Lüttasien
![](http://upload.wikimedia.org/wikipedia/commons/7/7a/Asia-minor-tu-map.png)
Lüttasien un Anatolien (Up Törksch Anadolu, Greeksch: Ἀνατολία) sünd de beiden Naams for dat grote Halfeiland ganz in’n Westen vun Asien. Hüdigendags maakt dat den asiaatschen Deel vun de Törkei ut. De Naam Anatolien kummt vun dat greeksche Woort for „upgahn Sunn“ oder „Osten“. De Römers hefft dor „Asia minor“ to seggt, wat „Lüttasien“ bedüden deit, to’n Unnerscheed vun dat grote Asien. Unner düsse beiden Naams is dat Rebeet al siet mehr as tweedusend Johren bekannt.
Geografie
[ännern | Bornkood ännern]Anatolien sien Charakter maakt in dat Binnenland de hogen Barge ut. Dor herrscht Landklima. Langs de Küsten liggt Siedland mit Mediterran Klima. Up dat Halfeiland kaamt jummers wedder Eerdbeven vor. Dwars dör Anatolien loppt en Brööksystem vun Süüdwest na Noordoost. Dat is de Grenz twuschen de Araabsche Platen in’n Osten un de Anatoolsche Platen in’n Westen. Vunwegen, dat de Araabsche Platen sik na Norden to rögen deit, warrt de Eerdköst horizontal verschaven. Dor warrt bannigen Druck bi upboot, de denn dör Eerdbeven wedder afboot warrt.
Historie
[ännern | Bornkood ännern]In’n Loop vun Dusende vun Johren hefft allerhand Völkers un Kulturen ehre Sporen up düt Rebeet achterlaten, as de Hethiters, de Aramäers, de Greken, de Kelten (Galaters), de Römers, de Byzantiners, de Seldschuken, de Osmanen, de Kurden, de Armeniers un de Törken. Dat warrt ok seggt, dat vun Lüttasien her allerhand Völker afstammen doot, as de Indoeuropäers un de Etruskers.