Theodor Riphan

Theodor Riphan (* 1577 in Neuss; † 14. Januar 1616 in Köln) weer Wiehbischop in Köln.

Riphan keem ut Neuss un weer Perfesser von de Theologie in Köln. Dor weer he von 1604 bet 1605 ok Rekter von de ole Universität Köln. An’n 30. August 1606 is he to’n Titularbischop von Cyrene un Wiehbischop in dat Arzbisdom Köln maakt worrn. De Apostoolsche Nuntius Attilio Amalteo hett em an’n 13. März 1607 in’n Kölner Doom to’n Bischop wieht.

1616 hett he bi en Preddigt in de Kölner Raadskapell St. Maria in Jerusalem en Slaganfall hatt un is von de Folgen doodbleven. He is in de Kölner Parrkark St. Laurentius begraven worrn.