Кимберли Каган

Кимберли Каган (англи. Kimberly Kagan; 1972 онд төрсөн) — америкийн цэргийн түүхийн эрдэмтэн. Америкийн Дайн судлалын хүрээлэн үүсгэн байгуулагч бөгөөд ерөнхийлөгч нь юм.

Тэрээр Вест Пойнт, Йел, Жоржтауны Их сургууль болон Америкийн Их сургуульд багшилжээ. К.Каганы өгүүллүүд The Wall Street Journal, The New York Times, The Weekly Standard болон бусад томоохон сонин, сэтгүүлд нийтлэгдэж байсан.

Намтар

Тэрээр Ирак дахь олон үндэстний хүчин, АНУ-ын цэргийн үйл ажиллагааны төлөвлөгөөг үнэлэх хамтарсан багт ажилласан. 2008 оны 10-р сард Иракт томилолтоор ажиллаж, 2009 оны 1-р сард CENTCOM-ын Иргэний стратегийн хяналтын хэсгийн бүрэлдэхүүнд мөн ажилласан. Каган 2009 оны 6-7 дугаар сард стратегийн үнэлгээ хийхдээ генерал Стэнли МакКристалын иргэний шинжээчдээс бүрдсэн стратегийн үнэлгээний багийн гишүүнээр Кабулд ажиллаж байжээ.

Тэрээр 2010 оны зун нөхрийнхөө хамт Афганистанд буцаж ирээд генерал Дэвид Петреус Афганистанд үүрэг гүйцэтгэсний дараа түүнд АНУ-ын цэргийн шилжилтийн үеийн ажилд тусалсан юм. Тэдэнд "маш нууц" зөвшөөрөл өгч, талибуудын холбооны дамжуулсан мэдээнд дээр ажиллаж олон цаг зарцуулсан байна. АНУ-ын хүчнийхэн Хаккани сүлжээ рүү довтлох ёстой гэсэн тэдний санааг зүүн зүгийн хээрийн командлагчдад шууд дамжуулсан нь Петреус өөрөө энэ тушаалыг өгөөгүй тул төөрөгдөл үүсгэв. Каган мөн CENTCOM-ын Афганистан-Пакистан дахь Чадвар судлалын төвийн Эрдмийн зөвлөх зөвлөлд ажиллаж байсан.

Каган 2007 онд "Дайн судлалын хүрээлэн" (ISW) үүсгэн байгуулагч бөгөөд ерөнхийлөгч нь болсон юм. Энэ хүрээлэн нь өөрийгөө "Батлан хамгаалах болон гадаад харилцааны асуудлаар тусгайлан судалгаа, дүн шинжилгээ хийх зорилготой, ашгийн бус судалгааны байгууллага" гэж тодорхойлдог. Дайн судлалын хүрээлэн нь дайны бодит байдлын талаар дэлгэрэнгүй тайлан гаргадаг; цэргийн ажиллагаа, дайсны аюул занал, улс төрийн асуудалд анхаарлаа хандуулдаг бөгөөд янз бүрийн мөргөлдөөний чиг хандлагыг судалдаг байна.