Kawasan Saribu Rumah Gadang
![](http://upload.wikimedia.org/wikipedia/commons/thumb/7/7e/Saribu_Rumah_Gadang_3.jpg/438px-Saribu_Rumah_Gadang_3.jpg)
![](http://upload.wikimedia.org/wikipedia/commons/thumb/7/7b/Seribu_Rumah_Gadang.jpg/436px-Seribu_Rumah_Gadang.jpg)
Kawasan Saribu Rumah Gadang adolah namo sabuah tampek objek wisata nan barado di Nagari Koto Baru, Kecamatan Sungai Pagu, Kabupaten Solok Selatan, Sumatra Barat. Kawasan wisata ko marupoan salah ciek tampek wisata nan batema budaya Minangkabau. Dinamoan Kawasan Saribu Rumah Gadang karano di daerah iko tadapek banyak rumah gadang atau rumah tradisional Minangkabau, dalam babagai bantuak jo ukuran. Manuruik data nan ado, jumlah kasado rumah gadang Minangkabau nan ado di kawasan ko iolah bajumlah labiah kurang 192 buah rumah gadang.[1] Pado tahun 2017, kawasan iko dinobatkan sabagai Kampuang Adat Terpopuler di Indonesia.[2]
Awal panamoan
[suntiang | suntiang sumber]Awal mulo pambarian namo Kawasan Saribu Rumah Gadang iko adolah katiko ibu Meutia Farida Hatta Swasono, Menteri Negara Pemberdayaan Perempuan pado maso itu, bakunjuang ka kawasan iko atau Solok Selatan tapeknyo pado tahun 2008. Baliau saketek takajuik dek maliek banyaknyo rumah gadang nan ado di daerah iko. Kamudian Baliau maagia langsuang julukan untuak Solok Selatan sabagai Nagari Saribu Rumah Gadang karanao masih banyaknyo rumah gadang nan ado disinan.[3]
Sajumlah suku Minangkabau tingga di kawasan tasabuik, sarupo suku Malayu, Bariang, Durian, Kampai, Panai, Tigo Lareh, Koto Kaciak, jo Sikumbang. Satiok suku tasabuik punyo masiang-masiang rumah gadang kaum. Kabaragaman suku nan mahuni Kawasan Saribu Rumah Gadang iko manunjuakan bahwasanyo di daerah iko alah mamaliharo toleransi samanjak zaman dahulu.[4]
Tampek
[suntiang | suntiang sumber]Tampek atau lokasi dari objek wisata ko iolah di Nagari Koto Baru, Kabupaten Solok Selatan, Provinsi Sumatra Barat, bajarak kurang labiah kiro-kiro 150 kilometer dari Kota Padang, lamo pajalanan dari kota Padang kurang labiah ampek jam. Kawasan iko marupoan bantuak sabananyo dari pakampungan masyarakaik Minangkabau pado maso lampau, dengan ratuihan rumah adaik Minangkabau, atau rumah gadang nan bajejer di sapanjang jalan pakampungan iko. Sabagian gadang rumah gadang ko kondisinyo masih tarawat baiak. Karano lokasinyo nan artistik, kawasan iko pernah dijadian lokasi syuting babarapo film layar lebar jo film televisi.[4]
Kawasan Seribu Rumah Gadang labiah tapeknyo barado di nagari ketek nan nan banamo Alam Surambi Sungai Pagu, dinamoan jo namo tasabuik karano kawasan iko barado di Kecamatan Sungai Pagu.[5] Alam Surambi Sungai Pagu tasabuik adolah sabuah wilayah adaik di Solok Selatan nan tadiri ateh tigo kecamatan. Dahulunyo, di wilayah iko tadapekKerajaan Sungai Pagu.kerajaan iko punyo peninggalan yaitunyo kawasan nan banyak tadapek rumah gadang nan kamudian kini ko disabuik jo Kawasan Saribu Rumah Gadang.[6]
Pariwisata
[suntiang | suntiang sumber]Banyak nyo rumah adat Minangkabau nan tadapek di kawasan ko, manjadian tampek ko manjadi salah ciek tujuan pariwisata di Solok Selatan. Para wisatawan dapek bakunjung kasiko katiko adonyo festival saribu rumah gadang. Festival ko biasanyo diadoan satiok tahun dek pamarintah satampek. Guno dari festival iko tantunyo mampatontonkan sagalo budaya nan ado di Solok Selatan sarupo panampilan musik tradisional, tarian tradisional, silek, bararak, sarato jo makan bajamba.[7]
