Николай Гоголь
![Николай Гоголь](http://upload.wikimedia.org/wikipedia/commons/thumb/d/df/N.Gogol_by_A.Ivanov_%281841%2C_Russian_museum%29.jpg/180px-N.Gogol_by_A.Ivanov_%281841%2C_Russian_museum%29.jpg)
Николай Васильевич Гоголь (Орос: Николай Васильевич Гоголь, Украин хэл: Микола Васильович Гоголь) нь 1809 оны 3 сарын 31 - 1852 оны 3 сарын 4) нь Украинд төрсөн Оросын сонгодог зохиолчдын нэг юм. "Амьгүй албат", "Тарас Бульба" зэрэг романаараа алдартай. Эцэг Василий Гоголь нь украин хэлээр зохиолоо бичдэг зохиолч байв. Эртний Гоголь-Яновский хэмээх дээдсийн гаралтай овогтон байжээ.
Михаил Булгаков, Фёдор Достоевский, Рюноскэ Акутагава, Фланнери О’Коннор, Франц Кафка нарын алдартнууд Гоголийн уран бүтээл тэдэнд том нөлөө үзүүлсэн гэж тэмдэглэсэн байдаг.
Намтар
[засварлах | кодоор засварлах]Тэрээр Украины Полтав мужийн Великие Сорочинцыд 1809 оны 3 дугаар сарын 20-нд буюу шинэ тооллоор 4 дүгээр сарын 1-нд төрсөн бөгөөд 1828 онд Санкт Петербург руу нүүж, 1831 онд Александр Пушкинтай танилцсан байна. Пушкин Гоголийн авъяас билгийг үнэлэн, нөхөрлөх болсон аж. 1834-1835 онд Петербургийн их сургуульд түүх зааж байлаа. Түүний дараа Петербургт үйл явдал нь өрнөдөг "Невскийн өргөн чөлөө", "Галзуу хүний өдрийн тэмдэглэл", "Хамар" зэрэг өгүүллүүдээ бичсэн байна. Гоголь 1836 онд "Байцаагч түшмэл" зохиолоо хэвлүүлснээр ихээхэн нэрд гарсны зэрэгцээ ихээхэн шүүмжлэлд өртөх болж, Ром руу явжээ. тэрээр байцаагч түшмэл жүжгээ Пушкины тусламжтай бичиж байжээ.
Гоголь үлдсэн амьдралынхаа ихэнхийг Герман, Италид өнгөрөөсөн юм. Тэр үеийн захидлуудаас нь Гоголийг ижил хүйстэн байсан гэж дүгнэж болохоор байдаг. Энэ үедээ алдарт "Амьгүй албат" романаа бичсэн бөгөөд 1-р боть нь 1842 онд хэвлэгдэв. Ихээхэн шүтлэгтэй тэрээр 1848 онд Иерусалим руу мөргөл үйлдэхээр одов. Тэндээс буцаж ирснийхээ дараа бурхны ариун замаар замнахаар шийдэж, бичиж дууссан байсан 2-р ботио шатаасан гэдэг. Харамсалтай нь 10-хан өдрийн дараа Москвад нас нөгчсөн юм. "Амьгүй албат" романы 2-р ботийн зарим хэсэг нь үлдэж хоцорсон бөгөөд хожим хэвлэгдсэн байна.