Unforgiven
| Filmdaten | |
|---|---|
| Plattdüütsch Titel: | — |
| Originaltitel: | Unforgiven |
| Düütsch Titel: | Erbarmungslos |
| Produkschoonsland: | USA |
| Johr vun’t Rutkamen: | 1992 |
| Läng: | 131 Minuten |
| Originalspraak: | Engelsch |
| Öllersfreegaav in Düütschland: | FSK 16 |
| Filmkru | |
| Speelbaas: | Clint Eastwood |
| Dreihbook: | David Webb Peoples |
| Produkschoon: | Clint Eastwood |
| Musik: | Lennie Niehaus |
| Kamera: | Jack N. Green |
| Snitt: | Joel Cox |
| Szenenbild: | Henry Bumstead |
| Dorstellers | |
| |
Unforgiven (op plattdüütsch so veel as „nich vergeven“; dt. Titel: Erbarmungslos) is de Titel vun en US-amerikaanschen Laatwestern ut dat Johr 1992. Bi den Independentfilm hett Clint Eastwood de Hööftrull speelt un weer ok Speelbaas un Produzent. Wietere grote Rullen hebbt Gene Hackman un Morgan Freeman speelt. De Film is mit veer Oscars uttekent worrn.
Inholt
[ännern | Bornkood ännern]In de verslapenen lütte Stadt „Big Whiskey“ wüllt twee Cowboys sik ’n beten vergnögen. Man, een vun jem sleiht en en Hoor brutal tosamen, as se em wat utlachen deit. Mit en Mess snitt he ehr in’t Gesicht un verstümmelt ehr so dull, dat de annern Horen en Koppgeld op de beiden utsetten doot. In de Jagd op dat Geld warrt ok de desillusioneerte Revolverheld William Munny rintogen, de intwüschen in de Johren kamen is. He hett sien oolt Verbrekerleven achter sik laten un is en ordigen Ehmann, Vadder un Swientüchter worrn. Liekers blifft dat Leven em dat Glück schullig: Sien Fro blifft na wenige Johren dood, sien Farm warrt vun de Swienpest bedrapen un draut em finanziell in’n Ruin to drieven. As en Jungspund, de sik Schofield Kid nömen deit, bi em opkrüüzt un vun dat Koppgeld vertellt, beslutt he, sien Hoff un sien twee Kinner vör twee Weken alleen to laten. Ofschoonst he nich mehr goot scheten kann un he ok kuum noch op en Peerd opstiegen kann, besöcht he sien ollen Partner Ned Logan, de jüst so frustreert is. Tosamen riedt se Kid achterran üm tosamen dat Geld introstrieken. Kid stellt sik rut as en grootmuulschen Dördriever, de bito noch kortsichtig is un alleen keen Chance hett.
De Reis un dat slechte Weder hett Munny so tosett, dat he Fever kriggt, kuum dat de dree in Big Whiskey ankamen sünd. Sheriff „Little Bill“ Daggett, de fröher sülvst mol en Revolverheld weer, hett keen Intresse doran, dat in sien Rebeet Blood vergaten warrt. He grippt Munny in’n Saloon op, wiel de annern beiden Koppgeldjagers mit de Horen verhannelt, un sleiht em gresig tosamen. Liekers maakt se wieter, as Munny weder bi Kräften is. Se finnt den eersten vun de beiden Cowboys un will am an de Siet maken. Man, Ned mag nich mehr op Minschen scheten. Munny övernimmt dat för em, kann aver nich mehr so goot drapen. He dröpt em in’n Buuk, so dat de junge Cowboy langsom starvt. Ok an Munny geiht dat klagen un schreen nich vörbi. Ned sütt in, dat he so wat nich mehr doon kann un lett de annern beiden alleen torüch. He warrt op’n Rüchweg opgrepen un vun’n Sheriff foltert, bit he opletzt an sien Sehren doodblifft. Sien Liek warrt vun’n Sheriff vör den Saloon as to Schau stellt, üm annere Koppgeldjagers aftohollen.
