner i 2023 (137 millionar kroner i 2022).
Historikk
Akersgata i Oslo var i lang tid det tradisjonelle sentrum for deler av norsk presse. Også Amedia hadde kontorer der, men flyttet så til Schweigaards gate 15.
Norsk Arbeiderpresse
Norsk Arbeiderpresse blei oppretta i 1948 som eit finansieringsselskap eigd av LO, Arbeidarpartiet og arbeidarpressa. Kvar enkelt A-presseavis blei då gitt ut av lokale aksjeselskap eller andelslag der lokale arbeidarpartilag, fagforeiningar knytte til LOs forbund og Norsk Arbeiderpresse A/S var eigarar. Avisene samarbeidde gjennom Arbeiderpressens Samvirke A/L.
Trykkeri og aviser i Russland
I 1990 blei Norsk Arbeiderpresse A/S refinansiert av LO og omorganisert til konsern, der dei enkelte avisene inngjekk som dotterselskap. Frå 1995 utvida konsernet verksemda, mellom anna ved å kjøpe seg inn i TV2 og i russiske trykkeri. Fram til 2007 hadde A-pressa også eigarinteresser i russiske medium, blant dei den største riksdekkjande dagsavisa i landet, Komsomolskaja Pravda (25 prosent eigardel). Seinare bestemde A-pressa seg for berre å satsa på trykkeriverksemd i Russland. Etter den russiske invasjonen i Ukraina våren 2022 valde Amedia å trekkje seg ut av trykkeriverksemda i Russland.
Borgarlege aviser
I juni 2012 overtok A-pressa formelt Edda Media frå britiskbaserte Mecom, sjølv om kjøpet var ein realitet eit halvt år tidlegare. Ei rekkje borgarlege aviser som tradisjonelt hadde støtta Høgre eller Venstre, blei over natta ein del av den norske arbeidarpressa. Fredriksstad Blad, Drammens Tidende, Haugesunds Avis, Gjengangeren og Lofotposten var blant desse. Men det dramatiske medieoppkjøpet gjekk ikkje knirkefritt. Både Konkurransetilsynet og Medietilsynet kravde at A-pressa selde vidare fleire aviser, mellom anna Varden, som vilkår for å godkjenne oppkjøpet.
På same tid vedtok A-pressa å selje seg ut av TV2. A-pressa eigde 50 prosent av aksjane. Desse blei selde til det danske medieselskapet Egmont, som frå før eigde 50 prosent.
Namneskifte
I september 2012 skifta A-pressa namn til Amedia AS. LO og ei rekkje fagforbund eigde til saman nær 45 prosent av aksjane. Telenor ASA hadde ein like stor post og Stiftinga Fritt Ord vel 3 prosent. Det tidlegare namnet (med bindestrek og trykk på A-en) indikerte ei tilknyting til arbeidarrørsla som var avleggs, ettersom ei rekkje borgarlege aviser hadde blitt ein del av konsernet.
Sparebankstiftinga DNB forplikta seg, gjennom den nye eigarstiftinga, til å behalde Amedia som eit samla konsern. Utgivingsgrunnlaget, sjølvstendet og den redaksjonelle fridommen til avisene skulle også haldast oppe. Amedia-namnet blei vidareført.
Les meir i Store norske leksikon
Eksterne lenkjer
Faktaboks
- Sektorkode
- 2100 Private aksjeselskaper mv.
- Næringskode(r)
- 58.130 Utgivelse av aviser
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.