Salain mancaliak festival saribu rumah gadang, pangunjuang atau wisatawan dapek pulo mancubo raso manginap di rumah gadang nan alah tuo nan ado di kawasan iko. Babarapo rumah gadang tuo di kawasan iko diantaronyo, rumah gadang gajah maram nan dibangun tahun 1794, Rumah gadang rajo mulie nan dibangun pado tahun 1836. dan rumah gadang tuo lainnyo. Manginap di rumah gadang tuo tantunyo dapek marasoan baliak ka maso lampau sarato pangunjuang di sadioan pulo makanan khas jo makanan tradisional daerah satampek.[8]
Kaadaan kini
[suntiang | suntiang sumber]Pado maso kini ko Kawasan Saribu Rumah Gadang alah masuak ka dalam kawasan pangambangan pariwisata dan sadang dalam proses panatapan sabagai salah ciek situs cagar budaya Provinsi Sumatra Barat.[9] Pado tahun 2017, Kawasan Saribu Rumah Gadang dinobatkan sabagai Kampung Adat Terpopuler dalam Anugerah Pesona Indonesia (API) 2017. Panghargoan itu diagia dek Menteri Pariwisata kapado Bupati Solok Selatan tanggal 25 November 2017.[2] Pado tahun 2019, pamarintah satampek mangatoan bahwasanyo pamarintah pusek alah manyadioan dana sabanyak Rp 110 miliar untuak malakuan revitalisasi jo rehabilitasi total di saluruah Kawasan Saribu Rumah Gadang.[10] Proyek revitalisasi dan rehabilitasi ini akan dimulai pada bulan Mei.[11] Jumlah total rumah gadang nan direhab tasabuik iolah bajumlah 33 buah rumah gadang. Dari jumlah tasabuik di tahun 2020 alah salasai direhab sabanyak 28 buah rumah gadang.[12] Salain itu, pamarintah mambangun pulo sabuah menara pandang di kawasan saribu rumah gadang. Menara ko dapek di gunoan dek pangujuang untuak mancaliak labiah jaleh kawasan rumah gadang ko sarato dapek pulo mancaliak gunuang kurinci.[13]
Rujuakan
[suntiang | suntiang sumber]- ↑ Kelana, Sandy. "Rancangan Booklet Wisata Kawasan Saribu Rumah Gadang di Kabupaten Solok Selatan". 103.216.87.80. Diakses tanggal 2021-01-17.[pranala nonaktif permanen]
- ↑ a b "Kawasan Saribu Rumah Gadang Dinobatkan Sebagai Kampung Adat Terpopuler 2017". antaranews. 26 November 2017. Diakses tanggal 17 Januari 2021.
- ↑ "Berwisata ke Nagari 1.000 Rumah Gadang". Republika. 25 Agustus 2017. Diakses tanggal 17 Januari 2021.
- ↑ a b "Melancong ke nagari saribu rumah gadang Solok Selatan". antaranews. 8 Juni 2017. Diakses tanggal 17 Januari 2021.
- ↑ "Kawasan Seribu Rumah Gadang Kecamatan Sungai Pagu". situsbudaya.id. 8 Juni 2017. Diakses tanggal 17 Januari 2021.
- ↑ "Lokasi Kerajaan Alam Surambi Sungai Pagu". situsbudaya.id. 8 Juni 2017. Diakses tanggal 17 Januari 2021.
- ↑ "Festival Saribu Rumah Gadang di Solok Selatan Resmi Dimulai". kumparan (dalam bahasa Indonesia). Diakses tanggal 2021-01-17.
- ↑ antaranews.com (2018-06-29). "Menengok kawasan Saribu Rumah Gadang". Antara News. Diakses tanggal 2021-01-17.
- ↑ "DESKRIPSI CAGAR BUDAYA TIDAK BERGERAK KABUPATEN SOLOK SELATAN" (PDF). Kemendikbud RI. 8 Juni 2017. Diarsipkan dari versi asli (PDF) tanggal 2019-03-29. Diakses tanggal 17 Januari 2021.
- ↑ Fachri, Febrian (23 maret 2019). "Kawasan seribu rumah gadang akan direhabilitasi total". Republika.co.id. Diakses tanggal 09 oktober 2019.
- ↑ "Kawasan Seribu Rumah Gadang akan Direhabilitasi Total". 23 Maret 2019. Diakses tanggal 17 Januari 2021.
- ↑ "Kementerian PUPR Tata Kawasan Saribu Rumah Gadang di Solok Selatan Sebagai Cagar Budaya". www.pu.go.id (dalam bahasa Inggris). Diarsipkan dari versi asli tanggal 2021-01-21. Diakses tanggal 2021-01-17.
- ↑ "Leluasa Melihat Keanggunan Gunung Kerinci dari Kawasan Seribu Rumah Gadang". Langgam.id (dalam bahasa Indonesia). 2020-10-30. Diakses tanggal 2021-01-17.