Pianô
Ny pianô dia zavamaneno maro feo, misy kitendry, ao amin' ny fianakavian-javamaneno misy tadim-peony. Mamoaka feo ny pianô rehefa tsindriana ny kitendry mainty na fotsy eo aminy, amin' ny alalan' ny asan' ny tantanana mikapoka ny tady mifanandrify amin' ny feo tiana hohenoina. Rehefa votsorana ny kitendry dia mitsahatra ny fihovitrovitry ny tady ka mifarana eo ny feo. Ny andalan-kitendry ao amin' ny pianô dia misy kitendry fotsy 52 sy kitendry mainty 36, ka 88 ny fitambarany, izay mirindra araka ny toha-peo krômatika.
Ny ankabeazan' ny maripeo na naoty ao amin' ny pianô dia manana tady telo, afa-tsy ny maripeo ao amin' ny faritry ny feo iva, izay misy tadiny manomboka amin' ny iray ka mankamin' ny roa. Azo tazomina maharitra ny feo na dia votsorana aza ny kitendry, izany dia azo amin' ny alalan' ny fampiasana pedaly eo am-pototr' ilay zavamaneno, izay manainga ny fitaovana mpanapaka feo hiala amin' ny tady. Ahafahan' ny mpitendry pianô mampifandray sy mampifanidry feo ny pedaly mpanalava feo.
Ampiasaina betsaka amin' ny mozika klasika, amin' ny mozika jazz, amin' ny mozika nentim-paharazana ary amin' ny mozikam-bahoaka ny pianô. Na dia eo aza ny havesany sy ny vidiny, ny fahafaha-mampiasa ny pianô amin' ny mozika isan-karazany sy ny fiofanana lalina azon' ny mpitendry ary ny fahabetsahany any amin' ny toeram-pihainoana mozika sy any amin' ny sekoly fianarana mozika ary any amin' ny toerana fanaovana fanazaran-tena, dia nahatonga io fitaovana io ho zavamaneno mahazatra any amin' ny Tontolo Tandrefana.