Hooiberg
Parti di | Karibe |
---|---|
Kontinente | Amérika |
Pais | Aruba |
Situá na teritorio administativo | Oranjestad |
Koordinato geográfiko | 12°31′1″N 69°59′42″W |
Hooiberg ta un sero y un bario na Aruba, den region di Santa Cruz. E sero tin un haltura di 167,5 meter y ta e di dos sero mas halto di e isla, despues di Jamanota. Hooiberg, cu tin forma di un cono, ta situa meymey e isla y ta visibel for di casi tur skina di e isla. Tin un trapi di beton cu ta hiba na e top di e sero. Riba dianan cu visibilidad halto por observa Venezuela for di e top di e sero.
Desde 2022 Hooiberg ta suheto di un proyecto di embeyecemento, financia pa ATA y TFEP. Esaki a encera renovacion di e trapi, decoracion cu obra di arte di mosaico y ponemento di hut y puntonan di observacion riba e sero.[1]
Historia
Den siglo 19 tabata usual pa uza Hooiberg komo punto di salida pa midimento di tereno. Banda di esey e sero a sirbi como punto di orientacion y vigilancia pa e pueblonan indigena, cual tabata uza esaki pa explora e laman, manera ta mustra e artefactonan di cocolishi cu a ser encontra.
Den tempo moderno e sero tin varios funcion, entre otro e ta duna alohamento na e palonan di radio, television, satelite y antena cu SETAR ta uza, y lus di navegacion.[2] Na 1951 architecto Eduardo Tromp a construi un trapi di concret cu 900 step pa facilita mantenemento di e instalacionnan aki. Masha poco habitante local a boga pa construi e trapi. Sin un plan detaya a traha e trapi denter di tres luna. Despues el a wordo reconstrui y manteni mas biaha. E inicial 900 step ya no tey mas; desde 2022 e trapi ta consisti di mas o menos 587 step.[3]
Hooibergiet
Hooibergiet ta un piedra cu ta forma gran parti di e ser'i Hooiberg. E ta un piedra hopi duro y unico cu ta wordo encontra solamente na Aruba y Islandia. Color di e piedra ta preto, parecido na graniet cu ader di kalki aden.
Galeria
-
Trapi riba ser'i Hooiberg
-
Gazebo na mitar caminda di e trapi
-
Hooiberg cu arco iris
-
Hooiberg cu Sero Biento (meymey) y Sero Canashito (robes) na aña 1964.
-
Instalacionnan di Setar den top di Hooiberg
-
Barancanan di hooibergiet riba top di ser'i Hooiberg (cu Aeropuerto Internacional Reina Beatrix den fondo)
-
Bista di Hooiberg mira for di Sero di Hudishibana
Fuente, nota i/òf referensia
|
Mira tambe e kategoria Hooiberg di Wikimedia Commons pa mas dato mediatiko tokante di e tema aki. |