mink

Minken har ein slank og lang kropp med korte bein. Han har òg ein lang og kraftig hale. Hovudet er lite, med små øyre og auge. Snuten har lange vêrhår.

Mink blir omtrent 60 cm lange og veg mellom 0,5 og 1,5 kilo.

Pelsen er tett og blaut med tjukk ull inst. Fargen er vanlegvis mørk brun, med kvitt under haka og på brystet. Det ytste laget med hår er oljete og gjer pelsen vasstett.

Minken er ein god svømmar, og har difor litt hud mellom alle tærne på potane.

Mink lever i stort sett heile Noreg. Dei trivst best på kysten og langs innsjøar med mykje busker og tre. Dei lever for det meste åleine, unnateke i tida der dei skal pare seg.

Mink et fisk, muslingar, krabber, kreps, frosk, mus, fuglar og egg. Dei jaktar mest om natta. Om dagen har dei tørre stader, der dei gøymer seg og søv.

Minken får mellom éin og sju ungar, seint på våren. Ungane er hjå mora heile sommaren og lærer å fange maten sjølv. Utpå hausten dreg dei for å finne eigne stader å leve.

Mink kan leve opp til ti år.

Minken blei teken med til Noreg frå Nord-Amerika, fordi folk ville starte med oppdrett. Pelsen til minken hadde god kvalitet, og blei brukt til å lage jakker og kåper.

I 2005 fanst det omtrent 150 gardar i Noreg som hadde oppdrett av mink. Nokre av dei hadde opptil 10 000 mink på garden.

I 2019 bestemde staten at det skulle bli slutt på oppdrett av mink i Noreg innan 2025.

Minken er ein framand art i norsk natur. Han er ein trugsel mot det andre dyrelivet i naturen. Fuglar som legg egg på bakken er eit lett byte for minken. Minken har heller ikkje så mange naturlege fiendar. Difor kan minken nesten utrydde desse fuglane i nokre område.

Staten i Noreg arbeider systematisk for å avgrense minken i desse områda.

• pattedyr
• kyst
• fisk
• oppdrett