Académie de la Grande Chaumière
![](http://upload.wikimedia.org/wikipedia/commons/thumb/2/28/Acad%C3%A9mie_de_la_Grande_Chaumi%C3%A8re%2C_Paris_6.jpg/220px-Acad%C3%A9mie_de_la_Grande_Chaumi%C3%A8re%2C_Paris_6.jpg)
![](http://upload.wikimedia.org/wikipedia/commons/thumb/f/f9/1912-2015_receipt-nouvelle-academia-de-la-grande-chaumiere_cc0_gt-i9305_3264x2448px_e-1-a_eero-nelimarkka_pho.jpg/220px-1912-2015_receipt-nouvelle-academia-de-la-grande-chaumiere_cc0_gt-i9305_3264x2448px_e-1-a_eero-nelimarkka_pho.jpg)
L'Académie de la Grande Chaumière var ein privat kunstskule i nummer 14 i rue de la Grande-Chaumière, rett i nærleiken av Montparnasse i Paris i Frankrike. Skulen vart skipa i 1904 av den sveitsiske kunstmålaren Martha Stettler. Ho vart fødd 25. september 1870 i Bern som nummer to i raden av dei sju borna til arkitekten Eugen Stettler, som hadde utdanna seg hjå den franske arkitekten Charles Garnier på den tida då han stod for bygginga av l'Opéra Garnier i Paris. Martha Stettler døydde 16. desember 1945 i Châtillon sørvest for Paris.
l'Académie de la Grande Chaumière hadde opplæring i både kunstmåling og skulptur, og vart særs namngjeten på byrjinga av 1900-talet som fylgje av at viktige kunstnarar var lærarar. Mange elevar frå ulike land søkte seg difor til skulen, mellom dei fleire som vart nasjonalt eller internasjonalt kjende i ettertida. Det hadde nok òg sitt å seie at området le quartier du Montparnasse utvikla seg til eit kunstnarsentrum i Paris utover på denne tida. Sjølv om skulen ikkje låg i det geografiske sentrum for den aktiviteten, vart han likevel assosiert med den kunstnarlege verksemda og det kunstnarlivet som utfalde seg på Montmartre.
Undervisninga vart i 1957 teke opp att av familien Charpentier i to atelier i det same huset ved å skipe l'Académie Charpentier, men nyttar det gamle namnet l'Académie de la Grande Chaumière på både huset og på skulen.
Académie Colarossi[endre | endre wikiteksten]
Kunstskulen Académie Colarossi, som låg i nummer 10 i rue de la Grande-Chaumière, vart òg kalla «Académie de la Grande Chaumière». Denne skulen var skipa i 1870 av den italienske skulptøren Filippo Colarossi, og opphøyrde i 1930-åra. Kunstskulen som Martha Stettler opna i 1904 i nummer 14 vart såleis eit nytt (nouvelle) Académie de la Grande Chaumière.