Glaukoma
 | Artikel ko maagiah informasi dasa tantang topik kasihatan. Informasi dalam artikel ko buliah digunoan anyo untuak panjalehan ilmiah, bukan untuak diagnosis diri dan indak dapek manggantian diagnosis medis. Paratian: Informasi dalam artikel ko bukanlah resep atau nasihaik medis. Wikipedia bukan pangganti dotor. Kok Sanak paralu bantuan atau ka barubek bakonsultasilah jo tanago kasihatan profesional. |
| Glaukoma | |
|---|---|
 | |
| glukoma pado mato suok (sabalah kida di gambar) | |
| Spesialisasi | Oftalmologi |
| Gejala | kahilangan pacaliakan, sakik mato, mato merah, maloyo |
| Awitan | batahap atau tibo-tibo |
| Faktor risiko | paningkatan takanan pado mato, riwayat kelauarga, takanan darah tinggi |
| Diagnosis | pamaresoan mato |
| Kondisi sarupo | Uveitis, trauma, keratitis, konjungtivitis [1] |
| Parawatan | ubek, laser, operasi |
| Frekuensi | 6–67 juta |
Glaukoma adolah karusakan saraf mato akibaik maningkeknyo takanan pado bola mato.[2] Glaukoma marupoan panyakik mato nan acok tajadi sarato bisa manyababkan mato manjadi buto. Pado taun 2010, organisasi kasihatan dunia (WHO) manunjukan basonyo 39 juta urang di dunia mandarito mato buto nan 3,2 juta diantaro itu disababkan karano glaukoma.[2] Panyakik ko bisa manyarang siapo sajo, tapi nan paliang acok kanai pado urang nan umua nyo labiah 60 taun.[3]
Kalainan gen bisa jadi panyabab utamo tajadinyo glaukoma. Panyabab lainnyo bisa jadi infeksi, paradangan, karano paparan zat kimia, atau panyumbatan pambuluah darah.[2]
Gajala
[suntiang | suntiang sumber]Urang nan mandarito panyakik glaukoma marasokan gajala gangguan pancaliakan, padiah di bola mato, sarato sakik kapalo.[2] Gajala lainnyo bisa tibo-tibo taraso sakik bana di mato jo kapalo, ado nampak palangi di sakitar apo nan awak nampak[4], pandangan nan nampak di mato samakin sampik, lamo-lamo hilang samo sakali. Jikok pado bayi gajalanuo adolah mato manjadi bakabuik.[5]
Jinih Glaukoma
[suntiang | suntiang sumber]
Ado babarapo jinih glaukoma nan paralu diparatian:[6]
Glaukoma Suduik Tabukak
[suntiang | suntiang sumber]Glaukoma suduik tabukak tajadi karano panyumbatan parsial pado trabecular meshwork. Kondisi iko manyababkan tibonyo panumpukan cairan jo maningkek takanan bola sacaro lambek.[6] Glaukoma ko dinamoan suduik tabukak karano suduik drainase nan dibantuak dek kornea jo iris katiko dalam kaadaan tabukak.
