Heimevernet er den største delen av det norske forsvaret, med om lag 40 000 soldatar over heile landet. Heimevernet har sivile og militære oppgåver. Soldatane har oppdrag både når det er fred, og viss det blir krig.
Alle soldatane i Heimevernet har militær trening, frå førstegongsteneste i Forsvaret. Heimevernet blir ofte forkorta til HV, og soldatane blir kalla HV-soldatar.
Når det er fred, skal Heimevernet framfor alt hjelpe ulike delar av det sivile samfunnet i Noreg. Viss det blir ei alvorlig krise, kan HV-soldatar bli sende for å hjelpe. For eksempel har soldatar frå Heimevernet hjelpt til etter naturkatastrofar som flaum. Under koronapandemien hjelpte HV-soldatar til med å vakte grensa. Å hjelpe politiet høyrer òg til oppgåvene.
Viss det blir krig, kan Heimevernet bli sette til å for eksempel vakte og forsvare militære og sivile stader, for eksempel hamner og flyplassar.
Heimevernet er til stades over heile landet. Kvar HV-gruppe har ansvar for området rundt der dei bur. Siden dei bur i nærleiken, kan dei komme raskt til ein stad, for å hjelpe. HV-soldatane er òg godt kjende i området dei har ansvar for.
Soldatar i Heimevernet er som oftast vernepliktige. Ein del av offiserane jobbar i Forsvaret.
Forsvaret i Noreg er delt inn i mange store og små delar. Tre av hovuddelene blir kalla greiner eller forsvarsgreiner. Desse er Hæren, Sjøforsvaret og Luftforsvaret. Heimevernet er eigentleg ikkje ei eiga forsvarsgrein, men blir ofte rekna som det likevel.
Heimvernet vart danna i 1946, tufta på erfaringane til den norske motstandsrørsla under andre verdskrigen.
