Sadako will leben

Custu artìculu est iscritu in sa grafia

campidanesa

. Abbàida sas àteras bariedades gràficas:

Sadako will leben (Sadako bolit bivi) est unu romanzu de su 1961 de Karl Bruckner.

Custu lìburu dd'ant publicau sa primu borta in su 1961, at bintu su Prèmiu de su stadu Austrìacu, su Prèmiu literàriu de sa Tzitadi de Vienna e sa Lista d'onori Andersen e dd'ant tradùsiu in prus de trinta lìnguas.

S'autori descriit sa stòria de Sadako e Shigeo, pipius giaponesus subrabìvius a su bombardamentu atòmicu de Hiroshima.

Trama

S'obietivu de su "Progetu Manhattan" fiat su de creai s'efetu distrutivu màssimu intzullendi su Giaponi a s'arrimai e acabai sa segunda gherra mundiali.

Su 6 austu de su 1945 is Stadus Aunius ghetant una bomba atòmica asuba de Hiroshima, una de is prus tzitadis giaponesas de importu. Su contu est apitzus de Shigeo e Sadako Sasaki, fradi e sorri de 10 e 4 annus, de pari a pari, chi subrabivint po sorti a su scòpiu: in su momentu de s'arruta de sa bomba atòmica, s'agatant in unu parcu isulau, in sa zona esterna de sa tzitadi. Su babbu, su sennor Sasaki, est unu sordau e no s'agatat in Hiroshima cussa dii. Sa mama puru, Yasuko, operaja, si sarvat po miràculu.

Is duus fradis parint essi abarraus sanus a pustis de s'esplosioni e agatant a su babbu e a sa mama. Sa famìlia bivit in una barraca e si gadangiat de ita bivi bendendi in su mercau nieddu su chi agatant in mesu a is arruinas de sa tzitadi. Gràtzias a s'agiudu de un'òmini chi bessit amigu insoru, su bèciu sennor Shibuta, su babbu de Shigeo e Sadako aberit una buteghedda de barberi.

Cun su passai de is annus, Sadako, amentat fatu-fatu a su fradi chi sa dii de s'esplosioni, issa non fiat stètia sceti "ingorta", (a issa dd'iat agatat Shigeo cun cancu scarràfiu in su corpus) ma iat "intèndiu una basca manna", e ddi fiat partu de "abruxai". Su fradi no dda creit e ddi spricat chi a s'època issa teniat sceti cuàturu annus e fiat abarrada amadainada de s'esperièntzia, duncas si podiat essi imaginada totu.

Dexi annus apustis, Sadako pigat parti a una stafeta in bicicreta de Tokio a Hiroshima. Apustis de sa gara sa piciochedda s'intendit mali e nci-dda portant a su spidali. Is dotoris narant a Yasuko chi su peus est acuntèssiu: Sadako est malàida po nexi de is efetus de is radiatzionis de sa bomba atòmica, mancai siant colaus annus meda innui issa no iat tentu perunu problema fìsicu. Sa fèmina, disisperada, donat s'annùntziu a su pobiddu e a su fillu. Shigeo amentat is chèscias de sa sorri in contu de is fertas suas apustis de s'esplosioni e cumprendit sa trista realidadi. Is dotoris e sa famìlia Sasaki decidint perou de no ddi nai a Sadako chi dd'abarrant pagus mesis de vida e, po ddi donai unu pagu de serenidadi, ddi narant chi podit sanai. Shigeo ddi contat chi candu fessit arrennèscia a fai milli gruis de paperi dorau, iat a essi sanada.

Sadako passat totu su tempus in su spidali preparendi is gruis, cuntenta e bisendi de andai a mari cun su piciocu malàidu in s'aposentu acanta a su suu, Shigetomo. Issu est malàidu etotu de abelenamentu de su sàmbene po nexi de is radiatzionis e nascit un'amistadi profunda cun Sadako, ma morit in sa dii chi Sadako arribbat a noixentu gruis. Sadako est atrivida e fintzas apustis de sa morti de Shigetomo sighit a preparai is gruis.

Candu sa piciochedda arribat a segai su paperi po sa de noixentunoranta gruis, su dotori, acanta a issa, bidit is ogus suus studendi-sì e cumprendit chi sa fortza sua, apustis de tres mesis de curas, est spaciada. Andat duncas a tzerriai a sa famìlia Sasaki: depit annuntziai sa morti de Sadako.

Sadako acabat de preparai sa grui.

S'acatat chi totu a giru de issa est bessiu scuru, creit chi siat noti e chi s'infermiera apat studadu sa luxi. Sadako s'intendit dèbili e lassat arrui sa sa grui a terra. A cussu puntu intendit comenti un'illuminatzioni, e creit de essi giai a sa de noixentunorantanoi figuras. Spinta de su disìgiu profundu de sanai, Sadako circat su paperi po fai s'ùrtima grui. "Cun custa seu arribada a milli", pensat. Ma is manus suas funt oramai tropu dèbilis, incumentzat a biri una luxi innantis a issa e ndi-dd'arruit su follu de is manus. Spantada, Sadako càstiat sa luxi e intendit sa boxi de Yasuko prangendi. Creit chi siat po sa cuntentesa de ai agiumai acabau de preparai totu is guis.

Sadako Sasaki morit in su spidali, a catòdixi annus, arrisulendi.