Nihon shoki
Lo Nihon shoki ò Nihongi[1] (« Cronicas de Japon ») es un tèxte de 31 capítols escrich per plusors cronicaires japonés (O no Yasumaro, lo prince Toneri, etc.) a la demanda de l'emperaitritz Gensho (715-724). Acabat en 720, l'obratge es redigit en chinés e cònta l'istòria de Japon deis originas mitologicas supausadas dau país fins au rèine de l'emperaitritz Jito (686-697). La version actuala es lo resultat de la compilacion de còpias divèrsas car l'originau es perdut. Contèn unicament 30 capítols car una partida dau tèxte es pas estada retrobada. Detalhant lei meritis e leis errors dei sobeirans e lei relacions diplomaticas de l'archipèla amb China e Corèa, lo Nihon shoki es una fònt istorica important per l'estudi dau Japon ancian. Sa partida legendària es tanben una referéncia per lo sintoïsme, la religion nacionala dei Japonés.
