De lütte Ruup Jümmersmacht

De lütte Ruup Jümmersmacht is en Billerbook för Kinner von Eric Carle, dat 1969 toeerst as The Very Hungry Caterpillar op Engelsch rutkamen is. Dat Book is op de ganze Welt in över 50 Spraken översett un över 30 Millionen Maal verköfft worrn. Op Plattdüütsch is dat 2008 as Höörbook von Jasper Vogt rutkamen.

Dat Book vertellt von en Ruup, de ut ehr Ei slüppt un sik in een Week dör allerhand Soorten Eten fritt. An’t Enn von de Week is se dick un rund, warrt en Popp un denn en Botterlicker.

De Freetlöcker von de Rupp sünd worraftig Löcker in de Sieden von dat Book.

Dat Book is in ganz eenfache Wöör un korte Sätz hollen un is so besünners good för ganz lüttje Kinner lesen to lehren. Dorbi lehrt dat Book blangenbi den Levenszyklus von en Ruup, dat Tellen bet fiev, de Wekendaag un verscheden Soorten Eten.

Carle harr toeerst plaant, dat dat Book A Week with Willi Worm heten un von en grönen Worm hanneln schull. Carle sien Verleger seed denn, dat en grönen Worm keen goden Held för dat Book afgifft, un deed en Ruup vörslagen.

Bookdaten

• Jasper Vogt: De lütte Ruup Jümmersmacht. (Höörbook) Jumbo-Verlag, ISBN 978-3-8337-2206-6