Лисабон
| Главный и найвекшый город Португалии
Лисабон
Lisboaпорт.
|
Ли́сабон, порт. Lisboa, 
выгваряме: Ли́шбоа (файл) — главный и найвекшый город и главный пристав Португалии з обывательством 545 813 особ (2021).[2] Въедно з агломерациев числить 2 871 876 особ (2021).[3]
Полога
[едітовати | едітовати жрідло]Лежить в горлѣ рѣкы Тежу, порт. Tejo, в оддалѣню 15 км од Атлантичного океана.[4]
Клима
[едітовати | едітовати жрідло]Через свою пологу просто на березѣ Атлантику, Лисабон мать мягку климу, овплывнену температурным режимом океана: не аж горяче лѣто и односно мягка зима. Температура рѣдко спаде под 0°C.
Сѣверный берег горла Тежу на запад од Лисабона — сама курортна зона, называна Сонѣчный берег, порт. Costa do Sol (чит. Кошта ду сул).[4]
История
[едітовати | едітовати жрідло]Основаный, подля одгадох в 2. тысячрочу до н. е. Феничанами под назвов Alis Ubbo (файне пристанище). В току Другой пунской войны забраный Римлянами (205 до н. е.). По роспадѣ Римской империи быв под владов германскых племен (Готы, Свевы, Визиготы), а од року 714 — Арабох. Ослободженый в року 1147 и входить до Кральовства Португалия, в року 1179 доставать варошскы права, а од половкы 1250-х — статус главного города кральовства. В року 1755 спустошеный трясѣньом землѣ. 13. децембра 2007 ту подписана Лисабонска догода, котра де факто стала ся уставов Европской унии.[5]
Наука и култура
[едітовати | едітовати жрідло]Лисабонска универзита была основана в року 1288. Наука в школах безплатна и повинна про вѣкову категорию од 6 по 15 рокы. Окрем штатных школ суть приватны, з языком выукы америцкым, французскым, нѣмецкым, испанскым и шведскым.[3]
В сучасности в Лисабонѣ суть во множествѣ розличны научны и културны академии и высшы школы, як державны, так и приватны. Меджи нима Инштитут Камоенса, котрый ширить португалску културу через свои центры, умѣщены в понад 100 державах свѣту.[5]
Зачатком 1990-х число штудентох росло, але од 2000-х падать. Многы тутешны штуденты идуть за науков до престижнѣйшых заграничных универзит, а имигранты ся скорше змагають достати роботу, неж высокошколску диплому[3].
Обывательство
[едітовати | едітовати жрідло]Агломерация Лисабона покрывать лем 3% плохы штату, але ту жие понад 25% його обывательох. В року 1975, коли португалскы африцкы колонии ся осамостатнили, одты зачав ся приток имигрантох. Найвеце их было з Кабо Верде. Ку року 2000 мѣра обывательох зо загранича выносила 10%.[3]
Газдовство
[едітовати | едітовати жрідло]Исторично газдовство Лисабона было основане на рыбарствѣ. В сучасности в газдовствѣ доминуе сфера служеб, в нёй занято понад три штвертины роботных рук. Меджи службами важну роль повнять туристика и торговля. Свѣтова выставка Expo'1998 и впечатлива модернизация Лисабона додали му новый образ. Появив ся мост Васко да Гама, натогды найдовжый в Европѣ, а вздовж набережа — океанариум, портошы про яхты, готелы, торговы домы и центры забав. Але при тому Лисабон у многому захранив атмосферу вароша XIX. стороча, и тота притягуе туристох. На свѣтаню рыбарскы човны выставляють свою ловину на голосливу лицитацию перед маителями рыбных продавалень, а торговцѣ рыбов в довгых чорных катранах ещи все розносять рыбу в кошарках на головах. В старых историчных частях Лисабона в ресторанах мож послухати музику и спѣванкы в штилу фаду, котрый ся ту родив в минулых сторочах и жие доднесь.[3]
Торговы, финанчны и транспортно-логистичны службы — далшый важный сектор газдовства. Накладовый обѣг морского приставу 12 млн. тон (2019), число пасажерох на крузерных лодях 576 тысяч (2019). Традичны конарѣ машинарство, металургия, лодярство, петрохемия перенесены в агломерацию, на лѣвый, южный берег Тежу, в район Сетубал. Важнѣйшы експортовы продукты: вина, оливовый олай, рыбны конзервы.[5]
Интересны факты
[едітовати | едітовати жрідло]- Лисабон — найзападнѣйшый главный город континенталной Европы.[3]
- Тутешный мост Васко да Гама через горло Тежу (17,2 км, 1998) — другый найдовжый в Европѣ по Крымском мостѣ (19 км, 2018).[3]
- Лисабон — едно з невельох мѣст на свѣтѣ де голова мѣстной Римокатолицкой Церкви несе титулу патриарха.[3]
Жерела и одказы
[едітовати | едітовати жрідло]- Ehrlich, Blake , Gaspar, Jorge B. and Rebelo, Luís de Sousa (29 Mar. 2023). // Encyclopedia Britannica (online). https://www.britannica.com/place/Lisbon. [перевірено 04.05.2023].англ.
- Галкина Т. А., Ногтева О. А., Черных А. П.. // Большая российская энциклопедия. Электронная версия (2021). https://old.bigenc.ru/geography/text/5754054. [перевірено 04.05.2023].русс.
- Трёшников А.Ф. Географический энциклопедический словарь: Географические названия. /Гл. ред. А. Ф. Трёшников. — 2-е изд., доп. — М.: Сов. энциклопедия, 1989.— 592 с. ISBN 5-85270-057-6 русс.
Референции
[едітовати | едітовати жрідло]- ↑ Indicators of physical geography. Instituto Nacional de Estatística. 2014-05-22. Архівна копія з оріґінала зроблена 2016-03-04. https://web.archive.org/web/20160304112652/https://www.ine.pt/xportal/xmain?xpid=INE&xpgid=ine_indicadores&userLoadSave=Load&userTableOrder=7259&tipoSeleccao=1&contexto=pq&selTab=tab1&submitLoad=true. [перевірено 2023-05-04].
- ↑ 2,0 2,1 Pordata - Statistics about Portugal and Europe. https://www.pordata.pt/en/municipalities/summary+table/lisboa-822279. [перевірено 2023-05-04].
- ↑ 3,0 3,1 3,2 3,3 3,4 3,5 3,6 3,7 Ehrlich, Blake , Gaspar, Jorge B. and Rebelo, Luís de Sousa.
- ↑ 4,0 4,1 Трёшников А.Ф., с. 284.
- ↑ 5,0 5,1 5,2 Галкина Т. А., Ногтева О. А., Черных А. П.
| |||||||||||
