Bani Quraisy
| Quraisy قُرَيْش | |
|---|---|
| Bani Qaidar, Bani Adnan | |
| Nisbah | Al-Qurasyi |
| Lokasi | Makkah, Arab Saudi |
| Katurunan dari | Fihr bin Malik |
| Suku induak | Kinanah |
| Agamo | Islam (satalah 630) Politeisme (sabalun 630) |
Bani Quraisy (bahaso Arab: قُرَيْش, pangucapan Hijazi: [qʊrajʃ]) adolah salah satu kabilah Arab katurunan Fihr bin Malik, yaitu suku Arab tanamo nan asanyo manatap di wilayah Makah di Arabia.[1] Nabi Muhammad marupoan salah satu katurunannyo, barasa dari salah satu pacahan sukunyo (klan), yaitu Bani Hasyim.[2] Di maso awa panyebaran Islam, cukuik banyak anggota Bani Quraisy nan manantang dakwah Nabi Muhammad, sampai akianyo masuak Islam kasadonyo kutiko Makah ditaklukkan pado taun 630 M.[3] Sasudah itu, anggota Bani Quraisy sabana banyak nan mamaciak pimpinan dalam masarakaik Islam, misalnyo salamo maso kakuasoan kakhalifahan Rasyidah, Umayyah, jo Abbasiyyah.
Namo
[suntiang | suntiang sumber]Tadapek babagai pandapek tantang asa namo (etimologi) Quraisy. Salah satu pandapek manyatoan baso namo tu asanyo dari namo ewan lauik (ikan hiu), atau qirsy (قرش).[4] Ahli silsilah Hisyam bin al-Kalbi bapandapek baso asa namo tu dari kato "bakumpua basamo", atau taqarrusy.[5] Nisbah (atau nama kaluargo) nan dipakai dek katurunan Quraisy adalah Al-Qurasyi, walaupun pado maso awa umaik Islam, sabagian gadang anggota Bani Quraisy labiah sanang mamakai namo klannyo surang, indak namo kabilahnyo. Balakangan, kusuihnyo satalah abaik ka-13, barulah nan mangaku katurunan Quraisy acok mamakai namo Al-Qurasyi sabagai namo kaluargo.[4]
Sijarah
[suntiang | suntiang sumber]Asa mulo
[suntiang | suntiang sumber]Niniak muyang Bani Quraisy adolah Fihr bin Malik, nan silsilah langkoknyo manuruik sumber-sumber tradisional Arab adolah: Fihr bin Mālik bin An-Nadhar bin Kinanah bin Khuzaimah bin Mudrikah bin Ilyas bin Mudhar bin Nizar bin Ma'ad bin Adnan. Dek itu, Fihr adolah katurunan Bani Kinanah jo silsilahnyo sampai ka Adnan, nan disabuik-sabauik sabagai nan manurunkan "urang-urang Arab utara". Manuruik sumber-sumber tradisional, Fihr mamimpin para pajuang Bani Kinanah jo Bani Khuzaimah dalam mambela Ka'bah di Makkah, nan pado wakatu itu alah manjadi tampek paziarahan banso Arab, malawan sarangan dari Yaman. Namun, kakuasoan jo hak istimewa nan baubuangan jo Ka'bah tatap barado di tangan Bani Khuza'ah. Bani Quraisy muloi baparan kutiko Qushay bin Kilab, katurunan kaanam dari Fihr bin Malik, mangumpuaan dunsanaknyo jo maambiak aliah kakuasoan ateh Ka'bah. Sabalun iko, katurunan Fihr tingga dalam kalompok nomaden nan taseba di antaro para karabaiknyo dari Bani Kinanah.[6][note 1]
Manguasoi Makkah
[suntiang | suntiang sumber]Sadonyo sumber-sumber Muslim abaik patangahan satuju baso Qushay manyatukan katurunan Fihr jo mambuek Bani Quraisy manjadi kakuatan dominan di Makkah.[7] Qushay manampekan babagai klan Quraisy di tampek nan balainan di sakita Makkah. Nan tingga manatap di sakita Ka'bah disabuik Quraisy al-Biṭhah (bahaso Arab: قُرَيْش ٱلْبِِطَاح, har. 'Quraisy nan di Lambah') nan tadiri dari sadonyo katurunan Ka'ab bin Lu'ay jo nan lainnyo. Sadang nan manatap di pinggiran Makkah disabuik Quraisy az-Ẓawahir (bahaso Arab: قُرَيْش ٱلظَّوَاهِر, har. 