Шка
Нейке — 22 Умарьковонь 2024, 10:50 (UTC+0) Одкстовтоманзо лопанть |
---|
Шка — те пертпельксканть эрьва кодат молемат, конат лиякстовтомить.
Валонть лисьмпарязо — суоминь-угрань кельюрось[1].
Малавиксэнзэ: суом. hetki руз. «мгновение; сейчас; момент»; эст. hetk руз. «миг; момент»; коми чöж (послеслог) руз. «в течение, в подолжение»; мар. шыштэ руз. «время»; хан. sḹṡ ~sis руз. «время, срок, терпение». Вейсэнь кельденть икеле čäčke.
Шкань ловома
[витнемс | витнемс лисьмапрянть]Историянь тонавтнема тевсэнть пек покш значениязо ули видестэ шкань ловоманть. Пек умонь шкатнестэ эзь ульне вейке ладсо иень ловома; кезэрень шкань эрьва раськесь ловоманть ушодылизе эсензэ историянь кодамояк покш событиянь чистэнть саезь. Египтянтнэ шканть ловсть инязортнэнь правлениянь шкаст коряс, гректне — олимпиадатнень коряс, лиякс меремс гимнастической налксематнень коряс, конатнень сынь ютавтнесть Олимпиясо; сехте умонь шкань (кезэрень) римлянтнэ иень ловоманть ветясть сынст прявт ошонть — Рименть путоманть ушодома иестэнть саезь.
Неень шкане иетнень ловомась моли христианской ладсо иень ловоманть коряс. Христиантнэ шкань ловоманть ветить римской императоронть Августонь инязорокс улеманзо 30-це иестэнть саезь. Сестэ, кезэрень сёрмадоматьнень коряс, чачсь Иисус Христос. Наукась невтнзе, што кодамояк Христос арасель. Но ламот кармасть сонензэ озномо (христиантнэ). Мейле (VI-це пингестэнть) Христосонь чачома легендарной иенть сынь примизь эсест иень ловомань васенце иекс. Те иестэнть саезь икелев, минек шкатненень, иень ловомантень мерить «од пинге», те иестэнть саезь мекев удалов, умонь шкатненень, иень ловоманть ветить мекевлангт ды те ловомантень мерить «од пингенть икелень».
Исторической наукась тонавтни событиятнень истя, кода сынь мольсть мельга-мельцек, вейке-вейкень полавтнезь; шкань коряс событиятнень истя мельга-мельцек молемантень мерить хронологической.
Шкась эрзятнень коряс
[витнемс | витнемс лисьмапрянть]Кода эрзятне лемдить-тешкстнить шканть молеманзо?
Шкась — те Инешкипазонь арсевксэсь-теевксэсь. Секскак эрзянь кельсэнть ванстовсь кезэрень кевкстема парцунось. Эрзятне а кевстнить истя: Зяро шкаСЬ? Эрзятне пачк кевкстнить: «Зяро шкаЗО?» . Сонзэ, Инешкипазонть, шказо.
Шка…Шка.. Шка… Те валсонть марявить шканть молема кашторксонзо… Шаштомазо… Ювкадемазо…
Сехте покш шкань ютконтень эрзятне мерить пинге.
Пингенть кувалмазо покш. Ули ловома пинге. Эйсэнзэ 100 иеть. Ули эрямо пинге. Эрямо пингесь онксты ломаненть эли меньгак эриксэнть эрязь пингензэ.
Пинге… Пинге… Пинге… Гайтев валось. Гайги налчирькень свисть сурекс-тетивакс. Пиннньк… ды кивчкадсь эрямо пингесь нолдазь налокс… Азё муик… Косо сон?..
Седе вишка шка пельксэнтень эрзятне мерить ие… Мазый валось… Аволь валгак. Моро… Ие… Ие… Ие…
Эйсэнзэ эрить тундось, кизэсь, сёксэсь, телесь. Эрьва ие пельксэнть эсензэ моронзо. Эрьванть эсензэ гайтезэ.
Ютазь иентень эрзятне мерит меля, мелят, ютась иесь, ансяк ломаненть мельсэ сон кадовсь ды тосо эри. Мелянь тевтне зярс шождасто лецтявить, мельс пракшныть-саевить.
