Vootbal
![](http://upload.wikimedia.org/wikipedia/commons/thumb/4/42/Football_in_Bloomington%2C_Indiana%2C_1995.jpg/300px-Football_in_Bloomington%2C_Indiana%2C_1995.jpg)
![](http://upload.wikimedia.org/wikipedia/commons/thumb/2/2a/UEFA-Women%27s_Cup_Final_2005_at_Potsdam_1.jpg/220px-UEFA-Women%27s_Cup_Final_2005_at_Potsdam_1.jpg)
![](http://upload.wikimedia.org/wikipedia/commons/thumb/c/c9/Boisko.svg/220px-Boisko.svg.png)
Vootbal is nen balsport wat med de vöte en et höyvd spöäld wördt. Hyrby is et dool üm den bal by de andere ploge in et dool te krygen, wat eynen pünt upleyvert. De ploge wat an et ende van de spöältyd de meyste pünten hevt, is winner. Vootbal is de meyst spöälde sport up de wearld.
Ne ploge besteyt uut 11 spöälers, wårvan as der eyne in et eygene dool steyt. Dit is den doolman, of up syn engelsk (goal)keeper. Gröttere plogen hebbet ouk wesselspöälers, dee as köänet invallen as nen spöäler in et veld wat krigt of as den träner ne andere spöltaktik wil gebruken. Wedstryden wordet in gode banen leided döär nen skeidsrechter en syne grensrechters. See sint unpartydig en sorget dat nen wedstryd eyrlike en good verlöpt.
As an et eande van de spöältyd beide beide partyen een lyk antal pünten hevt, wördt espröäken van een lykspel. In so een geval kan de wedstryd worden verlängd med meyr spöälminuten (de so nöymde blessuretyd) of med ne strafsküppenryge.
Dool van et spel
[bewark | bronkode bewarken]By vootbal is et dool üm den bal in et dool (de goale) van de teagenploge te krygen. Spöälers magt dårvöär et heyle lyf gebruken, behalve de handene. Nen uutsündering hyrup is den doolman, den as ouk med de handene den bal mag anraken.
Veld
[bewark | bronkode bewarken]Een officieel wedstrydveld is een rechthökig grösveld van 90 x 120 meter. An weaderskanten steyt een dool med een vangnet der in. Um den rand van et veld is ne lyne trökken, de sydlyne. Oaver et midden van et veld löpt langs de korte kante de middenlyne, den as et veld in twey spöälsyden updeylt. In et midden van disse lyne, et absolute midden van et veld, ligt nen kring med in et midden dårvan nen middenstippe. Um de beide dolen hen löpt ouk ne lyne in nen rechthook. Dit nöömt se et 16-metergebeed. Dårbinnen löpt noch weader nen rechthook üm et dool hen.
Spelverloup
[bewark | bronkode bewarken]Nen wedstryd vangt an up den middenstip. Üm te bepålen wükke ploge mag beginnen, smit den skeidsrechter een müntstükke in de höygte, wårby beide partyen ne syde van de münt keset. De partye van de müntsyde den as by dalekumst når boaven ligt, mag aftrappen. Den skeidsrechter blöst up ne floite en de tyd begint te loupen. De aftrappende partye mag med twey spöälers in de middenring stån. De rest van de spöälers stelt sik up in ne vöäraf bepålde formaty, an de eygene syde van de middellyne. Den aftrapper spöält den bal når den tweyden aftrapper, den as em döärspöält når de eygene partye. Vanaf den aftrap magt de beide partyen oaver de middellyne hen. De andere partye probeert den bal af te neamen döär em te underskeppen wanneyr nen spöäler em an nen plooggenout döärspöält.
As nen spöäler den bal oaver de sydlyne spöält, krigt de teagenpartye nen inworp. Dee magt dan vanaf de sydlyne den bal med de handen når de eygene ploge smyten. De teagenpartye mag dat weader proberen te underskeppen. As ymand den bal by de teagenpartye in et net sküt, krigt syne ploge ne pünte. Et spel valt stil en de partyen stellet sik vannys up in öäre anvangsformaty. De doolman mag den bal når vöärden sküppen en proberen dårby so kort möägelik by et dool van de teagenpartye te koamen of rechtstreyks når eyne van de eygene anvallers. Hee kan der ouk vöär kesen üm nen uutworp te doon, so dat den anval vanuut de verdeadiging upbouwd kan worden.
