Перейти до вмісту

Лудвик Свобода

Матеріал з Вікіпедія


Лудвик Свобода

Ludvík Svoboda (1968)
Президент Чехословакии
Во функции:
30. марец 1968 — 28. май 1975
ПредходникАнтонин Новотный
НаступникГустав Гусак
Министр обороны Чехословакии
Во функции:
4. апрѣль 1945 — 24. апрѣль 1950
ПрезидентЕдвард Бенеш
ПредходникЯн Масарик
НаступникАлексей Чепичка
Уродив ся25. новембер 1895
Грознатин, Австро-Мадярщина
Умерсептембра 20., 1979 (83 р.)
Прага, Чехословакия
Шаржаармадный генерал

Лудвик Свобода, чеш. Ludvík Svoboda, *25. новембер 1895, Грознатин, Австро-Мадярщина – †20. септембер 1979, Прага, Чехословакия — чехословацкый военскый и штатный дѣятель, армадный генерал, Президент Чехословакии.[1][2]

Биография

[едітовати | едітовати жрідло]
Перва свѣтова война и медживойня
Походив зоз селянской родины. Закончив земледѣлску школу (1909–1912) и працовав во фаху агронома. По зачатку Первой свѣтовой войны быв поволаный до австро-мадярского войска (1915) и посланый на российскый фронт. При первой можности оддав ся до российкого заятя. В России вступив до Чехословацкой легии, быв участником ей первой битвы при Зборовѣ (1917) и далшого похода.[3] В року 1920 вернув ся до Чехословакии, демобилизовав ся и заняв ся газдовством. Але в октобру 1921 быв зась мобилизованый яко легионер через пробу Карла I. Габсбурга вернути ся на трон, и так його далшый живот быв звязаный з войском. В року 1934 достав шаржу подполковника.[4]
Друга свѣтова война
По мюнхенской кризѣ (1938), а пак по заятю Германиев в марцу 1939 зосталой части штату, Свобода пошов до илегалиты и организовав еднотку чехословацкых беженцьох в Польщи, а по падѣ Польщѣ в часѣ Другой свѣтовой войны перешов з войском до СССР, де были на довжый час интернованы. Од 8. децембра 1941 на основѣ чехословацко-совѣтской догоды формуе чехословацкый баталион в Бузулуку,[5][6] котрый уже 8. марца 1943 ся успѣшно запоив до бойох при Соколовѣ, а наступно вырос на армадный корпус (1944) и одзначив ся в бойох за ослободжѣня Киева, Бѣлой Церкви, Жашкова, в Дуклянской операции.[2]
Повойновый политичный живот
По ослободжѣню Чехословакии в року 1945 президент Едвард Бенеш поклав го министром обороны. Свобода, симпатизовавшый комунистам, нич не зробив, жебы не дати им ухватити ся моци в Чехословакии во фебруарѣ року 1948. Доконця, сам вступив до комунистичной партии 11. октобра 1948,[4] але наступно быв выгнаный з войска в року 1950 году на росказ Иосифа Сталина, збавленый вшиткых урядох, аж и арештованый в року 1952. По приходѣ нового комунистичного курза Никиты Хрущова быв регабилитованый и вернув ся ку сполоченскому животу як ректор Военной академии в Празѣ. В року 1959 пензионовав. В новембрѣ 1965 быв вызнаменаный наградами героя Совѣтского Союза и Чехословацкой Социалистичной Републикы. По падѣ конзервативного режима Антонина Новотного Свобода быв выбраный за Президента републикы 30. марца 1968 з инициативы Александра Дубчека, нового первого секретаря Комунистичной партии Чехословакии. Свобода твердо ся противив совѣтскым жаданям и заграв важну роль во выслободжѣню зо Совѣтского Союза Дубчека и його колег, заятых в ходѣ совѣтской инвазии в августѣ 1968. По задушѣню Пражской яри подтримовав политику «нормализации» Густава Гусака. Одышов зо сполоченского живота в року 1975, переважно через слабе здоровля.[1]

Оцѣнѣня

[едітовати | едітовати жрідло]

Наперек тому, же быв веце разы выхоснованый политиками на досягнутя их цѣлей, Свобода надале мать певну авториту меджи Чехами и Словаками, найскорше, через його смѣлость и твердость в рѣшаючых моментах чехословацкой истории. Площѣ и улицѣ як в Чехах, так и в Словакии и дале носять його имя, в тот час як имена векшины иншых лидерох комунистичной епохы были збавлены такой чести по Баршоновой револуции.

Интересны факты

[едітовати | едітовати жрідло]
  • В маю 1923 быв посланый ку 36. пѣшому полку в Ужгородѣ як велитель кулометной роты, о мѣсяць ся оженив, а наслѣдно ся зачав учити мадярскый язык.[4]
  • В року 1929 на Братиславской универзитѣ склав испыт з мадярского языка и литературы.[4]
  • В Ужгородѣ служив до року 1931; ту ся Свободовым уродив сын Мирослав (15.05.1924) и дѣвка Зое (4.12.1925).[4]
  • Од 15. септембра 1931 по 14. юла 1934 выучовав мадярскый язык на Военской академии в Границях.[4]

Жерела и одказы

[едітовати | едітовати жрідло]
  • Віднянський С. В., Пастушенко Т. В.: Свобода Людвік // Україна в міжнародних відносинах. Енциклопедичний словник-довідник. Випуск 6. Біографічна частина: Н–Я / Відп. ред. М. М. Варварцев. — К.: Ін-т історії України НАН України, 2016. — укр. сс. 170–173.
  • Марьина В. В.: СВОБОДА // Большая российская энциклопедия. Том 29. Москва, 2015, стр. 555 Верзия: 2017. Одчитане: 21.11.2020[1]русс.
  • Пастушенко Т. В.: Свобода Людвік //Енциклопедія історії України : у 10 т. / редкол.: В. А. Смолій (голова) та ін. ; Інститут історії України НАН України. — К.: Наук. думка, 2012. — Т. 9 — 944 с. — ISBN 978-966-00-1290-5 укр. С. 483.Одчитане: 21.11.2020
  • Ludvík Svoboda. Encyclopædia Britannica. November 21, 2020. https://www.britannica.com/biography/Ludvik-Svoboda. [перевірено 2020-11-21].  англ.
  • Ludvík Svoboda: životopis. Webnode. https://www.ludviksvoboda.cz. [перевірено 2020-11-21].  чеш.

Референции

[едітовати | едітовати жрідло]
  1. ↑ 1,0 1,1 Encyclopædia Britannica
  2. ↑ 2,0 2,1 Марьина В. В.
  3. ↑ PRECLÍK Vratislav. Masaryk a legie, vázaná kniha, 219 str., vydalo nakladatelství Paris Karviná, Žižkova 2379 (734 01 Karviná, CZ) ve spolupráci s Masarykovým demokratickým hnutím, 2019, ISBN 978-80-87173-47-3, str. 150—153
  4. ↑ 4,0 4,1 4,2 4,3 4,4 4,5 Ludvík Svoboda: životopis
  5. ↑ Пастушенко Т. В.
  6. ↑ Віднянський С. В., Пастушенко Т. В.
Обтримане з "https://rue.wikipedia.org/w/index.php?title=Лудвик_Свобода&oldid=141177"