Vegnii a senti na Bosinaa

Bosinate

Vegnii a senti na Bosinaa
Che ho compost sto Carnevaa,
Per divertfivv hoo avuu in caprizj
Sora i trusc di sposalizj
Ch'el minem sbioc, el pùl strascion
Ghe pias a fa semper in st'occasion.

IN MILAN. Dalla Stamparia Tamburin.

Sebben se ved e gram, e bon
In tutt i temp, tutt i stagion,
Sia d' inverna sia d'estaa
A fa di spos, di maridaa,
De primavera, o d' autun,
El ghe semper quaighedun
Che ghe solta in del caprizj
Da fa di trusc per sposalizj;
Già che rutt o tard o prest
Vegnen al meret de fa quest.
Tant el pover, quant el scior
Quant di donn el sent l'odor
Senza fa tanti zerimoni
El streng el grop del matrimoni.

Chi g' ha' l pretest chi ha la scusa
Che no sta ben poeu d andà, a strusa
Sul pericol che ghe sia
Della cattiva marcanzia.
Chi troeuva on besogn a toeu miee
Chi soffre alla nott el frecc di pee
Chi se cerca maridà
Per el sistemma della Ca.
Chi per mett a tecc l'onor,
Chi per pontigli, o per amor,
Chi per fa, a moeud di so parent,
E chi per fa tasè la gent
La maggior part al temp d' adess
El fan per la vista d'interess.

Con tutt quest mi hoo osservaa
Che nel temp de Carnevaa
In pu frequent e numeros
I sposalizj i trusc, i spos,
Per quattà coi divertiment
Com' è i Speziee coi foeui d'argent
I pinolett e brusc, e amar
Che pù de spess, che n' è de rar
Che tocca in del stomegh da ingiottì
Tant la miee, come al mari,
Se tant in lu, com anc in lee
Se troeva di trappel e di pollee
Tant de sora, che dessot
Da dai indree anca per fer rott.

Ma quest no l'è minga l'argoment
Per divertì qui che me sent;
Ho promiss per divertii
Da cantà i trusc, ed i legrii
Che tant el Scior, com el balloss
El fa in sti temp a pù non poss,
E tanti de quii che gha nagotta
Spenden mittaa fin della dotta
In d'ona scena, o in d'on disná,
Per la boria da sfoggiá.

Ma che in appress poeu a quist ghe tocca
Da fa quaresma per la bocca,
A fa di vigili, e di crosett,
Anc che no sien de prezett.

Lassee sta allegher qui Fittavel
Che fan di pranz, e di bon tavel
Ai spes di pover, e di strascion
Che paghen a pes d'or el formenton,
Che fan alzà el ris, e cress el gran
Magara in d'on mes on mezz Sovran.
Là vedii Coegh, e Cardenzee,
Vedii Contraloeur, e Pastizee,
Vedii galantin, Vedii gelaa,
Vedii perter, e vin infiascaa,
Vedii rosoli, vin de Champagna,
Vedii finalment Cort, e Cuccagna,
Giacché ai Fittavel ai temp d'adess
I so rognon van dree a cress.

Anca nei scior de pù importanza
Nei sposalizj el corr l'usanza
Da da ai parent certi disnà
Che costen tesor, e che se sa,
Che per pontigli, ed etichetta
Ghe importa poc andà in bolletta,
Indeberass col terz, el quart,
E fa sciron de tutt i part.
Instess in i scior de mezza tacca.
Che dan el foeugh alla baracca
In occasion de sposalizj;
Anc i marcant ghe l’han per vizj
Nel temp ch’hin spos sta allegrament,
A spes d’imbroj, di falliment.

Ma i legrii passen ben prest;
Car i mee spos: parlem del rest .
Se ved cert spos al di d’incoeu
Da dag in man anc mo ‘l tettiroeu.
Senza figura, ne cervell,
No se ghe ved che oss, e pell,
E se po digh per veritaa
Convalesent dell’Ospedaa.
Se ved de fatt dopo poc dì
Che sti bei spos han tolt mari,
Deventaa come calvari,
Col buell squas semper all’ari,
E paren tanti ca1isson
Con rott la roeusa, e giò i cordon.

Cerchen sti spos da generà
Quand s'hin anc mo lor da formà!
E cert se ved ai noster di
Paricc miee, sossen mari,
Senza forz, nè consistenza
Pcr mett sul camp bona somenza.
Per quest succed ogni moment
I convulsion, i sveniment,
El maa de stomegh l’attac de pett,
E i conseguenz del Lazzarett,
La toss, i reuma, i dolor,
Che nass tutt dai mal umor
Perchè tanti maridaa
No in minga a segn, ne maduraa.

Chi fa na despersa, e chi n’abort,
Chi per lo pù fa i fioen mort,
Chi nass coi scroffol, i umor frecc,
Chi senza forz, pefeg d’on om vecc,
Chi dài alla lus la creatura
Col perscim e la bruttura,
chi malsan e chi stantaa,
Chi malingher, e chi strupiaa,.
Chi da al mond masc, o tosann,
Che se po digh gamber, e rann,
Nassen in mezz ai guaj, ai maa
Per cress i miseri all’Ospedaa,
Bon da mett in la scanzìa
Da servì ai medegh de notomìa.

Mi chi i mee spos no ghè anc mo tutt,
Me resta da divv fors el pu brutt;
Perchè se troeuva di miee
Che ogni fregui g' han gio’l perdee.
O in lecc, oppur stan su
N’ in bon per lor, nè manc per vu.
Hin tant impoll ch’in mal fonduu
Che appena toccai ghe va gió il cuu.
E boegna fa corr innanz indree
La Comaa, el Medegh, o’l Barbee.
Ogni bott ghe voeur la Donna
Da mandá a Santa Coronna
Per i inguent, per i decott,
Per sti miee bon de nagott.

Ghè certi Spos per veritaa
Che fan piang, e fan pietaa;
In ca l’è na vera confusion
No ghè sistemma, e conclusion.

No ghè da scoldas, nè da magià,
Ne manc volentaa da lavorà.
Tant el vestee, che la cantina
L' è tutt l'ann semper in ruina.
I Fioeu strasciaa, e pien de pioeucc,
E i pader coi debet fina ai oeucc.
Miseri de ehi, imbroj de là
E senza mezz da guadagnà.
Guai, fastidi, e pentiment,
Quist hin Spos del temp prefent.

Se del Bosin vorrii on consei,
I me car Spos farisevv mei
Mettevv prima da toe miee
In forz de salut, e de danee
Tant per resist senza fandoni
Al gran pes del matrimoni.
Pes tra i olter al temp d' adess,
Che tutt i di el va dree a cress,
E se no gh’avii robust i spall
Ve trovarii in cas da no portall,
Se no v’ajuta on quai misciee
Per compassion de la miee,
Ch’el toeu l’impegn de protettor
Per voster scorna, e disonor.