Омбоце ютазь иентень эрзятне мерить маны. Маны, те уш аволь меля. Те седе умок. Мельсэяк аволь весе ютазденть кадовсь. Аволь весе лецтяви, мельс сы-саеви.
Колмоце ютазь иентень эрзятне мерить маныде икеле. Те иесь уш алкукс умонь.
А вана кода ютыть пингеде ламо иеть, сеть шкатненень эрзятне мерить кезэрень пингеть.
Мазый, гайтев эрзянь валось — кезэрень!
Косто сон саевсь минек келентень?
Истямо сон гайтев, теке васоло пургинень зэртьке, кона пачкодсь пилезэть ды кеверезь кевери тей-тов прясот-пилесэть: кезэрень... кезэрень... кезэрень...
Теке аволь валгак, цела ёвкс, конасонть маряви Эрзя раськенть ютазь эрямопингезэ. Эйсэнзэ эрить виев эрзянь цёрат-маралят, мазый эрзянь тейтерть-ават, минек пазтнэ — Инешки Паз, Пургине Паз, Кардаз Сярко.
Те валось сеедьстэ сюлмави истямо валсюлмавксос: кезэрень кой, кезэрень шка, кезэрень моро, кезэрень ёвкс.
Ванкшносынек валонть теема лувонзо.
Койсэм кезэрень валось эрзянь кельсэнть эри пек умонь шкатнестэ, кезэрень шкатнестэ.
Теевсь сон кавто валсто: кезэ+эрень.
Кизэ валось эрзятненень чарькодеви.
Теке эрзянь валось, аламодо полавтовозь, ули суоминь ды мокшонь кельтнесэ. Суоминь кельсэнть сонзэ зэмезэ-смустезэ секе — кизэ. Мокшонсесэнть смустезэ полавтовсь, смустезэ — ие. Мари раськень кельсэнть истяяк ули кизэ валось. Зэмезэ эрзянсенть марто вейке.
А вана эрень валось ней истямо чачосо неень шкань эрзянь кельсэнть а вастневи. Сон теевсь эрямс валстонть. Неень шкасто минь мертяно ЭРЯНЬ, сеть тевтнеде, конат эрямостонок ютасть, тусть удалов, кадовсть удалонок, ютазь читнесэ-иетнесэ, ютазь шкасонть.
Вана истя теевсь ды ванстовсь минек эрзянь кельсэнек те мазыйде мазый, теке моро, эрзянь валось — кезэрень, рузокс — древний.
Иенть эрзятне явтыть ковонь-ковонь. Иесэнть кемкавтово КОВТ. Те ней. Койсэм, икеле эрзятне иесэнть ловсть кемколмово ковт. Ков… Мазый валось… Эйсэнзэ пачк неяви сияждыця ков валдось.
Иесэнть кемкавтово ковт:
- Якшамков — те ковось, зярдо эрьва чистэ — цят якшамо.
- Даволков — учок, эрзя, ловонь даволт-бурят.
- Эйзюрков — лато ды кудо прятнестэ чить кольги, теевить эй сюрот.
- Чадыков — лейтне кармить чадомо.
- Панжиков — виртнева, паксятнева панжтыть цецят-чувтт.
- Аштемков — эрзятне зярыя шка аштить-оймсить сокамодо-видемадо мейле.
- Медьков — эрзятне таргить медь, ярсыть медьте.
- Умарьков — кенерить умарьтне ды лия марьтне-эмежтне.
- Таштамков — эрзятне теить таштавкст сы телентень.
- Ожоков — сёксесь ожолгавты вирьтнень.
- Суньдерьков — читне нурькинеть, суньдерькстнэ кувакат.
- Ацамков — телесь сась ды ацызе моданть ашо ванькс ловсо.
Ковонть эрзятне явтыть истя: касы ков, пешксе ков, машты ков, ковтомо ве (сокор ве). Лисни, явтыть ковонть ниле таргос.
Таргосонть — сисем чить:
Атяньчи, Вастаньчи, Куншкачи, Калоньчи, Сюконьчи, Глямочи, Таргочи.
- Атяньчистэнть кудораськень прявтнэ-атятне макстнить тевть цёраломантненень.
- Вастаньчистэ сыряватне макстнить тевть аваломантненень.