'Quraisy nan di Tapian'). Manuruik sijarawan Ibnu Ishaq, anak bunsu Qushay yaitu Abdu Manaf satalah gadang dipiliah dek Qushay untuak manjadi panggantinyo sabagai panjago Kabah. Qushay maagiah pulo tangguang jawaek lain nan takaik jo Ka'bah kapada anak-anaknyo nan lain, Abdul Uzza jo Abdu Syams, sarato baso sadonyo kaputusan dek Bani Quraisy aruih dibuek di adokan anak nan tatuo, Abdud Dar. Abdud Dar lai diagiah pulo hak-hak istimewa seremonial, sarupo manjago panji-panji parang Quraisy, mangawasi aia, jo babagai palangkapan nan dibutuahan dek para paziarah nan bakunjuang ka Ka'bah.[8]
Catatan Ibnu Ishaq, ditapsiran dek sijarawan F.E. Peters, manggambaan baso Makkah pado maso Qushay jo katurunan anak-anaknyo alun jadi pusek padagangan; namun, ekonomi kota tu badasa pado ziarah ka Ka'bah, sarato "jabatan-jabatan nan dibantuak untuak kota tu [nan dibuek dek Qushay] anyo manganai urusan maliter jo pangaturan rumah ibadah sajo".[9] Maso itu, anggota Bani Quraisy bukan padagang; tatapi inyo batugeh malayani kagiatan kaagamoan, nan dari kagiatan tu inyo dapek untuang nan cukuik. Salain itu inyo dapek untuang pulo dari pajak nan dikumpuaan dari para paziarah nan datang. Walaupun Qushay mamaciak kakuasoan tatinggi Bani Quraisy, tapi indak sacaro rasmi manjadi rajo ateh kaumnyo, anyo sabagai salah satu dari banyak kapalo suku (syekh) nan takamuko.[10]
Rujuakan
[suntiang | suntiang sumber]- ↑ Khalil, Moenawar (2001) (dalam bahaso id). Kelengkapan tarikh Nabi Muhammad. Gema Insani. p. 41-42. ISBN 9789795617105. https://books.google.co.id/books?id=gFJ2jqndruQC&printsec=frontcover&dq=kelengkapan+tarikh+moenawar+chalil+jilid+I&hl=en&sa=X&ved=0ahUKEwimg_TwouTlAhWEfysKHfckAM4QuwUIPzAC#v=onepage&q=nama%20quraisy&f=false.
- ↑ Khalil, Moenawar (2001). p. 46-67.
- ↑ Anderson, Gary L.; Herr, Kathryn G. (2007-04-13) (dalam bahaso en). Encyclopedia of Activism and Social Justice. SAGE Publications. p. 984. ISBN 9781452265650. https://books.google.co.id/books?id=fy11AwAAQBAJ&pg=PT1068&dq=opening+mecca+fathu&hl=en&sa=X&ved=0ahUKEwiXnZ6IpuTlAhVLSX0KHWYPB8gQuwUILDAA#v=onepage&q=opening%20mecca%20fathu&f=false.
- ↑ a b Watt 1986, p. 435.
- ↑ Peters 1994, p. 14.
- ↑ a b Kutipan rusak: Tag
<ref>indak sah; indak ado teks untuak ref banamoWatt434 - ↑ Peters 1994, pp. 14–15.
- ↑ Peters 1994, p. 15.
- ↑ Peters 1994, pp. 15–16.
- ↑ Peters 1994, p. 16.
Catatan
[suntiang | suntiang sumber]Daftar bacoan
[suntiang | suntiang sumber]- Donner, Fred M. (1981). The Early Islamic Conquests. Princeton: Princeton University Press. https://books.google.com/books?id=l5__AwAAQBAJ&pg=PA51.
- Fück, J. W. (1965). "Fidjār". di dalam Lewis, B; Pellat, Ch; Schacht, J.. The Encyclopedia of Islam, Vol. 2, C-G (edisi ke-2nd). Leiden: Brill. pp. 883–884. ISBN 90-04-07026-5.
- Hawting, G. R. (2000) [1986]. The First Dynasty of Islam: The Umayyad Caliphate AD 661-750 (edisi ke-2nd). London: Routledge. ISBN 0-415-24073-5. https://books.google.com/books?id=9J2CAgAAQBAJ&pg=PA21.
- Peters, F. E. (1994). Mecca: A Literary History of the Muslim Holy Land. Princeton: Princeton University Press. ISBN 0-691-03267-X. https://books.google.com/books?id=tdb6F1qVDhkC&pg=PA13.
- Watt, W. Montgomery (1986). "Kuraysh". The Encyclopedia of Islam, New Edition, Volume V: Khe–Mahi. Leiden and New York: BRILL. pp. 434–435. ISBN 90-04-07819-3.