T-72
![](http://upload.wikimedia.org/wikipedia/commons/thumb/c/c6/237th_Tank_Regiment_during_exercise_with_T-72B_at_the_Pogonovo_TG_%2802-06-2020%29_12.jpg/220px-237th_Tank_Regiment_during_exercise_with_T-72B_at_the_Pogonovo_TG_%2802-06-2020%29_12.jpg)
Lo carri T-72 es un carri de combat principau sovietic de segonda generacion desvolopat entre 1967 e 1971. Armat d'un canon de 125 mm e de doas mitralhièras, es protegit per un blindatge d'au mens 350 mm que pòu èsser completat per de proteccions addicionalas. Coma leis autrei carris d'origina sovietica, es de dimensions reduchas per complicar son aquisicion per una arma enemiga. Segon lei versions, es ansin un veïcul de 41 a 44,5 t d'una longor de 6,86-6,95 m per una largor de 3,59 m e una autor de 2,19-2,23 m. Sa velocitat maximala es de 60 km/h amb una autonòmia de 500 km.
Lo T-72 èra destinat a l'equipament dei divisions d'infantariá de l'Armada Roja[1], ais armadas dei país dau blòt sovietic e a l'exportacion. Foguèt ansin fòrça vendut a l'estrangier e adoptat per lei fòrças armadas de mai d'un país. Pasmens, aquò entraïnèt l'aparicion d'un nombre fòrça important de versions de qualitat inegala.
En causa de sa difusion important dins lo mond, lo T-72 participèt a plusors guèrras amb de resultats variables en causa de la manca d'entraïnament deis equipatges, d'errors grèvas de comandament ò l'utilizacion de versions d'exportacion dotadas de performàncias degradadas còntra de blindats occidentaus modèrnes :
- en 1982, lei T-72 sirians combateguèron de carris israelians amb de resultats equilibrats.
- en 1991 e en 2003, lei T-72 iraquians, qu'avián una poissança de fuòc e un blindatge ben inferiors ai versions sovieticas) foguèron esquichats per lei carris estatsunidencs.
- en Chechenia, plusors unitats russas constituïdas de T-72 foguèron engatjadas sensa sostèn d'infantariá dins de combats urbans. I enregistrèron de pèrdas fòrça importantas.
- en 2008, en Ossetia, lo T-72 foguèt utilizat per totei lei participants amb un avantatge clar per lei carris rus.