Senavra (pianta)
![]() |
Quell articol qì l'è scrivud in Lombard, cond l'ortografia Scriver Lombard. |
![](http://upload.wikimedia.org/wikipedia/commons/thumb/4/42/Brassica_juncea_-_K%C3%B6hler%E2%80%93s_Medizinal-Pflanzen-168.jpg/220px-Brassica_juncea_-_K%C3%B6hler%E2%80%93s_Medizinal-Pflanzen-168.jpg)
G’è diverse piante de senavra, qe le fa tœte part de la fameia de le “brassicaceae”. In certe province, per esempe a Bergem e a Bressa, se ciama anca “senaver” (senàer in ortografia unificada).
- Brassica nigra, l’è la senavra nigra, la prima qe l’è stada coltivada come spezie. I g’ha trovad de la somenza de senavra nigra qe la risal a l'etaa del bronz: l’era ind una abitazion su dei passon (“palafìta”) arent al lag de Bienne in Svizera e anca ind un'imbarcazion cinesa de la preistoria. La se doprava anc’pò indel’Antig Ejitt e la s’è spandida in tœta l’Europa e l’Asia. I Spagnœi i l’ha portada in America. Le so piante le pœl cresser olte infina a 3 meter e ‘l savor dei gran, qe i è plutost picinin, l’è fort e picant.
- Brassica alba (o Sinapis alba), l’è la senavra bianca (in America i la ciama “jalda”). La ven dal Mediterrane, è la s’è spandida indele rejon temperade. Le piante le ruva a vesser olte anca 0,6 meter e i so gran i è plussee grands de qei de i oltre varietaa de senavra.
- Brassica juncea, l’è la senavra mora, qe la se ciama anca “bruna” e “cinesa”. L’è un incrox tra la Brassica nigra e la Brassica rapa, e le so piante i è olte da vun a duu meter. I so gran i pesa el dope de qei de la senavra nigra e el so savor l’è picant istess. La ven dal Nord-Africa, da l'India e da l'Asia centrala.
- Brassica arvensis, l’è la senavra selvadega.
Conotats
[Modifega | modifica 'l sorgent]Le piante de senavra le ruva de rar a vesser olte plussee de 2 meter, le g’ha le fœie de sota qe i è large e a forma de piœma de oxell (in latin se dix “pennatifidae”), qelle de sora i è picinine e slongade. I fior i è jalds e a forma de canon de melgot e i desvilupa i fruts, qe i g’ha dent un sac de arme picinine e redonde qe le se usa per fa la famosa salsa de condiment, col savor tipeg, fort e piccant.
Difusion
[Modifega | modifica 'l sorgent]La senavra la se cognoss in Europa fin dai temp de l’antiga Grecia. I Roman invece i cognossiva le so proprietaa per conservar la fruta, la verdura, i jus de fruta, el most del vin. In França la senavra la se dopra fess, in manera special in Borgogna (l’è famosa qella de Dijon), indove se cred qe i g’ha inventad la salsa de senavra, qe in realtaa l’è una mostarda de senavra.
Medexina
[Modifega | modifica 'l sorgent]La senavra, la g’ha dent de le proteine particular qe le pœl far vegner a certe persone de le forme de alerjia. In certe zone de l'Europa orientala i gran de senavra i ven mes’ciads co la mel e i la doprava per far passar la toss. Anca in America (in particolar in Canada) i doprava la senavra per curar i polmon e la respirazion: se fava un mes’ciot con la farina e l’aqua e se ‘l metiva sul stomeg e su la s’cena, fin qe ‘l brusava un cicinin. Adess i fa anca dei cerots (varda la bibliografia qé sota). La senavra la fa ben anca a la circolazion.
Bibliografia
[Modifega | modifica 'l sorgent]- Black mustard. PDRHealth. Thomson Healthcare. Archived from the original on 2007-07-10. Recuveraa el 2007-07-16.
- Roger M. Grace (2005-02-17). Everything You Ever Wanted to Know About Mustard Plasters. Metropolitan News-Enterprise. Recuveraa el 2007-07-16.