Янко Барна

Янко Барна (*10. марец 1955. - †15. юний 2020.), народни етнолоґ и публициста

Янко Барна
Народзени	10. марца 1955.
Умар	Умар 15. юния 2020.
Державянство	югославянске, сербске
Язик творох	руски, сербски
Школа	Штредня Туристично-економска школа у Беоґрадзе
Универзитет	Висша економска школа, Беоґрад
Период твореня	1975. - 2019
Жанри	етнолоґия, история, култура
Поховани	на теметове у Темерину

Биоґрафия

Янко Барна народзени 10. марца 1955. року у Руским Керестуре. Оцец Миронь и мац Натала родз. Медєши. Янко мал брата Елемира и шестру Марию. У родним валалє Янко закончел основну школу. Дальше образованє Янко Барна предлужел у Штреднєй Туристично-економскей школи у Беоґрадзе а потим там закончел и Висшу економску школу. Тото му оможлївело же би роками робел у обласци финансийох.

Од вчасней младосци Янка Барну прицаговали теми зоз прешлосци. Вредно и систематично призберовал материяли, фотоґрафиї и документи з прешлосци Руснацох. Янко Барна, правдиви народни етнолоґ, роками приповедал зоз старшима людзми и записовал тото цо вони чули, видзели и запаметали. Потим тото цо записал и знял на авдиокасети Янко пририхтовал, формовал до тематских цалосцох и обявйовал пригодни етноґрафски написи у Календарох, медзи хторима окреме замерковани „Салашски школи живота“ (Народни календар 1979, Руске слово, Нови Сад, 95-103), "Правели рок" (Руски календар 1997, Руске слово, Нови Сад, 149-152), "Статкарска пракса" (Руски календар 1998, Руске слово, Нови Сад, 156-158, "Салащанє – богатого роду" (Руски календар 1999, Руске слово, Нови Сад, 138-141), "Бази у коцурским хотаре" (Народни календар 1980, Руске слово, Нови Сад, 55-57, "До Америки и назад" (Народни календар 1980, Руске слово, Нови Сад, 69- 77, "Звод салашох" (Народни календар 1982, Руске слово, Нови Сад, 113-121, "Найстарши коцурски салаши" (Народни календар 1983, Руске слово, Нови Сад, 99-103, "Прецо були салаши" (Руски календар 2000, Руске слово, Нови Сад, 150-153).

У новинох Руске слово од януара по май 2001. року, у рубрики Людзе, роки, живот обявел 18 предлуженя написох з нашей прешлосци под назву "Коцурски салаши", а у "Заградки", у рубрики З народней студзенки, тиж обявйовал написи за дзеци.

За Янком Барна остали велї обявени и ище нє обявени роботи о прешлосци Руснацох у Войводини. Тоти розгварки зняти на пантлїки, та дзепоєдни з нїх емитовани у радио-емисийох по руски. Людзе хтори помогли Янкови Барнови дознац вельо вецей о нашей прешлосци були: Андри Ґубаш, землєдїлец, народзени 1886. року у Коцуре; Онуфри Жилник, народзени 1905. року у Коцуре; Мелана Сивч, ґаздиня, народзена Джуня 1906. року у Руским Керестуре; Юлин Фейса, землєдїлец, народзени 1923. року у Коцуре; Данил Олєяр, пензионер, народзени 1904. року у Коцуре; Йовґен Папгаргаї, землєдїлец, народзени 1922. року у Руским Керестуре; Дюра Силадї, пензионер, народзени 1894. року у Руским Керестуре; Ґабор Канюх, пензионер, народзени 1908. року у Руским Керестуре; Юлин Сабо, землєдїлец, народзени 1920. року у Коцуре; Ирина Сабо, ґаздиня, народзена 1923. року у Руским Керестуре; Михал Будински, землєдїлец, народзени 1903. року у Кули; Мелана Будински, ґаздиня, народзена Джуджар 1905. року у Руским Керестуре; Мария Стрибер, ґаздиня, народзена Барна 1934. року у Руским Керестуре; Янко Джуня, землєдїлец, народзени 1900. року у Руским Керестуре; Наталия Пап, пензионерка, народзена 1901. року у Коцуре и ище велї други.

