Sant'Ambrœuxo

ZE-P	Sta paggina chie a l'è scrita in zeneize, co' ina grafia tipo quella do Prian do 1745

Sant'Ambrœuxo o refua l'intrâ inta gexa a l'impiatô.

Ambrœuxo, santo, dottô da Gexa, vesco e patron de Milan (Treviri 333 ò 340 - Milan 397). Patron di veschi, di prefetti e di avicortoî. Se festezza o 4 d'arvî.

O l'è uña de mascime figue de vesco do IV secolo. Governatô imperiâ, o fu proclamao vesco de Milan (374) e o vègne ghia aotoeive de l'episcopato de l'Itallia do nord. O fu aotô de molte œuvie a carattere exegetico, dogmatico e teologico. Aversaio de eretichi (tra i quæ i arien e i manichei), paghen e discidenti, o fu difensô do primato da Gexa de Romma. O l'intrò ciu votte in contrasto co-o poei de l'impiatô, che a so avizo o doveiva ese consciderao drento a Gexa, no a-o de sorva de questa (prinçipio chi improntò de lê tutto o Medioevo).

Vitta e attivitæ

Divi Ambrosii Episcopi Mediolanensis Omnia Opera, 1527

Arestao orfano do poæ, ch'a Treviri o l'ea foscia prefetto a-o pretoio, o se recò a Romma co-a moæ, a sœu Marçeliña (monnega into 353 ò 354) e o fræ Satiro (m. 378). Protetto da Sesto Petronio Probo, prefetto a-o pretoio, o vègne (370 circa) consularis de l'Emillia e Liguria, con rescidença a Milan. Morto o vesco Aossençio, arian, l'Ambrœuxo, ancon catecumeno, o fu proclamao vesco e in pochi giorni o l'ebbe o battæximo e a consacraçion (7 dex. 374: festa). O començò a preparaçion teologica e o compose daprimma di scriti exegetichi e in lode da verginitæ. Vegnuo influente, o persuase l'imperatô Graçian a repigiâ a legislaçion antipagaña e a ordenâ (382) a rimoçion da stattoa da Vittoia da-a curia do senato, provedimento ch'o provocò de proteste e 'na vivaxe polemica fra l'Ambrœuxo e o Scimmego.

Inte quella ócaxon l'Ambrœuxo o reciamò a-i so dovei de crestian l'inpiao Valentinian II (suceduo a-o Graçian), che lê o l'afermò ese, comme tâ, posto inta Gexa e no a-o de sorvia. O Valentinian e a moæ Giustiña ghe doveivan gratitudine pe-a miscion (uverno 383-384) inta Gallia presso l'uxurpao Mascimo, ch'o s'astègne pe-o momento da l'ataccâ l'Italia. Una segonda miscion (385) a fallì. Ma za redigendo o De fide (378-380) pe-o Graçian e into conçilio d'Aquileia (381), l'Ambrœuxo o s'ea fæto campion de l'ortodoscía contra i arien. Questi ean favoii da-a Giustiña, a quæ a l'inzonse a l'Ambrœuxo de cedighe una gexa; l'Ambrœuxo o rescistette (385), ma o conflito o se feççe ciu aspio l'anno doppo, quande, vegnuo a Milan un vesco eretico, l'Aosençio, l'Ambrœuxo pe no cedila a-o nœuvo vegnuo o feççe ocupâ a baxilica Porçia da-a folla, a quæ ravivâ inta so fè e da-o canto liturgico, mostrao da l'Ambrœuxo, a sostègne un veo assedio, pe scin che-a corte a dovette cede. Poco doppo (Pasqua, 387) o battezzò sant'Aostin.

A mæxima fermeçça mostrò l'Ambrœuxo verso o Teodoxio, quande questi o l'ordinò a riconstruçion, a speize do vesco, da scinagoga de Caliñego destruta da-i crestien, e, sorvettutto, in ócaxon da feroxe represcion de 'na sediçion, ordinâ da-o Teodoxio a Tessalonica (390): i epizodi, sciben che despugiæ di abellimenti lezendai, son una scignificativa apricaçion do prinçippio sorve aregordao (ch'o passò a-o Medioevo) che l'imperatô o l'ea inta Gexa, no de d'ato a quella. L'Ambrœuxo o l'è uña de mascime figue de vesco do sec. IV.

Teologo scarsamente originâ, tributaio di greghi (specce di gren Cappadoci), ma coniatô efficaxe de formule largamente acugeite, o fu eminente into governo ecclexiastego: aversaio di eretichi (i manichei ascì, Zovegnian e Apoinâ de Laodixea) e di discidenti (l'antipappa Urscin; meno feliçe fu l'Ambrœuxo inti rapporti con Costantinopoli e Antiochia, ostezzando Nettaio e Meleççio), e difensô do primato roman (Ubi Petrus ibi Ecclesia); retrovatô de reliquie (di santi Gervaxo e Protaxo a Milan, Vitâ e Agricola a Bologna, e Lazâ e Çerso a Milan); guida aotoreive de l'episcopato de l'Italia settentrionâ; moralista exartatô da castitæ, da caitæ e da giustiççia; regolarizzatô da liturgia, into canto ascì, e aotô de inni (aotentichi, circa una dozeña, in strofe de quattro versci in dimetri zambeghi) che son un di so titoli a-a gloia lettiaia, da lê meitâ ascì comme oratô efficaxiscimo. Di tratæ exegetichi, inti quæ o dœuviò largamente l'allegorismo, o ciu notto o l'è l'Hexaëmeron (in sce-i 6 giorni da creaçion); tra quelli moræ, o De officiis ministrorum, recarcao insci-ô De officiis do Çiçeron, o l'è o primmo tentativo de scintexi de l'etica crestiaña. Importante, comme documenti storeghi, e so lettie.

Iconografia

Inte l'iconografia l'Ambrœuxo, effixao comme vesco, o g'ha pe attributi: o libbro, perché dotô da Gexa (rilevo in stucco de l'XI sec. inta Baxillica ambroxiaña a Milan); l'arviâ, scimbolo de eloquença e aluxivo a-a lezendia che i ave iniettessan l'amê a l'Ambrœuxo figgiœu, sença ponzilo (palioto d'oo inta mæxima Baxilica ambroxaña, do IX sec.); o fragello, aluxivo a-a penitença imposta a-o Teodoxo. A ciu antiga effixe do Santo - sença nimbo e sença atributi - a l'è quella, in mozaico, inta cappella di santi Vittô e Satiro da Baxilica ambroxaña, atribuia a-o V secolo.

Conligamenti esterni

Altri progetti

• Wikimedia Commons

• Wikimedia Commons a contêgne di files in sce Sant'Ambrœuxo