Carri d'infantariá
Lo carri d'infantariá es un tipe de carri de combat utilizat durant l'entre doas guèrras e la Segonda Guèrra Mondiala. Destinat a sostenir l'infantariá sus lo prat batalhier, aviá generalament una poissança de fuòc importanta e un blindatge espés. En revènge, sa velocitat èra sovent febla. Lo concèpte foguèt abandonat après 1945 au profiech dau carri de combat principau qu'assegura desenant aquelei missions dins lo combat modèrne.
Istòria
[modificar | Modificar lo còdi]Lo concèpte de carri d'infantariá foguèt principalament desvolopat dins leis armadas francesa e britanica durant l'entre doas guèrras amb de carris coma lo Hotchkiss H35, Renault R35, lo FCM 36, lo Valentine e lo Churchill. Pasmens, l'idèa interessèt tanben lei Sovietics amb lo T-26, un carri d'infantariá leugiera que foguèt produch a mai de 10 000 exemplaris entre 1928 e 1931.
En 1940, lei carris d'infantariá obtenguèron de resultats variats durant la batalha de França. Gràcias a son blindatge relativament espés – segon lei critèris de 1940 – lo Renault R35 resistiguèt ben durant lei combats. Lo FCM 36 foguèt presa per son volum interior mai son blindatge feble èra un problema còntra lei blindats alemands pus pesucs. Lo H35 foguèt una revirada en causa d'una autonòmia tròp febla. Lei Britanics utilizèron sei carris d'infantariá a partir de 1941. Son blindatge e son armament foguèron d'avantatges importants còntra lei blindats italians mai la manca de velocitat compliquèt lei combats còntra lei formacions blindadas alemandas. La produccion dau Valentine foguèt arrestada en 1944 e aquela dau Churchill en 1945. Durant lo conflicte, de versions novèlas apareguèron amb de caracteristicas similaras a aquelei dei carris mejans. En URSS, lo T-26, obsolèt en 1941, subiguèt de pèrdas importantas e foguèt rapidament remplaçat. Pasmens, leis Alemands l'utilizèron per menar d'operacions còntra lei partisans.
Après 1945, lo carri d'infantariá foguèt abandonat au profiech dau carri de combat principau. Pasmens, de Churchill britanics participèron ai combats de 1950-1951 durant la Guèrra de Corèa (1950-1953). Puei, foguèron utilizats per de missions de susvelhança dei regions ocupadas per lei fòrças de l'ONU e finalament retirats dau servici en 1952. Après aquela data, lei carris d'infantariá venguèron rars dins leis armadas modèrnas[1].