Palasso Gianco
ZE
|
Quésta pàgina a l'é scrîta in zenéize, segóndo a grafîa ofiçiâ |
O Palàsso Gianco (it: Palazzo Bianco) - dîto ascì Palàsso do Lùcco Grimado (it: Palazzo Luca Grimaldi), òpû Palàsso Brignoe Sâ - o l'è 'na costruçión stòrica scitoâ inta stràdda Garibàldi 11 a Zêna, inserîa o 13 de lùggio do 2006 inta lìsta di 42 palassi do Rolli de Zêna, conscideræ Patrimònio de l'Umanitæ UNESCO.
O palàsso o l'òspita 'na seçión di Musei da Stradda Neuva[1] dedicòu a-a pitûa a Zêna e in Ligùria, da-o XVI a-o XVIII sécolo, con de seçioìn d'arte italiann-a, fiamìnga e spagnòlla.
Stöia
[modìfica | modìfica wikitèsto]O Palàsso Gianco o l'òcupa o scîto da câza costruîa da-o 1530 a-o 1540 da Lùcco Grimado, ch'o l'appartegnîva a 'na nòbile famìggia zenéize. Into 1658 o l'è diventòu de propietæ da famìggia Franchi de Candia e into 1711 o l'é stæto cedûo a Maia Durassa Brignoe-Sâ ch'a l'à ristruturòu pe òpera de l'architetto Giacomo Viano (1714-1716). Da alôa o l'è dîto Gianco, pe-o colôre di seu elementi decorativi esterni.
.jpg)
Into 1889, a-a mòrte da Maia Brignoe Sâ De Feræ, duchéssa de Galêa, o palasso o l'è divegnûo propiêtæ do Municipio de Zêna e destinòu a êse museo pùblico. O l'è stæto inauguròu into 1892, o quattroçentenâ da Scovèrta de l'America. Bonbardòu into 1942, o Palàsso Gianco o l'é stæto restauròu da l'architetto Franco Albini. L'alestiménto de coleçioìn o l'é stæto curòu da Carla Mazzarello, e o museo o l'é stæto riaverto a-o pùblico into 1950. Tra e coleçioìn gh'é 'n'arecugéita di tesciûi pe-a mòdda (damàsco, velûo, jeans).
O Museo
[modìfica | modìfica wikitèsto]L'é espòsto i dipinti do Pòulo Veroneise (Crocifisción e Susanna e i vêgi), Feipin Lippi (Pâa do Françesco Lomellin, 1502-1503), Zorzo Vasari (Ritræto de 'n zóveno fiorentìn), Lucco Cangiaxo (Madònna da candéia), Caravaggio (Ecce Homo), Parma o Zóveno, (Cristo e a samaritana e L'adùltera).
Tra i artisti forèsti, Pieter Paul Rubens (Venere e Marte), Hans Memling (Crìsto benedixènte) Antoon Van Dyck (Vertummo e Pomona), Gerard David (Politico da Çervæa), Francisco de Zurbarán (Sant'Orsola e Sant'Eufemia), Bartolomé Esteban Murillo (Fûga in Egitto), Giusepe de Ribera, Simon Vouet (David co-a tésta do Golia).
Pitoî zenéixi do baròcco son: Greghetto, Benardo Stroççi, Valeio Castello, Domenego Piola, Pòulo Gieumo Piola, Grigheu De Feræ, Lusciandro Magnasco (Intrategniménto into giardìn d'Arbâ).
Da-o 2009 l'é espòsto a scoltûa de Antonio Canova, Manêna penitente, ch'a l'é colocâ into vixìn Palàsso Döia-Tursci.
Galerîa de òpere
[modìfica | modìfica wikitèsto]-
Pieter Paul Rubens, Vénere e Marte. -
Antoon Van Dyck, Vertùmmo e Pomôna. -
Valerio Castello, Martirio de San Loénso. -
Gerard David, Polìttico da Çervæa, 1506-1510 -
Lucco Cangiaxo, Madònna da candéia -
Caravaggio, Ecce Homo, 1605. -
Giusepe de Ribera, San Françesco d'Assisi o riçeive da l'àngiou i sette privilêgi.
.JPG)
Nòtte
[modìfica | modìfica wikitèsto]- ↑ O pölo museâle di tréi palassi da stràdda Garibaldi: Palàsso Gianco, Palàsso Rosso e Palàsso Döia-Tursci.
Bibliografîa
[modìfica | modìfica wikitèsto]- Galleria di Palazzo Bianco: guida/a cura di Laura Tagliaferro e Clario Di Fabio, Zêna, Comun-Assessorato a-e instituçioin e attivitæ culturali, 1991.
- Musei di Strada Nuova a Genova: Palazzo Rosso, Palazzo Bianco e Palazzo Tursi/a cura di Piero Boccardo e Clario Di Fabio; fotografie di Massimo Listri, Turin, U. Allemandi, 2004.
- Musei di Strada Nuova a Genova, Milan, Skira, 2010.
Âtri progètti
[modìfica | modìfica wikitèsto]
Wikimedia Commons a contêgne di files in sce Palasso Gianco
| Contròllo de outoritæ | GND (DE) 4841641-1 |
|---|