Jens Knutsen Maurseth
| Jens Knutsen Maurseth | |
| Nasjonalitet | Norsk |
| Statsborgarskap | Noreg |
| Fødd | 8. august 1863 Hornindal |
| Død |
29. september 1927 (64 år) |
| Yrke | fotograf |
| Jens Knutsen Maurseth på Commons | |
Jens Knutsen Maurseth (8. august 1863–29. september 1927) var ein norsk fotograf fødd i Hornindal.
Karriere
[endre | endre wikiteksten]Mauseth gjekk i fotograflære i Bergen og starta som fotograf på Nordfjordeid ca. 1885. Han flytte til Stryn like før hundreårsskiftet og hadde ei kort tid atelier saman med ein annan person i firmaet Maurseth & Tørkildsen. Maurseth fotograferte i Stryn til sin død i 1927. I folketellinga for 1900 står det at han også dreiv som blikkenslager. Maurseth tok bilete for turistmarknaden, som til dømes bilete av turistattraksjonar, hotell og turistskip. I tillegg tok han bilete for den lokale marknaden, som portrettfoto, bryllaupsfoto og bilete teke på oppdrag for lokale verksemder. Maurseth var ein produktiv fotograf.
Arva etter Maurseth
[endre | endre wikiteksten]Då Mauseth døydde, vart kamerautstyret hans selt på auksjon saman med innboet, men negativa var det ingen som ville kjøpe. Desse vart liggande i huset til det skulle seljast i 1944/45. Glasplatene vart levert på garden til Anders Vik, der sonen Ola ville bruke dei til å bygge drivhus. Det vart ikkje noko av drivhuset, og glasplatene vart lagra på loftet på verkstaden til Anders Viks. I 1950 skulle verksteden utvidast, og negativa vart køyrde på søppelhaugen. Ei einaste kasse med 310 negativ vart ståande igjen. Desse tok Ola Vik vare på og i 1975 gav han dei til Stryn bibliotek.
I tillegg til desse 310 frå garden til Anders og Ola Vik, dukka det opp 331 glasplater til, som også vart gitt til Stryn bibliotek. Desse var det lærar Knut Osvold i Skei i Jølster som fann på Dispen i Stryn. I mai 1978 fann Lars R. Lunde først meir enn 1.000 av Maurseth sine negativ på loftet hjå Marta Klemetsdtr. Jacobsen i Stryn, og så ei kasse med negativ oppbevart ein annan stad. Til saman er nesten 2.000 av Maurseth sine glasnegativ redda. I 1992 vart heile denne samlinga overlevert til Fylkesarkivet i Sogn og Fjordane.
Kjelder
[endre | endre wikiteksten]- Jens Knutsen Maurseth, Lokalhistoriewiki.no
- Fylkesarkivet i Sogn og Fjordane på Flickr
- Albertsen, Ragnar H.: Fylkesarkivet i Sogn og Fjordane, Fotoavdelinga (muntlige opplysninger?)
- Albertsen, Ragnar H.: «Ei kjelde å ause frå. Lars Lunde sitt fotohistoriske arkiv er flytta til Nordfjord Folkemuseum», i «Jul i Nordfjord», utg. Firda ungdomslag, 1987.
- Fotografen Jens Knudsen Maurseth, Kjelda, utg. Fylkesarkivet i Sogn og Fjordane, 1-1992.
- Denne artikkelen byggjer på Jens Knutsen Maurseth ved lokalhistoriewiki.no, basert på data frå Preus Museums-registera over norske fotografar og fotografiske samlingar. Artikkelen er lagt ut under lisensen cc-by-sa.