Antiziônisma
.jpg)
Ny antiziônisma na antisiônisma dia fanoherana ny ziônisma na siônisma (hetsika mpanindrahindra firenena an' ny vahoaka jiosy ao amin' ny Tanin' i Israely). Ampiasaina io teny io amin' ny toe-javatra samihafa sy mba hamaritana hevitra ara-pôlitika samihafa faritan' ny fankahalana: ny Fanjakan' i Israely, ny famoronana azy, ny maha jiosy ilay fanjakana, ny fizaràn-taniny, ny fanapahan-kevitry ny vahoaka jiosy hisafidy ny karazam-pitondrana tiany hiainana, ny fiheverana ny hetsika ziônista na momba ny lohahevitra hafa toy ny satan' ny fizaràn-tany palestiniana.
Nandritra ny tantara dia anisan' ny lohahevitra tao amin' ny fisaitsainana ara-pôlitika jiosy ny antiziônisma, avy eo dia noraisina tany amin' ny Tontolo Arabo, noraisin' ny nasiônalisma palestiniana, noraisin' ny Firaisana Sôvietika ary tao amin' ny lahateny anti-israeliana. Ny fifandraisana misy eo amin' ny antiziônisma (ny ideôlôjiany sy ny vokany) sy ny antisemitisma dia dinihan' ny manam-pahaizana isan-karazany.
Na dia miseho amin' ny fomba samihafa aza ny antiziônisma dia manaiky ny mpanohana azy rehetra fa nisy lesoka na tsy ara-drariny amin' ny lafiny sasany ny fananganana ny Fanjakan' i Israely ankehitriny, sy ny hetsika hamorona Fanjakana Jiosy manana ny fiandrianany ao amin' ny faritr' i Palestina - ny Tanin' i Israely araka ny Baiboly.
Hatramin’ ny Ady Lehibe Faharoa dia niely teo amin' ny Jiosy ny antiziônisma noho ny antony maro samihafa. Nanohitra ny ziônisma tamin' ny lafiny ara-pivavahana ny Jiosy ôrtôdôksa, satria misongona ny Mesia izany, fa maro amin' ny Jiosy antiziônista laîka kosa no mirona bebe kokoa amin' ny idealin' ny Taonjaton' ny Fahazavana ary nihevitra fa foto-pisainana mikatsaka ny hiverenana amin' ny toe-javatra taloha izay efa tsy azo iainana intsony na tsy mitombina ny ziônisma, nahatsapa ho tsy mahazo aina ny Jiosy antiziônista laîka maro amin' ny fiheverana fa ara-poko fotsiny ny maha vahoaka ny Jiosy.
Nanomboka tamin' ny taompolo 1930 vao resy ny antiziônisma tany amin' ny Jiosy am-pielezana, satria niharatsy tanteraka ny toe-piainan' ny Jiosy tany Eorôpa ary tamin' ny Ady Lehibe Faharoa dia namely amin' ny fomba mahatsiravina ny hôlôkaosta. Taorian' izay, ny fikambanana jiosy antiziônista amin' ny ankapobeny dia nirodana na niova ho fikambanana mpomba ny ziônista, na dia nisy vondrona madinika maro aza, mbamin' ny sampana toy ny American Council for Judaism ("Filankevitra Amerikana ho an' ny Jodaisma"), izay niaro ny fanao momba ny Fanavaozana teo aloha izay nandà ny ziônisma.
Niely tamin' ny vondron' olon-tsotra sy vondrona ara-pivavahana maro koa ny antiziônisma tsy jiosy, anisan' izany ny Arabo ao Palestina izay tena nanohitra ny fanesorana aminy ny tanindrazany amin' ny alalan' ny fanjanahantany. Niely sy mbola miely any amin' ny Tontolo Arabo ny antiziônisma, indrindra eo amin' ny Palestiniana.
Nanamarika ny fahombiazany tamin' ny fananganana ny Fanjakana jiosin' i Israely ao amin' ny faritr' i Palestina ny mpanohana ny ziônisma, ary mikatsaka ny haneho ny antiziônisma ho fanoherana lehibe an' i Israely sy ny fisian' ny Jiosy ao amin' ilay faritra.
Maro amin' ny antiziônista no mikatsaka ny hanolo an' i Israely sy ny fizaràn-tany bodoiny amin' ny fanjakana tokana izay hanome zo mitovy ny Jiosy sy ny Palestiniana. Nanamafy ny antiziônista fa mbola ahafahana manatanteraka ny fisafidianan' ny Jiosy ny sata sy ny fitondrana mety aminy ny fanjakana itambaran' ny vahoaka roa, satria tsy voatery mitaky fanjakana misaraka manokana izany. Matetika ny mpanohana ny ziônisma dia manasongadina fa manana fomba fijery antiziônista ny antisemita sasany.
Iadian-kevitra ny fifandraisana misy eo amin' ny ziônisma sy ny antiziônisma ary ny antisemitisma, izay ahitana akademisiana sy fikambanana sasany mpandalina ny antisemitisma izay mihevitra fa ny antiziônisma dia antisemitisma na antisemitisma vaovao, fa ny hafa kosa mitsipaka ny fampifandraisana toy izany ka milaza fa tsy mitombina izany fomba fijery izany sady fomba iray hanakanana ny fanakianana an' i Israely sy ny pôlitikany, anisan' izany ny fibodoany an' i Jôrdania Andrefana sy ny Salavantanin' i Gaza.