Billie Eilish
Billie Eilish | |
---|---|
![]() | |
Persovntiäđuh | |
Šoddâm | juovlâmáánu 18. peeivi 2001 |
Šoddâmsaje | Los Angeles, Kalifornia, Ovtâstum staatah |
Aalmugjeessânvuotâ | ovtâstumstaatâlâš |
Musikkár | |
Lávlumkielah | eŋgâlâskielâ |
Aktiivlâžžân | 2015– |
Genreh | pop, elektropop |
Čuojânâsah | ukulele |
Skiärrufinnodâh | Darkroom Interscope Polydor |
Peerâ | |
Vaanhimeh | Patrick O'Connell Maggie Baird |
Lasetiäđuh | |
Päikkisijđo | http://www.billieeilish.com |
Billie Eilish Pirate Baird O’Connell (š. juovlâmáánu 18. peeivi 2001, Los Angeles, Kalifornia, Ovtâstum staatah) lii ovtâstumstaatâlâš lávloo já laavlârähtee. Suu vuossâmuš skiärru When We All Fall Asleep, Where Do We Go? almostui ive 2019 já tot pajanij listo njunošân 21 enâmist, ovdâmerkkân Ovtâstum staatâin, Ovtâstum kunâgâskoddeest já Suomâst.
Ive 2020 Eilish vuoitij vittâ Grammy-palhâšume, ovdâmerkkân ive skiäru, ive lavluu já pyeremuu uđđâ artist palhâšuumijd. Eilish lii nuorâmus olmooš já vuossâmuš nissoon, kii lii vuáittám siämmáá ive puoh nelji tergâdumos Grammy-palhâšume.
Pärnivuotâ
[mute | mute käldee]Eilish šoodâi Highland Parkist, Los Angelesist. Suu vaanhimeh, Maggie Baird já Patrick O'Connel, lává kuohtuuh čaittâleijeeh já musikkáreh. Suu stuorrâviljâ Finneas O'Connell lii meid tobdos musikkárin. Pärnin Eilish láávlui kirho lávlumjuávhust já tánssái. 11-ihásâžžân sun čäliškuođij jieijâs lavluid. Suu vuossâmuu olmâ pitá nommâ lâi Fingers Crossed.
Pargo
[mute | mute käldee]2015–2018: Karrieer algâ
[mute | mute käldee]Eilish almostitij oovtâst viljâs Finneas O'Connelláin She's Broken já Fingers Crossed -pittáid SoundCloud-palvâlusâst ive 2015 porge-čohčâmáánust. Siämmáá ive skammâmáánust suoi almostitijn tobbeen meid Ocean Eyes -pitá, mast šoodâi jotelávt miänástus. Tot almostui YouTubest njuhčâmáánust 2016, já ive 2021 juovlâmáánust tom lijjii keččâm jo paijeel 380 miljovn kerdid.[1] Čuávuváá pitá Six Feet Under Eilish almostitij SoundCloudist ive 2016 kesimáánust. Tot almostui singlen siämmáá ive skammâmáánust. Ive 2017 ääigi Eilish almostitij maaŋgâid pittáid, tego Bellyache já Bored. Suu vuossâmuš EP-skiärru Don't Smile at Me almostui porgemáánust 2017. Roovvâdmáánust 2017 Apple nomâttij Eilish Apple Music UpNext -artistin. Cuáŋuimáánust 2018 Eilish almostitij Lovely-pitá oovtâst Khalidáin. Eilish almostitij siämmáá ive meid pittáid Bitches Broken Hearts, You Should See Me in a Crown já When the Party's Over. Singleh Lovely, You Should See Me In a Crown já When the Party’s Over pajanii Billboard Hot 100 -liiston.
2019–2020: When We All Fall Asleep, Where Do We Go?
[mute | mute käldee]Ive 2019 uđđâivemáánust Eilish almostitij When I Was Older -pitá. Uđđâivemáánu loopâst sun almottij, ete suu vuossâmuš skiärru When We All Fall Asleep, Where Do We Go? almostuvá njuhčâmáánu 29. peeivi 2019. Skiäru single Bad Boy pajanij listo njunošân 15 enâmist. Eilish vuoitij pittáin kyehti Grammy-palhâšume uđđâivemáánust 2020. Ive 2019 skammâmáánust Eilish almostitij uđđâ Everything I Wanted -pitá, mon čuávuváá ive uđđâivemáánust almostum muusikvideo sun stivrij. Eilish raahtij ive 2021 almostum James Bond -elleekove 007 No Time to Die tubdâldâhpitá. No Time to Die -pittá almostui kuovâmáánu 13. peeivi 2020.
2021–: Happier Than Ever
[mute | mute käldee]Ive 2021 Grammy-gaalast Eilish vuoitij ive skiärrudem Grammy-palhâšume pittáin Everything I Wanted já pyeremuu visuaallii median rahtum lavluu Grammy-palhâšume pittáin No Time to Die. Suu nubbe skiärru Happier Than Ever almostui syeinimáánu 30. peeivi.
Käldeeh
[mute | mute käldee]![]() |
Wikimedia Commonsist láá koveh teikkâ eres tiätuvuárháh fáádást Billie Eilish. |
- ↑ Billie Eilish - Ocean Eyes (Official Music Video) youtube.com. 24.3.2016. Čujottum 2.12.2021.