Jean Fouquet

Jean Fouquet
Sjølvportrett i miniatyr, 1452-55
Statsborgarskap	Kongedømet Frankrike
Fødd	1420, 1425, 1410 Tours
Død	1480-åra, 1478, 1481 Tours
Yrke	kunstmålar, miniatyrmaler, designar, illustratør
Sjanger	portrett, religiøst maleri
Jean Fouquet på Commons

Jean Fouquet (1420–1481) var ein fransk målar, ein meister både som målar av bilete og som illustratør av manuskript, ein såkalla illuminator. Sannsynlegvis var det han som fann opp miniatyrportrettet. Han var den fyrste franske kunstnaren som reiste til Italia og med eigne augo erfarte den tidlege italienske renessansekunsten.

Liv

Madonna med barn, 1452 (eine halvdelen av Melun-diptyket)

Jean Fouquet var fødd i Tours. Lite er kjent om livet hans, men det er visst at han var i Italia føre 1447, der han laga eit portrett av pave Eugen IV som døydde det året. Heimkomen til Frankrike, poda han element av den toskanske stilen han hadde tileigna seg i Italia med van Eyck-stilen. Van Eyck-stilen danna basis for fransk målarkunst på 1400-talet, så med innslaget av toskanske stildrag danna Fouquet ein ny skule innanfor fransk målarkunst.

Han arbeidde ved det franske hoffet; for både kong Karl VII, skattemeisteren Etienne Chevalier, og kanslaren Guillaume Jouvenel des Ursins. Mot slutten av si tid vart han hoffmålar til kong Ludvig XI. Arbeida hans kan sjåast som uttrykk for at det franske hoffet forsøkte å styrke den nasjonale identiteten i Frankrike, i oppvakninga etter den lange striden med England i hundreårskrigen.

Verk

Kroninga av Karl VI i Grandes Chroniques de France (1455-60)

Fouquets ypparlege ferdigheiter som illuminator, den nøyaktige attgjevinga av dei finaste detaljar, og hans evne til skarp karakterisering i filigransarbeid, ja heile hans verd som målar kjem særleg til sin rett i portretta og altertavlene som han laga.

Eitt av Fouquets viktigaste måleri er Melun diptyk (ca 1450), som tidlegare fanst i Melun-katedralen. Venstrevengen syner Etienne Chevalier med vernehelgenen Den heilage Stefan, medan høgrevengen viser ei bleik Maria Møy med barnet, omgjevne av raude og blå englar.

Eit sjølvportrett i miniatyr kan vere det eldste, reine sjølvportrettet som finst att i vestleg målarkunst. Dette kjem an på om portrettet Jan van Eyck er kjend for er eit sjølvportrett, noko dei fleste kunsthistorikarar meiner det ikkje er.

Fleire av dei illuminerte bøkene og miniatyrmåleria etter Fouquet er tekne vare på. Han illuminerte mellom anna ein kopi av Grandes Chroniques de France. Frå Fouquets hand er også elleve av dei fjorten miniatyrane som illustrerer ei omsetjing av eit verk av Josefus.

• Franske hoffmåleri
• 
  Gravferda til Étienne Chevalier
• 
  Karl VII som ein av heilage tre kongar.
• 
  Inngangen til Karl V i Paris den 2. august 1358, Grandes Chroniques de France (1455–1460)
• 
  Giftarmålet mellom Karl IV og Marie av Luxembourg

Kjelder

• Denne artikkelen bygger på «Jean Fouquet» frå Wikipedia på engelsk, den 13. september 2012.
  • Wikipedia på engelsk oppgav desse kjeldene:
•  Denne artikkelen inneheld tekst frå ein publikasjon som no er i offentleg eige: Chisholm, Hugh, red. (1911). «Foucquet, Jean». Encyclopædia Britannica (på engelsk) 10 (11. utg.). Cambridge University Press. s. 737. 
• Inglis, E. (2003). «Image and Illustration in Jean Fouquet's Grandes Chroniques de France». French Historical Studies 26 (2): 185–224. ISSN 0016-1071. doi:10.1215/00161071-26-2-185. 
• Inglis, Erik (2011). Jean Fouquet and the Invention of France: Art and Nation After the Hundred Years War. Yale University Press. ISBN 978-0-300-13443-8. 
• Snyder, James (1985). Northern Renaissance Art: Painting, Sculpture, the Graphic Arts from 1350 to 1575. Prentice-Hall. ISBN 978-0-13-623596-5. 

Bakgrunnsstoff

Commons har multimedium som gjeld: Jean Fouquet