Intwüschen hebbt Munny un Kid den annern Cowboy in sien Versteek funnen. Kid schütt em op’n Schiethuus doot – keen grote Heldendaat, as ok de grootmuulsche Kid kort later faststellen mutt. Ok he mutt nu insehn, dat dat keen Speel is, annere Minschen ümtobringen. He seggt Munny to, dat he sien Leven nich wedder Minschen dootscheten will. As en Hoor dat Geld övergeven deit, vertellt se Munny vun Ned sien Dood. Den helen Film över hett he sik dorgegen wehrt, man nu grippt Munny doch wedder na’n Whiskey un wannelt sik torüch in den ollen Süper un Revolverhelden, de he fröher wesen is. He ritt torüch in de Stadt üm den Dood vun sien Fründ torüchtobetahlen. Bi Nacht un Regen dröpt Munny in’n Saloon op Sheriff „Little Bill“ un sien Mackers. Dor kummt dat to’n Showdown, wiel den Munny en Massaker anrichten deit. Dorna ritt he wedder rut ut de Stadt un kehrt torüch na sien Kinner, üm dat Land för jümmer to verlaten.
Kritik
[ännern | Bornkood ännern]- Dat Lexikon vun’n internatschonalen Film beschreev den Film as revisionistischen Western, de de ooltbekannten Strukturen wedder beleven de. Denn geev he en Sichtwies op de Gewalt un ehr Naklapp, de Entmythologiseren de. De Film weer weniger wegen sien Form as veelmehr wegen sien Thema intressant.[1]
- Dat Heyne Filmjohrbook 1993 meen, dat Clint Eastwood en differenzerte Analyys över’t Entstahn un Utbreden vun Gewalt maakt harr un dorbi künstlerisch un mit bittere Ironie de Klischees vun’n Western apenbreken deit. Ok dat Film book meen, dat Unforgiven dat Genre entmythologiseren de.
- Norbert Grob un Bernd Kiefer hebbt in Filmgenres: Western, Reclam 2003 schreven, dat de Filmd en ehmols willen Westen in en sintflootordige Regennacht to ennen gahn lett, in de Gewalt keen Kraft mehr geven deit man blots noch tonichten maakt.
Utteken
[ännern | Bornkood ännern]Unforgiven harr utermatig veel Spood, wat sik in de bannig hoge Tall vun Priesen un Utteken wiest. Alltohopen weer de Film för 62 Filmpriesen vörslahn, un is mit 42 dorvun ehrt worrn. Dorünner weern:
- 1992: de BSFC Award in de Kategorie Best Film
- 1993: de Oscar in de Kategorie Best Speelbaas för Clint Eastwood
- 1993: de Oscar in de Kategorie Best Nevendorsteller för Gene Hackman
- 1993: de Oscar in de Kategorie Best Snitt för Joel Cox
- 1993: de Oscar in de Kategorie Best Film för Clint Eastwood
- 1993: de Golden Globe in de Kategorie Best Speelbaas för Clint Eastwood
- 1993: de Golden Globe in de Kategorie Best Nevendorsteller för Gene Hackman
- 1993: de NSFC Award in de Kategorie Best Film
- 1993: de NSFC Award in de Kategorie Best Dreihbook för David Webb Peoples
- 1993: de ALFS Award as Film vun’t Johr
Anners wat
[ännern | Bornkood ännern]Eastwood hett den Film sien fröheren Mentoren vun’n Anfang vun sien Loopbahn, Sergio Leone un Don Siegel todacht. In’n Afspann is en Henwies dorop för „Sergio un Don“ to sehn.
Literatur
[ännern | Bornkood ännern]- Bernd Kiefer in Filmgenres - Western / Rutgeven vun Thomas Koebner. Reclam junior, Stuttgart 2003, ISBN 3-15-018402-9; Ss. 350-355
- Clay Motley: "It's a Hell of a Thing to Kill a Man": Western Manhood in Clint Eastwood's Unforgiven. In: Americana: The Journal of American Popular Culture (1900-present) 3:1, 2004.
Borns
[ännern | Bornkood ännern]Weblenken
[ännern | Bornkood ännern]- Unforgiven in de Internet Movie Database (engelsch)
- Kritiken to’n Film op Rotten Tomatoes
- Sammelte Kritiken op Metacritic.com