Kunfucyus

Kunfucyus (孔子; pinyin: Kǒngzǐ; s tagnawt: 'Mass Kang'), ilul d ɣ Kong Qiu (孔丘), ikka tt inn iga yan uflsaf acinwi n talldrar d tmnjuct, imyar ad ittyawssan s usafu n waggagn icinwiyn, iggut ɣ taysi tadlsant lli issugrn ɣ tmizar n icinwiyn mad d ikkan taflsuft d umlan n kunfucyus. Almmud nns iflsfn ittyawsmma s "Tkunfucit", taɣarast ad ar tt tettawi bahra ɣ itaggn n umddnu d win tnbaḍt, tawi tt ula ɣ tasult n yan usɣun anamun irggign d tanumi d taɣʷẓuni n wawal, tasglallaft (taddriwcit), d manmk ad iẓḍaṛ yan ugllid ad inbḍ s irfsan ẓilnin.

Kunfucyus inna f ugayyu nns is ar izzray itaggn n ayt zikk da f ar ittini is tn laḥ ɣ uzmz nns, iɣra i tayri n imarawn d ussrɣud n imzwura d luqr n imẓẓiyn i wanna tn yugrn d luqr n taldniwin i imddan nnsnt, issawn alugn n wurɣ, "Ad ur tskart i wiyyaḍ, ɣaylli ur trit i ixf nnk".

Tallit n tudrt n Konfusius tga yat tallit iɣudan s imdyatn n ufkar, tga ula tallit lli mi bddan twngimin n Ccinwa. Imdyatn ns gan imqqurn ɣ tallit n "Imnaɣn n Tgldiwin", walaynni ur tn sul ttawsn bzzaf ɣ dffir n uṣlay n Qin. Ɣ ddaw n Ugllid Wu n Han, imdyatn n Konfusius gan win tmazirt s ṛṣmi, tirra ns gan tiɣriyin lli d iqqann i willi iran ad gn imswudan. Ɣ tallitin n Tang d Song, Konfucianizm ibddl ar as ttinin ɣ Lɣrb "Neo-Konfucianizm", d yan uzmz yaḍnin ar as ttinin "Konfucianizm Amaynu". Zɣ tgldiwin tiqburin ar assa, Konfucianizm iga yan imi n tudrt d tannayt n tudrt n mddn n Ccinwa.

Tudrt nns

Ttinin is d ilul Konfusius ass n 28 ctambir 551 dat n tlalit n Lmasih, ɣ Zou (鄒, ɣ Shandong n ɣilad). Tamnaḍt ad tlla ddaw n tḥkamt n igldan n Zhou, walaynni tga tin imɣarn n Lu lli iḥkamn zɣ tmdint n Qufu. Babas Kong He (nɣd Shuliang He) iga amɣar aqdim n lɛskar n Lu. Ayt dar d ikka gan zɣ dukat n Song ar tgldit n Shang lli izrin tin Zhou. Timktawin tiqburin n tudrt n Konfusius ttinint is dadda n Kong He ismutti tawja ns zɣ Song s Lu. Ur gin imusnawen imaynuten kultn lli ittamnn is d ikka Konfusius zɣ inbbaln n Song.

Kong He immut liɣ dar Konfusius kraṭṭ isggas, tskar gis mmas Yan Zhengzai (顏徵在) s lfaqr. Mmas tmmut ur sul tɣiy rbɛin n usggʷas. Liɣ dar iga mraw d tẓa n usggʷas, yiwi Lalla Qiguan (亓官氏), yan usggʷas ɣ dffir, luln d iwis amzwaru, Kong Li (孔鯉). Qiguan d Konfusius urtn sin yistis, yat gisnt tmmut tga taẓẓunt, tayḍ gant as Kong Jiao (孔姣).