Stjerneteikn er figurar i stjernene, som er viktige i spådomskunsten astrologi. Dei som trur på astrologi, trur at planetar og stjerner påverkar menneska og korleis liva deira blir.
Det er tolv stjerneteikn. Datoen ein er fødd, bestemmer kva stjerneteikn ein har.
Symbol, teikning og eit lite kart over stjernebildet for stjerneteikna krepsen, løva, jomfrua, steinbukken, vassmannen og fiskane.
I dag veit ein at Jorda bevegar seg rundt Sola, og dessutan rundt seg sjølv. Før visste ein ikkje dette. Då trudde folk at Jorda var i ro, og alt anna bevega seg. Difor trudde dei at Sola bevega seg i ei bane over himmelen i løpet av året. Astrologane delte denne bana inn i tolv delar som dei kalla dyrekrinsen.
Kvar av desse delane inneheld eit stjernebilete eller stjerneteikn. Dei fleste stjerneteikna fekk namn etter dyr. Til kvart stjerneteikn høyrer fleire ting. Astrologar trur at planetane styrer framtida, humøret og personlegdomen til folk.
Dette er stjerneteikna:
Dei som driv med astrologi blir kalla astrologar. Dei ser på korleis planetar og stjerner bevegar seg, og tolkar det dei ser. Sola, månen og dei andre planetane er dei viktigaste å følgje i astrologi. Om lag 150 stjerner er òg med i tolkingane.
Éin som forskar på planetar og stjerner, heiter astronom. Sjølv om orda er like, har ikkje astronomi og astrologi noko med kvarandre å gjere.
Moderne vitskap finn ingen bevis for noko i astrologien. Likevel er det fleire millionar menneske som trur på det.
Astrologar i det som no er Irak laga oppdelinga av bana til Sola, i oldtida. I antikken utvikla greske astrologar oppdelinga og idéane vidare. I Romarriket hadde keisarane astrologar som arbeidde for dei.
I Kina har dei lang tradisjon for astrologi, og det finst spor av dette frå 2600 år fvt. I kinesisk astrologi er stjerneteikna annleis.
Etter at kristendommen kom, blei det færre som trudde på astrologi. Likevel kunne ein framleis lese om astrologi mange stader. I Noreg har det blitt fleire som trur på det, sidan 1970-talet.