- Куншкачись тешксты таргонть куншканзо.
- Калоньчистэ эрзятне сюконильть Ашо калавантень ды пидильть штюрьба.
- Сюконьчистэ эрзятне кундыть тоначив туезь покштятнень-сэрдятнень лемест.
- Шлямочистэ — шлить банясо.
- Таргочистэ — оймсить аламодо эрьвачинь тевтнестэ.
Ютазь чинтень эрзятне мерить исяк. Омбоце ютазь чинтень мерить исинде икеле.
Колмоце чинтень ды лия а умок ютазь читненень эрзятне мерить улко… улкоть…
Чинть эрзятне явтыть истя: зорянь лозома, пиже валске, валске, чилисемадо икеле, чилисема, чилисемадо мейле, чинь стямо, чи кунша, чи валгома ланго, чи валгома, суньдерьгадома икеле, суньдерькст, чополкст, чокшне, ве, талай ве, пелеве, вень прядома ланго.
Сыця чинтень эрзятне мерить ванды. Омбоце сыця чинтень — вандыме мейле.
Лия сыця шкань юткотнень эрзясь лемди сы валонть марто: сы таргостонть, сы ковстонть, сы иестэнть, сы пингестэнть…
Ней молиця чинтень эрзятне мерить течи. Лиякс меремс те чистэнть. Аволь тона, аволь се, аволь лия конаяк… Течи — те те чись.
Ней молиця иентень эрзятне мерить тедиде. Лиякс меремс, те иеде, те иестэнть.
А вана течинь вентень эрзятне мерить тедеведе. Меремс, ванна истя: — «Тедеведе беряньстэ удынь. Эзинь матедевкшнэяк…».
Лиякс меремс, те веде, те вестэнть.
Весемеде нурька шка юткотненень-пелькстнэнень эрзятне мерить истя: ней… Ней, те ней, сестэ, зярдо ломанесь неи теезенть, теевицянть, теевкшныцянть, сень, мезезь неяви сельмсэ. Те валстонть теевсь нейке валось, конань зэмезэ истямо: шкань апак сацтне, апак таргсе, апак ёмавтне. Лиякс меремс — сеск, эли сеске. Неть валтнэяк онкстыть шканть. Невтить сонзэ нурька ютконзо.
Сехте нурька шкань юткотненень эрзятне мерить сельме кончтавксокс эли сельгень прамос. Неть шка юткотне ювк ютыть, мельгаст а кенерят…
Зярдо эрзясь важодсь валскестэ саезь чокшнес, сестэ мерить чоп. Лиякс — чопотемас, чоподань прамос, чинь перть. Вестэ тевтнеде мерить ВЕНЬ перть:
«Веньберть ютась виев пиземе…»,
— «Вень перть увсо пувась виев варма…»
Истяня эрзятне ловокшность-тешкстнесть шканзо молеманть, зярдо эрзятнень арасельть ды сынь эзть сода шканевтимть (часы).
Вансть чипаенть лангс, ковонть лангс, вансть перть пельга ды эсест ладсо-койсэ, эрзякс тешкстнесть шканть молеманзо.
Рузонь келенть трокст совасть эрзянь кельс шкаютконь од лемтне: час, минута, секунда. Неть валтнэ аволь рузонь. Рузонь кельс сыньгак совасть лия кельстэ.
А ванна кода сынст лемдяма эрзякс? Теевить-арась неть валтнэ эрзянь келенть вельде?
Улема, часонтень эрзякс меремс аваль час, меремс шкакс? Минутантень меремс меньютко (мени+ютко)? Секундантень меремс сескютко (сеск+ютко)? Эли лиякс кода? Эли кадомс келезэнек сазь валтнэнь?
Кие соды? Кияк…
Шказо невтьсы…
Эрзят, илядо пеле эрямо эрзянь мельсэ.
Эрзянь мель, эрзянь кель, Эрзянь Мастор!
Лисьмапрят
[витнемс | витнемс лисьмапрянть]- ↑ Цыганкин Д. В. Этимологиянь валкс / Д. В. Цыганкин, М. В. Мосин. — Саранск : Изд-во Мордов. ун-та, 2015. — 228 с. — На эрз. яз. ISBN 978-5-7103-3050-0 (эрз.)