Mart (dia)
|
Quest articol chì l'è scrivud in lombard, con la Noeuva Ortografia Lombarda |
Ind la religion de la Roma antiga, el Mart (latin: Mārs)[1] l’è el dia de la guerra e ancasì vun di protetor de l’agricoltura, carataristeghe che incarnen ben i inizzi de la zitaa de Roma.[2] Fiœul del Sgiœuv e de la Sgiunona, l’era assossenn important ai prateghe religiose de l’armada romana. La pupart di sò feste l’era in marz – el mes che l’ha ciapad el sò nom – e in occiover, i mis che tradizzionalment marcaven l’inizzi e la fin di seson di campagne militare e de la coltivazzion de la terra.[3]
Sota l’influenza ellenizanta de la coltura de la Grezzia antiga, el Mart l’è stait identifegad con l’Ares,[4] i mitologie del qual inn staite reinterpretade sota el nom de ‘Mart’ ind la literadura e art romana. El carater e la dignitaa de Mart inn descompagne e cambien in de di manere fondamentai de quii del sò equivalent gregh, che l’è sovenz sprezzad ind la literadura grega.[5] L’altar del Mart ind el Camp marzian – vun di sit de Roma che el ciapava el sò nom propri de lu – se pensava che l’era stait fait su del Numa Pompili, el rè lesgendari de Roma che ghe piaseva propri tanta la pas; adree al period republegan a ghe se conzentrava denter i ativitaa eletorai. L’August l’ha fait trà in pee un templi al Mart Ultor coma vuna di carataristeghe religiose prenzipai del sò for nœuv.[6]
Descompagn de l’Ares, che l’era vedud soratut coma una forza de destabilizazzion e destruvanza, Mart el representava el podé militar coma una manera de segurà la pas, e in quell aspet chì el vegneva considerad un pader (pater) del popel roman.[7] Ind la sgenealogia mitega romana e ind la fondazzion de Roma, el Mart l’era el bobà de Romel e Rem che l’haveva razzad intravers el violentament de la sazzerdotessa vestal Reja Silvia. La sò relazzion con la Vener la reconzejava simbolegament dò tradizzion diferente de la fondazzion de Roma – Vener l’era la mader divina de l’eroj Eneja, l’assossenn zelebrad refugiad trojan che l’haveva ‘fondad’ Roma devers segoi inanz che el Romel l’ha trait su i prim mur de la zitaa.
Referenze
[Modifega | modifica 'l sorgent]- ↑ Chapter 3, Charles E. Bennett (1907) The Latin Language – a historical outline of its sounds, inflections, and syntax. Allyn & Bacon, Boston.
- ↑ Mary Beard, J.A. North, and S.R.F. Price, Religions of Rome: A History (Cambridge University Press, 1998), pp. 47–48.
- ↑ John Scheid, An Introduction to Roman Religion, translated by Janet Lloyd (Indiana University Press, 2003), pp. 51–52; Robert Turcan, The Gods of Ancient Rome (Routledge, 2001; originally published in French 1998), p. 79.
- ↑ Larousse Desk Reference Encyclopedia, The Book People, Haydock, 1995, p. 215.
- ↑ Kurt A. Raaflaub, War and Peace in the Ancient World (Blackwell, 2007), p. 15.
- ↑ Paul Rehak and John G. Younger, Imperium and Cosmos: Augustus and the Northern Campus Martius (University of Wisconsin Press, 2006), pp. 11–12.
- ↑ Isidore of Seville calls Mars Romanae gentis auctorem, the originator or founder of the Roman people as a gens (Etymologiae 5.33.5).
Ligam de denter
[Modifega | modifica 'l sorgent]Ligam de fœura
[Modifega | modifica 'l sorgent]
Wikimedia Commons el gh'ha dent imagin o alter archivi su Mart
