Limba papiamentu
Artìculu in LSC
Su papiamento o papiamentu est una limba crèola faeddada in sas ìsulas caraìbicas de Aruba, Curaçao e Bonaire. Su papiamentu est naschidu de unu pidgin portughesu faeddadu dae sos ebreos sefarditas e de sos iscraos issoro fuende·si·nche dae Brasile. Unu àteru pidgin portughesu at lòmpidu in sas gai naradas ìsulas ABC (Aruba, Bonaire e Curaçao), batidu de sos ebreos bènnidos de Cabu Birde: si trataiat de un'ammesturu de crèolu basadu subra su portughesu Mina (issu e totu ammesturu de crèolu de Cabu Birde e de twi) e de crèolu basadu subra su portughesu angolar (ispaniadu in Angola e Congo).
Cun sa dominatzione ispagnola, tale limba est istada ulteriormente arrichida cun influèntzias ispagnolas (de su restu, una forte imprenta ispagnola fiat giai presente in sa limba giudeu-ispagnola allegada dae sos ebreos sefarditas de su Brasile).
Cando a pusis sas ìsulas ABC sunt istadas atacadas a s'impèriu coloniale olandesu, numerosos imprèstidos sunt arribados dae sa limba olandesa. Est istadu gai chi at tentu orìgine s'idioma atualmente connotu cun su nùmene de papiamentu, in ue papia signìficat "faeddare"; tèrmine chi derivat de su portughesu papear. De su restu, unas àteras limbas crèolas basadas in su portughesu sunt naradas papia, pro esèmpru su Papia Kristang de sas ìsulas Cabu Birde (Sud).