Дружтво за руски язик, литературу и културу постгумно видало вибрани роботи Янка Барни у кнїжки Так приповедали нашо дїдове у едициї "Одняте од забуца" число 25.

Янко Барна бул член Дружтва за руски язик, литературу и културу од 1979. року. Єден час бул предсидатель Предсидательства Дружтва (2005-2009), a потим и член Надпатраюцого одбору Дружтва.

Янко Барна бул оженєти зоз Ґеорґину родз. Достанич.

После чежкей хороти Янко Барна умар у своїм 65. року 15. юния 2020. року у Темеринє, дзе є и поховани.

Вонкашнї вязи

http://www.druztvo.org/ruski/vidania/Studia%20Ruthenica%2027%202021.pdf Янко Барна (1955-2020), Studia Ruthenica, Дружтво за руски язик, литературу и културу, ч. 27, 2021, б. 144

Др Юлиян Рамач, http://www.druztvo.org/ruski/vidania/Studia%20Ruthenica%2028.%202022%20Pdf..pdf Вредни историйни и етноґрафски записи (Янко Барна Так приповедали нашо дїдове, 2022), Studia Ruthenica, Дружтво за руски язик, литературу и културу, ч. 28, 2002, б. 29

Мр Славомир Олеяр, http://www.druztvo.org/ruski/vidania/Studia%20Ruthenica%2028.%202022%20Pdf..pdf Краса и чежкосц салашского живота (Янко Барна Так приповедали нашо дїдове, 2022), Studia Ruthenica, Дружтво за руски язик, литературу и културу, ч. 28, 2002, б. 30

Любомир Медєши, http://www.druztvo.org/ruski/vidania/Studia%20Ruthenica%2028.%202022%20Pdf..pdf Глєданє святих апостолох (Янко Барна Так приповедали нашо дїдове, 2022), Studia Ruthenica, Дружтво за руски язик, литературу и културу, ч. 28, 2002, б. 31

Мр Гелена Медєши, http://www.druztvo.org/ruski/vidania/Studia%20Ruthenica%2028.%202022%20Pdf..pdf Нєт анї салаши, анї ґу нїм чапаши (Янко Барна Так приповедали нашо дїдове, 2022), Studia Ruthenica, Дружтво за руски язик, литературу и културу, ч. 28, 2002, б. 33

https://www.ruskeslovo.com/%d0%b2%d0%b8%d1%88%d0%bb%d0%b0-%d0%ba%d0%bd%d1%97%d0%b6%d0%ba%d0%b0-%d1%8f%d0%bd%d0%ba%d0%b0-%d0%b1%d0%b0%d1%80%d0%bd%d0%b8/ Вишла кнїжка Янка Барни, Рутенпрес, 5. фебруар 2022

https://www.rtv.rs/rsn/%D0%B4%D1%80%D1%83%D0%B6%D1%82%D0%B2%D0%BE/%D0%B2%D0%B8%D1%88%D0%BB%D0%B0-%D0%BA%D0%BD%D1%97%D0%B6%D0%BA%D0%B0-%D1%8F%D0%BD%D0%BA%D0%B0-%D0%B1%D0%B0%D1%80%D0%BD%D0%B8_1311835.html Вишла кнїжка Янка Барни, Радио Телевизия Войводина, 05. фебруар 2022

https://www.ruskeslovo.com/%d1%83%d0%bc%d0%b0%d1%80-%d1%8f%d0%bd%d0%ba%d0%be-%d0%b1%d0%b0%d1%80%d0%bd%d0%b0-1955-2020/ Умар Янко Барна (1955-2020), Рутенпрес, 29. юний 2020