As nen spöäler den bal an de sydkanten van et eygene dool oaver de sydlyne stoat, krigt de teagenpartye nen corner (hooksküp). See magt den bal dale leggen in den hook an de kante wår as de faute maked is, en van dåruut vry sküppen. Beide partyen versamelt sik in et 16-metergebeed. Denne wat den hooksküp neamt, hevt meyrere möägelikheiden: proberen den bal rechtstreyks med nen krül in et dool te treaden, den bal houge in de versamelde massa spöälers sküppen so dat eyne van de eygene spöälers em med et höyvd in et dool kan koppen óf in samenwarking med ne plooggenout van butenaf nen anval upsetten.
Nen officiälen wedstryd duert twey mål 45 minuten, med ne pause tüskendöär. Vake kummet dår ouk noch wat minuten achteran üm de verlöären tyd an wessels, oavertreadingen of blessures an te vüllen. An et eande van nen wedstryd blöst nen skeidsrechter drey mål achter mekander üm et eande af te kundigen.
Oavertreadingen
[bewark | bronkode bewarken]![](http://upload.wikimedia.org/wikipedia/commons/thumb/7/7d/Ukraine-France_2013.jpg/250px-Ukraine-France_2013.jpg)
Tydens et spel köänet spöälers verskillende oavertreadingen begån. Ymand van de teagenpartye rechtstreyks underuut sküppen of anderssins te nau an de huud kummen mag in gin geval, mär et kan geböären dat ymand underuut geyt as de verdeadigende partye nen tackle "up den bal" düt. Hyrby müt düdelik weasen dat de verdeadiger gin kwåd in et sinne had en dat hee probeert den teagenspöäler nit te raken. As hee et beyn te houge upböärt, kan dat as gevöärlik spel markeerd worden. Den bal anraken med de handene mag ouk nit en wördt as hands markeerd. Nen doolman mag nit te lange wachten med uutstoaten, ümdat dat as tydrekken seen kan worden. Dit solde vöärdeylig künnen weasen as de partye al meyr pünten hevt en et solde de teagenpartye de kans untneamen üm noch weader te skoren.
Når måte de slimheid van de oavertreading kan den skeidsrechter nen vryen trad, of ne geale of roude kaarte tokennen. Et spel wördt stillegd en den skeidsrechter blöst up syne floite. By nen vryen trad mag de slachtofferpartye den bal toleggen en vry når nen medspöäler doon. By eyne van de kaarten geyt et anders: den oavertreader müt by den skeidsrechter kummen, den as de kaarte uut den börsttük haalt. Ne geale kaarte steyt vöär ne ernstige wårskouwing. Ne roude kaarte bedüdet dat den spöäler nit meyr medspöälen mag en unmiddelik van et veld afmüt. Twey geale kaarten in eynen wedstryd ståt lyk an nen rouden.
Ploge
[bewark | bronkode bewarken]Ne ploge of manskap besteyt uut veer spöälerården: den doolman, verdeadigers, middenvelders en anvallers. disse hebbet allemål öäre eygene taken in et spel. Den doolman müt den bal uut syn dool holden, as ymand van de teagenpartye probeert den der in te treaden. De verdeadigers müt sorgen dat de teagenpartye dår geheyls de kans nit vöär krigt, döär se den bal af te neamen en når vöärden te warken. Middenvelders sint de tüskenpartye. See köänet helpen medverdeadigen of -anvallen. Anvallers ståt richting et dool van de teagenpartye. Öären höyvdtaak is et afmaken van den anval döär den bal langs den doolman van den teagenstander in et dool te spöälen. Alle spöälers magt dit proberen as de kans sik vöärdüt.
Den träner kan der vöär kesen üm meyr verdeadigers of jüüst meyr anvallers in et veld te brengen. Tydens nen wedstryd mag hee drey mål nen spöäler wesselen. Dit kan as nen spöäler möde begint te worden, ne geale kaarte kreagen hevt of hee de taktik van de wedstryd wil veranderen. As ne partye achter steyt in de pünten, kan nen träner der vöär kesen üm anvallers te wesselen vöär verdeadigers. Andersümme kan et good weasen üm nen verdeadiger te wesselen vöär nen anvaller as de teagenstand nit te houge is.
Neadersasssiske vootbalplogen
[bewark | bronkode bewarken]In et sassiske språkgebeed sint een antal betaalde vootbalplogen: FC Grönnen, SC Veendam (failliet), FC Emmen, PEC Zwolle, Go Ahead Eagles (uut Deaventer), FC Tweante, Heracles Almelo, AGOVV Apeldoorne (failliet) en De Graafschap (uut Dötekum). Vitesse uut Arnem ligt der korrekt teagenan. In de düütske Bundesliga gevt et Werder Bremen, dee as de neadersassiske språke as marketingmiddel bruket. Dårnöäst gevt et noch de Hamburger SV.
- Nedersaksies in Nederlaand: voe(t)bal
- Platduuts: vootbal (Platduutse schriefwieze Football)