Kaluhan nan tibo biasonyo panglihatan mangarucuik kamuko takah tarowongan, atau ado nampak titiak kahitaman nan malayang maikuiakan kamano garak-garik bola mato.[3]
Glaukoma suduik tatutuik
[suntiang | suntiang sumber]Glaukoma suduik tatutuik disababkan dek iris nan manonjol sahinggo drainase cairan tasumbek. Kondisi iko tajadi katiko suduik drainase tatutuik.Takanan pado mato karano glaukoma ko bisa tibo-tibo bisa pulo jadi lambek-lambek.[6] Tando-tando nan timbua untuak glaukoma suduik tatutuik ko biasonyo sakik kapalo bana, padiah mato, mual jo muntah, pancaliakan mulai kabua, ado lingkaran halo di sakitar mato, sarato mato mamerah.[3]
Glaukoma takanan normal
[suntiang | suntiang sumber]Glaokoma takanan normal ko alum bisa dipastikan apo panyababnyo. Namun, karusakan sarafo mato pado glaukoma ko tajadi karano aliran darah nan buruak atau disabuik jo hipersensitivitas.[6] Aliran darah nan buruak bisa diakikaikkan dek lamak nan manumpuak atau disabuik aterosklerosis.[3]
Ado babarapo faktor resiko nan mangakibaikan tajadi glaukoma takanan normal ko, yaitu:[7]
- saraf optik nan sansitip
- kurangnyo aliran darah nan masuak ka saraf optik
- ado riwayaik kaluarga nan punyo panyakik glaukoma
- ado riwayaik panyakik jantuang sistemik
Glaukoma Sekunder
[suntiang | suntiang sumber]Glaukoma sekunder diakibaikan dek karano efek sampiang dari pamakaian ubek-ubek tatantu. Golongan ubek nan bisa mangakibaikan glaukoma biasonyo dari ubek golongan kortikosteroid.[6]
Glaukoma Kongenital
[suntiang | suntiang sumber]Glaukoma kongenital ko biasonyo manyarang anak-anak bayi nan baru lahia ka dunia. Iko bisa tajadi karano ado kalainan katiko bayi lahia.[6]
Glaukoma Neovaskular
[suntiang | suntiang sumber]Glaukoma neovaskular adolah jinih glaukoma nan disababkan dek muncuanyo pambuluah-pambuluah darah di iris mato. Muncuanyo pambuluh darah ko disababkan dek adonyo panyakik lainnyo, takah kanciang manih jo CRVO (struk mato).[7]
Glaukoma pigmentasi
[suntiang | suntiang sumber]Glaukoma pigmentasiadolah glaukoma nan tajadi katiko pigmen warna mato nan ado di iris mato pacah jo tacampua ka dalam cairan mato.[7]
Glaukoma karano trauma
[suntiang | suntiang sumber]Glaukoma karano trauma tajadi karano trauma pado mato, takah trauma tumpua atau trauma tusuak (trauma karano ado nan manusuak mato).[7]
Pangubatan Glaukoma
[suntiang | suntiang sumber]Ado babarapo pangubatan untuak pandarito glaukoma.
Ubek tetes
[suntiang | suntiang sumber]
Ubek tetes untuak pandarito glaukoma ko harus dipakai jo resep dari dotor. Jinih jo dosis ubek ko diagiahan sasuai jo jinih glaukoma nan sadang didarito. Ubek tetes mato nan acok diagiahan dek dotor diantaronyo:[3]
Golongan analog prostaglandin
Contoh ubek nan golongan analog prostaglandin ko adolah latanaprost, travoprost, tafluprost, jo bimatoprost.
Caro pamakaian ubek ko sakali sajo pado malam hari. Ubek ko baru taraso khasiatnyo katiko maso 4 pakan sajak mulai maminum ubek.
Golongan antagonis β-adrenergik
Contoh ubek nan golongan antogonis β-adrenergik ko adolah timolol dan betaxolol. Ubek ko biasonyo dipakai katiko pagi. Jikok pandarito glaukoma punyo panyakik paru-paru, betaxolol akan jadi pilihan dotor untuak resep.
Golongan inhibitor karbonik anhidrase
Contoh ubek dalam golongan iko adolah dorzolamide jo brinzolamide. Ubek iko digunokan tigo kali sahari. Efek sampiang dari ubek ko raso paik di muluik nan tibo sasudah ubek ditetesan.
Golongan parasimpatomimetik
Contoh ubek golongan parasimpatomimetik adolah pilokarpin. Ubek iko digunoan sabagai tambahan ubek untuak kasus tekanan pado bola mati tinggi dalam jangka waktu nan panjang. Ubek ko digunoan katiko urang nan sakik sasudah manjalani prosedur laser tapi takanan pado mato nan diusahokan alum tacapai.
