Felambony
Ny felambony, ao amin' ny bôtanika, dia ampahany amin' ny voninkazo, manodidina ny rafi-pananahany. Izy io dia iray amin' ny singa toa ravina izay miara-mamorona ny vondrom-pelambony amin' ny voninkazo iray, izay ravina nisy fiovana. Ny lokon' ny felambony dia ampahany, miaraka amin' ny hanitra sy ny mamimbony, amin' ny paikady manintona ny biby mpamidra vovobony: ny loko (tsy voatery madera) asehon' ny voninkazo lehibe mitokana na mitoka-monina ary koa amin' ny vondrom-bony itambaran' ny voninkazo kely, dia vokatry ny fiangonan' ny fandoko izay manome famantarana ôptika na mamokatra hafanana, manamora ny fitsidihan' ny biby mpamidra vovobony.
Ny vondrom-pelambony dia ny ampahany anatiny amin' ny londona izay ahitana ny vertisily roa tsy vanom-boa amin' ny voninkazo. Ny felambony amin' ny ankapobeny dia tsy mitovy amin' ny ravimbony. Amin' ny voninkazo feno dia matetika ny felambony no faritra hita maso sy maro loko manodidina ny faritra lonaka. Ny isan' ny felambony dia famantarana ho an' ny fanasokajiana ny zavamaniry: amin' ny ankapobeny dia misy efatra na dimy (matetika) ao amin' ny dikôtiledôna, ary telo (na henenin' ny telo) ao amin' ny mônôkôtiledôna.