Asterix l Goulés
Asterix l Goulés (ne l'oureginal, an francés: Astérix le Gaulois) ye ua coleçon de cuontas an zenhicos, criada an 1959 por René Goscinny (argumiento) i Albert Uderzo (zeinhos).
Las abinturas de Asterix aparecírun pula purmeira beç an 29 de Outubre de 1959 na rebista francesa Pilote. An 1961 fui publicado l sou purmeiro lhibro an Fráncia. Goscinny morriu an 1977 i zde 1980 l zenhador Uderzo cuntinou el solo cun nuobas abinturas de Asterix, fazendo tamien ls testos. Até hoije yá fúrun publicados 37 lhibros de Asterix.
Las abinturas de Asterix son cun certeza las cuontas an zenhicos franceses que tubírun mais sucesso anternacional, an 50 anhos yá bendírun mais de 325 milhones de lhibros an todo l mundo i fúrun traduzidas an mais de 100 lhénguas. Fui publicado pula purmeira beç an Pertual an 1966 i todos ls sous lhibros stan traduzidos an pertués.
An Setembre de 2005 fui publicado an mirandés l purmeiro lhibro de la coleçon, Asterix, l Goulés, traduzido por Amadeu Ferreira, cula colaboraçon de Domingos Raposo i Carlos Ferreira. An 2007 apareciu l segundo lhibro de Asterix an mirandés, L Galaton (an francés, Le Grand Fossé), ua eidiçon special bilhíngue, culs testos an mirandés i ne l'oureginal an francés.
