Christina Hammock Koch
![](http://upload.wikimedia.org/wikipedia/commons/thumb/8/8c/Christina_Koch_official_portrait_in_an_EMU.jpg/220px-Christina_Koch_official_portrait_in_an_EMU.jpg)
![](http://upload.wikimedia.org/wikipedia/commons/thumb/e/e5/Artemis_2_Crew_Portrait.jpg/220px-Artemis_2_Crew_Portrait.jpg)
Christina Hammock Koch (š. uđđâivemáánu 29. peeivi 1979 Grand Rapids, Michigan, Ovtâstum staatah) lii ovtâstumstaatâlâš insner já nissoonastronaut, kote cuáŋuimáánu 3. peeivi 2023 väljejui Artemis II -mánudâšmääđhi astronautin oovtâst Reid Wisemanáin, Victor J. Gloveráin já Jeremy Hansenáin.
Eellim
[mute | mute käldee]Christina Hammock Koch šoodâi Michiganist[1] já rávásmij Tave-Carolinast.[2] Sun luuvâi šleđgâtekniik já fyysiik Tave-Carolina uásistaatâollâopâttuvâst, mast sun valmâštui kandidaatin ive 2001 já maisterin ive 2002.[3][4]
Suu astoäigitoimáid kuleh el. miällum, värikuárŋudem, jooga, kaččâm já mađhâšem.[3]
Karrieer
[mute | mute käldee]Christina Hammock Koch lii ohtâ enâmustáá hárjánâm NASA-astronautijn. Sun uásálistij NASA Academy -ohjelmân Goddard Space Flight Centerist (GSFC) ive 2001 já poorgâi GSFC:st šleđgâinsnerin ivij 2002–2004. Sun väljejui kesimáánust 2013 ohtân NASA 21. astronautluoka jesânin. Taah jesâneh láá käävcis. Sun lii lamaš fáárust kulmii Almugijkoskâsii komovuotâsajattuvâst tutkâmušmaađhijn numerijn 59, 60 já 61. Suu tutkâmmaađhijn kuávdáš syergih láá lamaš sevŋis amnâs totkee Alpha-magneetspektrometri pyeredem, proteinčalmai šoddâdem lekittâstutkâmuš várás já biologisij 3D-printterij testam kođosij printtiimân tiäduttes tiileest. Hammock Koch lii toohâm kuttâ komovuotâväzzim, main kulmâ láá lamaš vuossâmuuh nisonij komovuotâväzzimeh. Sun lii viättám komovuođâst 328 peivid (ovdil Artemis II -mánudâšmääđhi).[3]
Palhâšumeh já tubdâstâsah
[mute | mute käldee]Juovlâmáánust 2020 Christina Hammock Koch šoodâi Tave-Carolina uásistaatâollâopâttuv kunneetuáhtárin.[5]
Fáádást eres soojijn
[mute | mute käldee]Wikimedia Commonsist láá koveh teikkâ eres tiätuvuárháh fáádást Christina Hammock Koch.
Käldeeh
[mute | mute käldee]- ↑ Raven, Benjamin: NASA’s first all-women spacewalk features Michigan native www.mlive.com. 8.3.2019. Čujottum 4.4.2023. (eŋgâlâskielân)
- ↑ NASA astronaut, NC State grad Christina Koch ready for first space flight in March ABC11 Raleigh-Durham. Čujottum 4.4.2023. (eŋgâlâskielân)
- ↑ 3,0 3,1 3,2 Christina Hammock Koch NASA Astronaut NASA. 27.11.2015. Čujottum 3.4.2023. (eŋgâlâskielân)
- ↑ Alumna Astronaut Prepares to Launch to the ISS » Electrical and Computer Engineering ece.ncsu.edu. 20.2.2019. Čujottum 5.4.2023. (eŋgâlâskielân)
- ↑ Launching the Next Generation | NC State News web.archive.org. 16.1.2023. Čujottum 7.4.2023. (eŋgâlâskielân)