Ubek Minum
[suntiang | suntiang sumber].JPG)
Ado pilihan ubek minum untuak pandarito glaukoma salain ubek tetes. Tapi rasiko nyo labiah tinggi daripado ubek tetes, makonyo ubek minum ko indak direkomendasikan bana.
Ado duo pilihan ubek minum untuak pandarito glaukoma.[3]
Golongan inhibitor karbonik anhidrase
Ubek dari golongan iko adolah acetazolamide. Ubek iko biasonyo hanyo diagiah untuak tarapi sabanta katiko sarangan glaukoma parah.[3]
Golongan hiperosmotik
Golongan iko contoh ubeknyo adolah glisero. Glisero bakarajo maelo cairan dari bola mato ka pambuluah darah. Ubek iko diagiah pado kasus-kasus panyakik parah sarato dalan jangko wakatu singkek sajo.[3]
Tarapi Laser
[suntiang | suntiang sumber]Pangubatan untuak panyakik glaukoma bisa juo jo tarapi laser. Tarapi laser ado babarapo jinih nan ditantuan dotor sasuai jo kondisi urang nan mandarito glaukoma. Babarapo tipe tarapi laser yaitu:[2]
Trabeculoplasty
Trabeculoplasty ko mambukak jaringan nan maambek saluran sahinggo cairan bisa mangalia labiah lancar.
Iridotomy
Iridotomy ko mambuek lubang ketek di bagian iris atau salapuik palangi mato supayo cairan bisa dikaluakan dari mato.
Cyclophotocoagulation
Cyclophotocoagulation yaitu malakukan parusakan pado babarapi jaringan nan batugas mamproduksi cairan sahinggo cairan bisa bakurang.
Pencegahan Glaukoma
[suntiang | suntiang sumber]Pancagahan labiah ancak dikarajoan daripado maubek katiko alah tajadi. Babarapo langkah-langkah pancagahan nan bisa dikarajoan supayo indak tajangkik panyakik glaukoma:[5]
- Manjago kasihatan mato jo mamakan makanan nan manganduang vitamin A.
- Mamareso kasihatan mato sacaro rutin ka dotor mato.
- Pakai palinduang mato katiko baulahrago atau sadang bakarajo jo alat listrik atau alat-alat nan bisa marusak mato. Cidero mato nan parah bisa mangakibaikan glaukoma.
Rujuakan
[suntiang | suntiang sumber]- ↑ Ferri,Fred F 2010.
- ↑ a b c d e Alodokter 2014.
- ↑ a b c d e f g h Hello Sehat 2016.
- ↑ klikdokter.
- ↑ a b halodoc 2020.
- ↑ a b c d e f halodoc 2019.
- ↑ a b c d www.klinikmatanusantara.com.
Daptar Pustaka
[suntiang | suntiang sumber]- Ferri, Fred F. (2010). Ferri's differential diagnosis : a practical guide to the differential diagnosis of symptoms, signs, and clinical disorders (edisi ke-2nd). Philadelphia, PA: Elsevier/Mosby. p. Chapter G. ISBN 978-0323076999.
- "Glaukoma". Alodokter. 2014-08-26. Diakses tanggal 2020-06-24.
- "Glaukoma : Gejala, Penyebab, dan Pengobatan". Hello Sehat (dalam bahasa Indonesia). 2016-09-22. Diakses tanggal 2020-06-28.
- "Glaukoma – Penyebab, Gejala dan Penanganan". www.klinikmatanusantara.com. Diakses tanggal 2020-06-28.
- "Inilah 5 Jenis Glaukoma yang Perlu Diwaspadai". halodoc. 02 Maret 2019. Diakses tanggal 29 juni 2020.
- "Penyakit Glaukoma - Gejala, Penyebab, Pengobatan - Klikdokter.com". www.klikdokter.com. Diakses tanggal 2020-06-29.
- "Glaukoma". halodoc. 22 April 2020. Diakses tanggal 29 Juni 2020.
- "Pengobatan Glaukoma". Alodokter. 2014-08-26. Diakses tanggal 2020-06-29.